უკრაინელმა მილიარდერების ნაწილმა რუსეთის აგრესიის მიმართ თავიანთი პოზიცია მკაფიოდ გამოხატა და გადაწყვიტა, ჯარს და მოსახლეობას აქტიურად დახმარებოდა. ამის შესახებ უკრაინული გამოცემა „ფოკუსი“ წერს.
24 თებერვალამდე ცოტა ხნით ადრე, როცა რუსეთმა უკრაინაში შეჭრა დაიწყო, უკრაინულმა მედიამ ევროკავშირის ქვეყნებში ჩარტერული ფრენების ნაკადის შესახებ ინფორმაცია გაავრცელა, რომ „ოლიგარქები ქვეყანას ტოვებდნენ." ბევრი მილიარდერისა და მილიონერის ზუსტი ადგილმდებარეობა უცნობია, ხოლო ის ბიზნესმენები, რომლებიც საზღვარგარეთ ომამდეც ცხოვრობდნენ, იქვე რჩებიან. ასეთი არის, მაგალითად, კონსტანტინე ჟევაგო და დიმიტრი ფირტაში. თუმცა რინატ ახმეტოვი, იური კოსიუკი, გალინა და ალექსანდრე გერეგები, ასევე, ვადიმ ნოვინსკი უკრაინაში დარჩნენ. უკრაინაში იმყოფება და ფრონტის ხაზზე იბრძვის, ასევე, კორპორაცია Roshen-ის მფლობელი და ყოფილი პრეზიდენტი, პეტრო პოროშენკო.
რას საქმიანობენ მილიარდერების საწარმოები და ფონდები ომის დროს:
რინატ ახმეტოვი - Forbes 2022-ის მიხედვით, მისი ქონება 4,2 მლრდ დოლარს შეადგენს. ომის დაწყებიდან 4,3 მლრდ დოლარი დაკარგა. მისი თქმით, რენატ ახმეტოვის ფონდმა და ბიზნესმა ქვეყნის დასახმარებლად ძალისმევა გააერთიანეს. მაგალითად, 7 მარტის მდგომარეობით, SCM ჯგუფმა გამოყო 100 მლნ გრივნაზე მეტი კიევის დასახმარებლად, Metinvest-მა ტერიტორიული დაცვის ძალებისთვის (TPO) 300 მლნ გრივნას დამცავი აღჭურვილობა შეიძინა, FUIB-მა უკრაინის შეიარაღებულ ძალებსა და TPO-ს, თითქმის, 62 მლნ გრივნა გაუგზავნა, ხოლო YASNO-მ ჰუმანიტარული დახმარებისთვის 5 მლნ გრივნა გამოყო. ენერგეტიკული სექტორის ინვესტორი კომპანია DTEK უფასოდ აწვდის ელექტროენერგიას სამედიცინო დაწესებულებებს, პურის მწარმოებლებს, სამხედრო სტრუქტურებს კიევის, დონეცკის, დნეპროპეტროვსკის რეგიონებში. ახმეტოვის ჯგუფის კომპანიები თავშესაფრებისთვის უზრუნველყოფენ და ამზადებენ პროდუქტებს, მედიკამენტებსა და გენერატორებს, დახმარებას უწევენ იძულებით გადაადგილებულ პირებს, ხსნიან ჰუმანიტარული დახმარების შეგროვების პუნქტებს, მოსახლეობა საბრძოლო უბნებიდან გამოჰყავთ და საავადმყოფოებს ჟანგბადითა და სხვა სამედიცინო აღჭურვიობით ამარაგებენ.
ვიქტორ პინჩუკი - Forbes 2022-ით, 1,9 მლრდ დოლარის ქონების მფლობელია. ის უკრაინის ყოფილი პრეზიდენტის, ლეონიდ კუჩმას სიძე და კომპანია Interpipe-ის დამფუძნებელია. პინჩუკმა თებერვლის ბოლოდან 700 მლნ დოლარი დაკარგა. Interpipe-ის ცნობით, კომპანია სამხედრო და ტერიტორიული თავდაცვის ძალებისთვის პერსონალურ დამცავ აღჭურვილობას ყიდულობს და ტერიტორიული თავდაცვის ნაწილების აღჭურვისთვის ჯავშანჟილეტების მიმწოდებლებს ეძებს. Interpipe-ის საწარმოები ორ დღეში 96 ე.წ. ტანკსაწინააღმდეგო ზღარბს ანუ ლითონის ზღუდეს ამზადებს. კომპანია რეგიონული სამხედრო ნაწილების, ტერიტორიული თავდაცვის ქვედანაყოფებისა და მოხალისეთა ორგანიზაციების გადაუდებელ საჭიროებებს უზრუნველყოფს. მოთხოვნის შემთხვევაში, აგზავნის საწვავს, მილებს, ლითონს, ბეტონის ბლოკებს, ფილებს, ლურსმნებს, ჭურჭელს, სამშენებლო მასალას, საკანცელარიო ნივთებს, თერმო საცვლებს და სხვა. საქველმოქმედო ფონდ „რეგიონის აღორძინების“ თანხები, ასევე, უკრაინის შეიარაღებულ ძალებს, ტერიტორიული თავდაცვის ნაწილებსა და დაჭრილებს ხმარდება. დნიპროს, ნოვომოსკოვსკსა და ნიკოპოლში საწარმოების ტერიტორიაზე 18 დროებითი თავშესაფარი მოეწყო. დაბომბვის ან საჰაერო თავდასხმის საფრთხის დროს მას 8500-ზე მეტი ადამიანი აფარებს თავს. ვიქტორ და ელენა პინჩუკებმა და პინჩუკის ფონდმა, ასევე, მისმა პარტნიორებმა, Schmidt Futures-მა, Vista Equity Partners-მა, Minderoo Foundation-მა და Atlantic Foundation-მა უკრაინის დახმარების ფონდი დააფუძნეს, რაც 6 მლნ დოლარის ერთობლივი საქველმოქმედო ინიციატივაა. ფონდის სახსრები უკრაინელების გადაუდებელ საჭიროებებს, განსაკუთრებით სამედიცინო აღჭურვილობას ხმარდება.
