მას შემდეგ, რაც 30 ოქტომბერს წალენჯიხაში მერის ასარჩევად ჩატარებულ მეორე ტურში „ერთიანი ნაციონალური მოძრაობის კანდიდატმა გია ხარჩილავამ გაიმარჯვა, ორმა ბიზნესმენმა უკვე გამოთქვა წალენჯიხაში გადასვლის სურვილი. პირველად ეს სურვილი მამუკა ხაზარაძემ გააჟღერა და ამისკენ სხვასაც მოუწოდა.
„უკვე ვაპირებდი ანაკლიაში გადასახლებას, მაგრამ არ დამცალდა, მე გადმოვსახლდები წალენჯიხაში, უახლოეს ხანში ვიყიდი ბინას, დავუდგები წალენჯიხის ახალარჩეულ მერს გვერდით და მთელ ჩემს გამოცდილებას მოვახმარ იმას, რომ წალენჯიხა ვაქციოთ მართლა ოაზისად. ვისარგებლებ შემთხვევით, მოვუწოდებ ყველა ბიზნესმენს, გადმოიტანეთ თქვენი კომპანიების ანგარიშები წალენჯიხაში. ჩვენ ვაჩვენებთ როგორ უნდა ნამდვილი დემოკრატია," - განაცხადა მამუკა ხაზარაძემ და მეორე დილითვე სოციალურ ქსელში დაწერა, რომ წალენჯიხაში მას თემურ ჭყონიაც გაჰყვება.
"დილით თემურ ჭყონიას წერილი დამხვდა. მეც მოგყვები წალენჯიხაში, როგორც კი დაიწყებ ეგრევე ჩამოვალ. მაგარი კაცი ხარ თემურ, მადლობა, ერთად ბევრ საქმეს გავაკეთებთ," - წერს ხაზარაძე ფეისბუქზე.
ბიზნესმენი თემურ ჭყონია ამბობს, რომ მას შემდეგ რაც წალენჯიხაში ახალი მერი მოვალეობების შესრულებას შეუდგება, მუნიციპალიტეტში ჩავა და გარემოს შეისწავლის.
ქვეყნის განვითარება არის, რომ ბევრი ოფისები უნდა გაიხსნას და ბევრი წარმოებები. ერთი წარმოებით რომ იწანწალო აქეთ-იქით, რა გამოვა, ერთი იქნება სულ. მე უბრალოდ დამაინტერესა, ეს ბიზნესაზარტია. მერი აღმოჩნდა ძალიან კრეატიული. აღმოჩნდა მერი, რომელიც აპირებს წალენჯიხაში იმ პროექტების განხორციელებას დამოუკიდებლად. მე მაინტერესებს კოალიციური მმართველობის პერიოდში როგორი დამოუკიდებელი შეიძლება იყოს მერი გადაწყვეტილებების მიღებაში, - განმარტა ჭყონიამ.
სარკინიგზო საკითხების სპეციალისტი დავით გოჩავა კი ამბობს, რომ წალენჯიხის განვითარებისთვის გადამწყვეტი იქნება სარკინიგზო ხაზის „ინგირი - ზუგდიდი - ჯვარი“ აღდგენა და ეს უნდა იყოს პირველი პროექტი, რაც ამ რეგიონში გაკეთდება. გოჩავას მტკიცებით, სწორედ ამ ხაზზე უნდა გადავიდეს „შტადლერის“ ოთხივე მატარებელი, რაც ახლა მოძრაობს რკინიგზის სისტემაში.
