საქსტატის ინფორმაციით, 2022 წელს გაცემული სამშენებლო ნებართვების რაოდენობა 7.2%-ით გაიზარდა.  გასულ წელს საქართველოში 7 421.9 ათასი კვ.მ ფართობის შენობა-ნაგებობების მშენებლობაზე 10 822 ნებართვა გაიცა.

ნებართვების 77.2% ქვეყნის 4 რეგიონზე მოდის. ჩასატარებელი სამშენებლო სამუშაოებით [52%] თბილისი და [10.5%] მცხეთა-მთიანეთი ლიდერობენ. აღსანიშნავია, რომ გაცემულ ნებართვებში შედარებით დიდი წილით წარმოდგენილია მრავალფუნქციური საცხოვრებელი კომპლექსები.

როგორ აფასებენ სამშენებლო სექტორში არსებულ ტენდენციებს ურბანისტები და თვლიან თუ არა დამატებით რეგულაციებს საჭიროდ. როგორც „კომერსანტთან“ საუბრისას ურბანისტმა მერაბ ბოლქვაძემ აღნიშნა, მშენებლობა დადებითი პროცესია, რადგან ადამიანები საქმდებიან და სამშენებლო მასალები იყიდება, თუმცა მშენებლობების გეგმარება ერთიან სისტემის მიხედვით უნდა ხდებოდეს, რაც ასე არაა. მისივე თქმით ქვეყნის განვითარებისთვის მნიშვნელოვანია, არა მხოლოდ თბილისი და ბათუმი, არამედ სხვა ქალაქებიც ვითარდებოდეს.

„თბილისს აქვს პოლიცენტრული არეალი, გენერალურ გეგმაში მითითებული გვქონდა, რომ იქ დაშვებულია მაღალი ინტენსივობები და მრავალფუნქციური განვითარება, მას ჰქვია ინვესტიციის მოზიდვის არეალები და ზრდის წერტილები, შესაბამისად, დასაშვებია სართულიანობა.  გენერალური გეგმა ზღუდავს თავისუფალ არეალებზე მშენებლობას,  ასეთია სკვერები, პარკები, მათი განახლება უნდა მოხდეს და რაოდენობა უნდა გაიზარდოს. გენერალური გეგმის  მთავარი  მოთხოვნა იყო  თავისუფალი ტერიტორიების დაცვა და უსისტემო მშენებლობის  უარყოფა.

მაგალითად კოჯორში, კიკეთში და ამ მიდამოებში, რა თქმა უნდა, მშენებლობა შეიძლება, უბრალოდ ეს არ უნდა იყოს  გაფანტული. მაგალითად ორი სახლი ერთად და შემდეგ 5 კილომეტრში  ოთხი სახლი ერთად და ა.შ. შენდებოდა დაფანტულად  და ჯგუფებად. ამ შემთხვევაში ეს  ტერიტორიები  არ იყო უზრუნველყოფილი საჭირო  ინფრასტრუქტურით, მათ შორის  წყალმომარაგებით, ელექტრობით და გზებით.  როდესაც  საუბარია იმაზე, რომ საქართველო არ არის  მდიდარი  ქვეყანა, უსისტემო და დაფანტული მშენებლობა არ არის მიზანშეწონილი, კომპაქტური  განვითარებებია  სწორი და  არა გაფანტული განვითარება.  თორემ მშენებლობის წინააღმდეგი არავინ  არ  არის. მთავარია დაცული იყოს თავისუფალი არეალები და ნაკლები ზემოქმედება ჰქონდეს გარემოს“ - აღნიშნა მერაბ ბოლქვაძემ.

ბოლქვაძის თქმით, ქვეყნის  განსახლებისთვის მნიშვნელოვანია, რომ სხვა  ქალაქებიც  ვითარდებოდეს, რადგან  განვითარებული  ქვეყნების  ამოცანაა, რომ  მოსახლეობა  ქვეყანაში  თანაბრად განაწილდეს.

„ქვეყნის განსახლება დასამუშავებელია, ქალაქ წარმომქმნელი  ფაქტორები  უნდა გაჩნდეს  ქუთაისში, ფოთში, აღმოსავლეთ  ქალაქებში, მაგალითად გურჯაანში. იმიტომ რომ თუ სხვა  ქალაქებში  დასაქმების ადგილები  განვითარდება, ყველა  დედაქალაქში  არ  ირბენს. თანაბარი  განვითარება  ყველა  მოწინავე  ქვეყნის  ამოცანაა და სასურველია, რომ საქართველოშიც ასე მოხდეს“, - აღნიშნა მერაბ ბოლქვაძემ.

თაკო კვაჭანტირაძე