ვადიმ ნოვინსკი - Forbes 2022-მა მისი ქონება 1,3 მლრდ დოლარად შეაფასა და ომის დაწყებიდან 2,2 მლრდ დოლარით შემცირდა. ნოვინსკი პარტია „ოპოზიციური ბლოკიდან“ უმაღლესი რადას დეპუტატი და Smart Holding-ის საინვესტიციო ჯგუფის მფლობელია. Smart Holding-ის ცნობით, Vadym Novynskyy Foundation-მა მარიუპოლის მცხოვრებთა ჰუმანიტარული დახმარებისთვის 10,5 მლნ გრივნა გამოყო. ფონდმა, ასევე, შეიძინა საწვავი ტრანსპორტისთვის, რომელიც მარიუპოლიდან მშვიდობიანი მოსახლეობის ევაკუაციას ეწევა. ფონდი ჰუმანიტარული პროექტებისთვის 150 მლნ გრივნის გამოყოფას გეგმავს. კომპანია Metinvest-მა, რომლის აქციონერებიც SCM და Smart Holding არიან, უკრაინის TPO-სთვის დამცავი აღჭურვილობის შესაძენად 10 მლნ ევრო გამოყო. Metinvest ჯგუფის მოხალისეები დაზარალებული რეგიონების მცხოვრებლებისთვის ტონობით ჰუმანიტარულ დახმარებას აგროვებენ. კომპანია დახმარებას უწევს „მწვანე დერეფნების“ გახსნას. Smart Holding-ის ცნობით, ვადიმ ნოვინსკის ფონდმა კიევის ერთ-ერთი ბავშვთა სახლის აღსაზრდელები ზაკარპატიის ოლქში გადაიყვანა.
კონსტანტინე ჟევაგო - Forbes 2022-ით ამ დროისთვის ის 1,3 მლრდ დოლარის ქონებას ფლობს; დაკარგა 800 მლნ დოლარი. ჟევაგო სამთომომპოვებელი კომპანია Ferrexpo-ს მფლობელია, რომელიც ფლობს აქტივებს ცენტრალური უკრაინის პოლტავას რეგიონში. კომპანიამ შექმნა ჰუმანიტარული ფონდი ადგილობრივი თემების უშუალო მხარდასაჭერად და ჯერ კიდევ მარტის დასაწყისში ფონდში 1,5 მლნ დოლარი გადარიცხა. ფონდის სახსრები მიმართულია ადგილობრივი საკვების შესაძენად ხანგრძლივი შენახვის ვადით, ასევე, აღჭურვილობის მარაგის შესავსებად, თავშესაფრების ადგილებში საბნების და ადგილობრივი საავადმყოფოებისთვის, სამედიცინო დაწესებულებებისთვის აუცილებელი მარაგის შესაძენად.
პეტრო პოროშენკო - Forbes 2022-მა მილიარდერების სიიდან ამოიღო, რადგან მისი კაპიტალი 700 მლნ დოლარამდე შემცირდა. მისმა საკონდიტრო კომპანია Roshen-მა ღირებულების, დაახლოებით, 75% დაკარგა და იძულებული გახდა, კიევსა და ბორისპოლში ორი ქარხანა დაეხურა. პოროშენკო დაკავებულია დედაქალაქისა და რეგიონის ტერიტორიული თავდაცვის ნაწილების უზრუნველყოფით და მათ ტყვიამფრქვევებით, ავტომატებით, რაციებით, აღჭურვილობითა და ზამთრის თბილი ფორმებით ამარაგებს.
Forbes 2022-ის მონაცემებით, მთლიანობაში, უკრაინის უმდიდრესი ბიზნესმენების ქონება ომის დაწყებიდან, თითქმის, 10 მლრდ დოლარით შემცირდა.
BPN.GE
უკრაინა
