თურქეთმა და სომხეთმა ქვეყნებს შორის პირდაპირი საჰაერო-სატვირთო გადაზიდვების განხორციელებისთვის დაწესებული შეზღუდვები გააუქმეს. როგორც „კომერსანტთან“ საავიაციო სფეროს ანალიტიკოსმა იგორ აფციაურმა განაცხადა, თუკი თურქეთსა და სომხეთს შორის საჰაერო სატვირთო გადაზიდვები რეალურად აღდგება, მაშინ ამით საქართველოს საჰაერო სატვირთო ბაზარი გარკვეულ დარტყმას მიიღებს და საქართველოს საჰაერო დერეფანს ტვირთების ნაწილი ჩამოაკლდება.
„თურქეთის გავლით ძალიან ბევრი ტვირთი შემოდის ჩვენთან, რომელიც აქ გენერირდება და შემდგომ ნაწილდება ჩვენს მეზობელ ქვეყნებში, მათ შორის სომხეთში. ამიტომ თუ მათ ექნებათ პირდაპირი საჰაერო სატვირთო ფრენები თურქეთთან, ეს ჩვენს როგორც სატრანზიტო ქვეყნის როლს შეამცირებს.
ამიტომ ეს ჩვენთვის მთლად კარგი არაა. ამის შემდეგ სომხეთი სატრანზიტო მიმართულებად ევროპაში გამოიყენებს არა საქართველოს, არამედ უკვე თურქეთს. ამჟამად სომხეთი იმყოფება ევროკავშირის „შავ სიაში“, ანუ სომხურ ავიაკომპანიებს არ აქვს საშუალება, რომ იფრინონ ევროპაში და ისინი ძალიან ხშირად იყენებდნენ საქართველოს სატრანზიტო მიმართულებად“, - აცხადებს ანალიტიკოსი.
იგორ აფციაურის განმარტებით, საქართველოს საჰაერო სატვირთო გადაზიდვების ბაზარი ისედაც მცირეა და სომხეთის ტვირთის გამოკლება დიდი დანაკარგი იქნება.
„საუბარია არამხოლოდ იმ ტვირთზე, რომელიც სომხეთს ეხება. თუ ჩვენ ვიყენებთ ჩვენს სივრცეს ევროპისა და ჩინეთის დასაკავშირებლად, ასევე თურქეთსაც შეუძლია ანალოგიურად გამოიყენოს საკუთარი დერეფანი. სერიოზული საუბარია ასევე სამგზავრო ფრენების აღდგენაზე, რასაც ჩვენზე უარყოფითი გავლენა ექნება“, - აღნიშნა აფციაურმა.
შეგახსენებთ, თურქეთმა და სომხეთმა ორ ქვეყანას შორის პირდაპირი საჰაერო-სატვირთო გადაზიდვების განხორციელებისთვის დაწესებული დაბრკოლებები გააუქმეს.
„თურქეთსა და სომხეთს შორის პირდაპირი საჰაერო სატვირთო გადაზიდვისთვის დაბრკოლებები ორ ქვეყანას შორის გამართული მოლაპარაკებების შედეგად მოიხსნა“, - აღნიშნულია TRHaber-ის მიერ გავრცელებულ ინფორმაციაში. ხელშეკრულებების დეტალები ამ დროისათვის უცნობია.
სააგენტო Anadolu-ს ცნობით, ტვირთების გადაზიდვა თურქეთსა და სომხეთს შორის 1 იანვრიდან გახდა შესაძლებელი და ამის შესახებ თურქეთის ვაჭრობის სამინისტრომ საექსპორტო ოპერაციებში ჩართულ ადგილობრივ ორგანიზაციებს უკვე აცნობა. სააგენტო ასევე აღნიშნავს, რომ გადაწყვეტილება ორი ქვეყნის სპეციალურ წარმომადგენლებს შორის ორმხრივი ურთიერთობების ნორმალიზებასთან დაკავშირებით გამართულ მოლაპარაკებებზე იქნა მიღებული.