„რაც შეეხება „გაშავებას“ მე მიმაჩნია, რომ არაკორექტულად და არასწორადაა ეს ყველაფერი ნალაპარაკევი და ნათქვამი“, - ასე გამოეხმაურა „კომერსანტთან“ კომპანია „მამისონის“ გენერალური დირექტორის მოვალეობის შემსრულებელი დავით ხიდაშელი თბილისის მერის განცხადებას .
მისი თქმით, სამშენებლო სამუშაოების პროცესში წარმოქმნილ პრობლემებზე კომპანია ინფორმაციას დედაქალაქის პირველ ვიცე-მერს ირაკლი ხმალაძეს სისტემატურად აწვდიდა და მერია საქმის კურსში იყო.
„არ მიმაჩნია ლოგიკურად, რადგანაც იქ იყო ბევრი ობიექტური მიზეზი, რამაც გამოიწვია ამ მშენებლობის ამდენი ხანი გაჭიანურება და გაგრძელება. ეს საკმაოდ საფუძვლიანი მიზეზები იყო და არ ყოფილა თითიდან გამოწოვილი რაღაც.
მერთან კომუნიკაცია არ გვქონდა, თუმცა კომპანიის დამფუძნებელი ხვდებოდა პირველ ვიცე-მერს ირაკლი ხმალაძეს და მან არსებული პრობლემების შესახებ იცოდა.
არ ვიცი, ეს ზეწოლა არის თუ არა. ჩვენი დამფუძნებელი აწარმოებდა მოლაპარაკებებს და ალბათ ის გადაწყვეტს, არის თუ არა ზეწოლა კომპანიის მიმართ. მე ამ წუთში ვერაფერს ვერ გიპასუხებთ. რაც შეეხება გაშავებას, მე მიმაჩნია, რომ არაკორექტულად და არასწორადაა ეს ყველაფერი ნალაპარაკები და ნათქვამი. ჯერ უნდა ობიექტურად გაერკვნენ საქმის არსში და შინაარსში. ერთი თვეა დასრულებულია სამშენებლო სამუშაოები და დოკუმენტაცია ვერ ჩავაბარეთ, ბოლო ბოლო თავის დროზე გაკეთებული ექსპერტიზები ახლა გააერთიანეთო და ამას სჭირდება გარკვეული დრო“, - განუცხადა დავით ხიდაშელმა „კომერსანტს“.
განცხადება, რომ თბილისის სატრანსპორტო კომპანია მეტროსადგურ „გოცირიძის“ სარეაბილიტაციო სამუშაოების შემსრულებელ კომპანია „მამისონთან“ თანამშრომლობას აღარ გააგრძელებს, დღეს თბილისის მერმა დედაქალაქის მთავრობის სხდომაზე გააკეთა. კალაძემ შესაბამისის სამსახურების ხელმძღვანელებს მოუწოდა, მიიღონ ყველა შესაბამისი ზომა, რომ მომდევნო წლებში „მამისონი“ ვერცერთ სატენდერო პროცედურაში ვეღარ მოხვდეს. მისივე თქმით, თანხას, რომელიც მეტროსადგურის ექსპლუატაციაში მისაღებად დაიხარჯება, დედაქალაქის მერია კომპანია „მამისონს“ სასამართლოს გზით მოსთხოვს.