აღნიშნულ ხაზზე უნდა გადავიდეს „შტადლერის“ ოთხივე მატარებელი, თუ დარჩა მას რესურსი, რა თქმა უნდა. აქ არ იქნება უკვე მაღალი ბაქნების პრობლემა, რისი უქონლობის გამო ეს მატარებლები ვერ აჩერებენ თბილისსა და ბათუმს შორის ვერსად და ვერ ემსახურებიან მგზავრებს. შეგახსენებთ, „შტადლერის“ მატარებლები აშენდა იმ მანძილზე მოძრაობისთვის, რა სიგრძის არის სწორედ ეს ხაზი - ეს იყო ამ მატარებლების შექმნის პრინციპული მიზანი, და არა 320 კმ სიგრძის მარშრუტზე მგზავრების გადაყვანა; იმიტომ არის ეს მატარებელი ორსართულიანი და დიდი გაბარიტების, რომ ერთბაშად გადაიყვანოს 1000 მგზავრი თავის ბარგთან ერთად, - ეუბნება "კომერსანტს " პროფესიონალ რკინიგზელთა კლუბის პრეზიდენტი.
ამჟამად წალენჯიხაში ზუგდიდი - ჯვარის 35 კმ სარკინიგზო განშტოება უფუნქციოა. სატრანსპორტო დერეფნის კვლევის ცენტრის პრეზიდენტი, პაატა ცაგარეიშვილი კი გვიხსნის, რომ საქართველოს რკინიგზის განშტოებებზე, ლინდაგის სავალალო მდგომარეობის გამო, შეზღუდულია მოძრაობის სიჩქარეები , პრაქტიკულად, რკინიგზა კონკურენციას ვერ უწევს საავტომობილო გადაზიდვებს, და თვალშისაცემია, გზებზე სამშენებლო და ინერტული მასალებით დატვირთული ავტოტრანსპორტის მოძრაობა. ექსპერტის მტკიცებით, საერთო ჯამში, „უფუნქციოდ“ დარჩენი სარკინიგზო განშტოებები, ამუხრუჭებს, ქვეყნის რეგიონების სამრეწველო პოტენციალის განვითარებას.
"სარკინიგზო განშოებების შენახვა პრაქტიკულად, დამატებით ტვირთად აწვება, ისედაც ფინანსურად არამდგრად საქართველოს რკინიგზას. არსებული რეალობიდან გამომდინარე - საქართველოს რკინიგზამ იპოვა „მარტივი“ გამოსავალი - სარკინიგზო განშტოებების სრული დემონტაჟი. ასეთი მაგალითია ზუგდიდი - ჯვარის განშტოების დემონტაჟი. ზუგდიდი - ჯვარის 35 კმ სარკინიგზო განშტოება, რომელიც ენგურჰესის კაშხლის მშენებლობასთან დაკავშირებით აშენდა. კაშხლის მშენებლობის დასრულების შემდგომ, სარკინიგზო ხაზი, ზუგდიდის, წალენჯიხის, ჩხოროწყუს და მესტიის რაიონებს ემსახურებოდა. 2021 წელს, იმ არგუმენტაციით, რომ აღნიშნული მონაკვეთი უფუნქციო , ამასთან გახშირებული იყო ლინდაგის ხშირი ძარცვა, საქართველოს რკინიგზის გადაწყვეტილებით, ზუგდიდი - ჯვარის 35 კმ მონაკვეთის, საწყისი 11 კმ დატოვებული იქნა ექსპლუატაციაში, ხოლო დარჩენილი 24 კმ სრულად იქნა აყრილი და გაუქმებული. ფაქტიურად, რეგიონის 9 სოფელი დარჩა სარკინიგზო კავშირის გარეშე. ქვეყნის რეგიონის, სამრეწველო პოტენციალის განსავითარებლად, აუცილებელი იქნება, საქართველოს რკინიგზის განშტობებზე, ევროპაში ფართოდ აპრობირებული, მოდელის დანერგვა - "განშტოების ინფრასტრუქტურას, აშენებს და ანვითარებს (აფინანსებს) ის საწარმო რომელიც სარგებლობს ამ ინფრასტრუქტურით", - ეუბნება "კომერსანტს პაატა ცაგარეიშვილი.
ავტორი: ბელა გელაშვილი