უკრაინაში რუსეთის შეჭრის შემდეგ ქვეყნის პორტები დაბლოკილია და მათი ოპერირება ვერ ხდება. პორტების ნაწილი კი რუსების მიერ ოკუპირებულ ტერიტორიებზეა განლაგებული და შესაბამისად მათი კონტროლის ქვეშ იმყოფება. მათ შორისაა ხერსონის პორტიც, რომლის ოპერირებასაც ნახევრად ქართული კომპანია ახდენდა.
2020 წლის ივნისში ხერსონის პორტი 30-წლიანი მართვის უფლებით ქართულ-შვეიცარიულ კომპანია LLC RISOIL-KHERSON-ს გადაეცა, რომლის მესაკუთრეც „საქართველოს ინდუსტრიულ ჯგუფთან“ (GIG) აფილირებული Petrol Oil and Chemicals-ი და შვეიცარიული Rissoil S.A.-ია. ეს იყო პირველი პრეცედენტი, როდესაც სტრატეგიულ ობიექტში ქართული კომპანიის შევიდა.
LLC RISOIL-KHERSON-ის მიერ წარდგენილი ხერსონის სავაჭრო პორტის განვითარების გრძელვადიანი სტრატეგიის მიხედვით, ინვესტორი კომპანია პორტის განვითარებაში 15 მლნ დოლარის ინვესტიციის განხორციელებას გეგმავდა.
“კომერსანტი დაინტერესდა გარდა ხერსონის პორტისა კიდევ რა ბიზნეს ინტერესები ჰქონდა უკრაინაში GIG-ს და მის დამფუძნებელსა და დირექტორთა საბჭოს თავმჯდომარეს დავით ბეჟუაშვილს და ახერხებს თუ არა ბიზნესმენი დღეს უკრაინაში საკუთარი ბიზნესების მართვას.
„უკრაინაში წლებია ვოპერირებთ და გვაქვს არაერთი აქტივი. მათ შორისაა მზის სადგური, რომელიც გარკვეული პერიოდი იყო ოკუპირებულ ტერიტორიაზე, თუმცა ამ ვითარებაშიც და ახლაც უწყვეტლივ აწოდებს ენერგიას უკრაინის ენერგო სისტემას.
რაც შეეხება პორტს, პორტი მდებარეობას ხერსონის ოლქში, სამწუხაროდ დროებით ოკუპირებულ ტერიტორიაზეა და არ ხდება მისი ოპერირება.
ჩვენ, ჩვენის მხრიდან ვგრძნობთ ჩვენს პასუხისმგებლობას და მაქსიმალურად ვუდგავართ გვერდით უკრაინის მოსახლეობას“, - განუცხადეს „კომერსანტს“ GIG-ში.