ხაზარაძე–ჯაფარიძის წინააღმდეგ „თიბისი ბანკის“ ბრიტანელი აქციონერის იან მალქოლმ ჰოქის სარჩელის შესაგებლები სასამართლოში მხოლოდ შპს „სამგორი ემ“-მა და შპს „სამგორი თრეიდმა“ შეიტანეს. რაც შეეხება მამუკა ხაზარაძესა და ბადრი ჯაფარიძეს, რომელთაც სასამართლომ ბრიტანელი აქციონერის სარჩელის საფუძველზე ბანკში არსებული 30 მლნ ლარის აქტივები დაუყადაღა, მსგავსი იურიდიული პროცედურა არ გაუვლიათ.
ხაზარაძე-ჯაფარიძის ადვოკატი ზვიად კორძაძე ამბობს, რომ აუცილებლად წამოიწყებენ სასამართლო დავას, თუმცა დამატებით დეტალებზე საუბარი არ სურს.
როგორც ადვოკატი აცხადებს, რამდენიმე დღეში საზოგადოებას ახალ ინფორმაციას გააცნობს. მისივე თქმით, მათ დოკუმენტები ჩაბარდათ და საქმის მოსამზადებლად დრო აქვთ.
„ვაპირებთ სამართლებრივ რეაგირებას. იურიდიულად ეს საქმე არაფერია, უფრო პიარული სვლაა, რადგან რაც ვნახეთ, იმდენად აბსურდული სარჩელია, იმ კვირაში გაიგებთ, რა არის აბსურდულობა“, - აღნიშნა ზვიად კორძაძემ.
საპასუხო სარჩელის შეტანასთან დაკავშირებით ხაზარაძე-ჯაფარიძის პოზიციასთან დაკავშირებით ბრიტანელი აქციონერის იან მალქოლმ ჰოქის უფლებადამცველს დიმიტრი ტორაძე ამბობს, რომ იმ შემთხვევაში თუ ისინი შესაგებელს არ შეიტანენ, სასამართლო მათ წინააღმდეგ დაუსწრებელ გადაწყვეტილებას მიიღებს.
„აპირებს კი არა, უნდა შემოიტანოს შესაგებელი იმიტომ, რომ მათ აქვთ კანონით დადგენილი ვადა და იმ ვადაში შესაგებლის შემოუტანლობის შემთხვევაში სასამართლოს მიერ მიღებული იქნება დაუსწრებელი გადაწყვეტილება მათ წინააღმდეგ. შესაბამისად, თუ მათ აქვთ ლეგალური ინტერესი და სადავო პოზიციები, ეს აუცილებლობაა მათი მხრიდან. ჩვენ გვაინტერესებს მათი პოზიცია. მარტივად გეტყვით, ჩვენს სასარჩელო განცხადებაში არაფერი არ წერია ახალი, რაც ამ მხარეებისთვის არ იყო 3 თვით ადრე ცნობილი. მე რომ „თიბისი ბანკს“ მივმართე წერილით, აბსოლუტურად ყველაფერი ეწერა იქ. „თიბისი ბანკს“ მივმართე და არა კონკრეტულად ფიზიკურ პირებს, მამუკა ხაზარაძეს და ბადრი ჯაფარიძეს, მაგრამ აბსოლუტურად ვარ დარწმუნებული, რომ ბანკში ჩვენი მიტანილი წერილის შინაარსი მათთვის ცნობილი იქნებოდა. შესაბამისად, 90 დღის წინ რაც იყო ცნობილი, ჩვენ რომ 96-ე დღეს სასამართლოს მივმართეთ, რამე მოულოდნელობა არ მომხდარა.
რაც შეეხება მათი მხრიდან განცხადებებს, რომ ეს პიარული სვლაა და რაღაც გაუგებარი პოზიციები, მხოლოდ ეს იყო მათი პოზიცია, მათი სამართლებრივი პოზიცია ჩვენთვის უცნობია და შესაბამისად, შესაგებელს ველოდებით. პიარის ნაწილს ჩვენ იმიტომ ვიყენებთ და საზოგადოებასთან ურთიერთობას იმიტომ ვცდილობთ, რომ მე და ჩემი მარწმუნებელი საქართველოში არ ვფლობთ 70 ონლაინმედიიდან 40-ს და არ გვაქვს ჩვენი საკუთარი ტელევიზია. ამას იმიტომ ვაკეთებთ, რომ არ მოხდეს საინფორმაციო სივრცეში ჩვენი უსაფუძვლო დაჩაგვრა. თორემ პიარული რომ არ იყო და სუფთა სამართლებრივი სარჩელი იყო, ეს ძალიან მარტივად ჩანს.
ასევე, დარწმუნებული ვარ, რაც არ უნდა შესაგებელი დაწეროს ბატონმა მამუკამ და ბატონმა ბადრიმ, ან მათმა წარმომადგენელმა, ესეც თიბისი ბანკისთვის იქნება ცნობილი. ჩემი წინადადება ისევ ძალაშია. როცა სასამართლო სხდომები იქნება და ჩემს გვერდით აუცილებლად იქნება თავისუფალი ადგილი, ველოდები, რომ „თიბისი“ იქ დაიკავებს თავის ღირსეულ ადგილს. ამ შემთხვევაში „თიბისი ბანკის“ პოზიცია გვაინტერესებს“, - ამბობს დიმიტრი ტორაძე.
შეგახსენებთ, რომ 2008 წლის ოქტომბერ-ნოემბერში კომპანიებს „სამგორი M“-სა და „სამგორი თრეიდს“ სესხის გადახდის ვადა გაეზარდათ ერთი წლით ისე, რომ სესხის დაფარვაც კი არ იყო დაწყებული. ხოლო 2008 წლის 31 დეკემბერს სესხის გადახდის ვალდებულების დადგომამდე, „თიბისი ბანკმა“ სესხს მიანიჭა უიმედო კრედიტის კლასიფიკაცია, შემდეგ კი უსაფუძვლოდ ჩამოწერა იგი და გადაიტანა შიდა ბალანსზე. კომპანიებს „სამგორი M“-სა და „სამგორი თრეიდს“ კრედიტი ამ დრომდე არ დაუბრუნებიათ.