2022 წელს საქართველომ რეკორდული 2 მლრდ უცხოური ინვესტიცია მიიღო, რაც 2021 წლის მონაცემებს 61.1%-ით აღემატება.

კავკასიის უნივერსიტეტის ეკონომიკის სკოლის დეკანი სოსო ბერიკაშვილი ამბობს, რომ ინვესტიციების ზრდა რამდენიმე მნიშვნელოვანმა ფაქტორმა გამოიწვია, რომელიც ძირითადად საგარეო გავლენით მოხდა. თუმცა, მისი თქმით, 2022 წელს ინვესტიციების კუთხით ძალიან მნიშვნელოვანი იყო „საქართველოს კაპიტალის“ შვილობილი კომპანია Georgian Global Utilities-ის (GGU) საკონტროლო პაკეტის ესპანურ გიგანტ AQUALIA-ს მიერ შეძენა. გარიგება 2022 წლის პირველ კვარტალში დასრულდა და მის ფარგლებში Aqualia-მ GWP-ის 80%-იანი წილის სანაცვლოდ $180 მილიონი დოლარი გადაიხადა.

„რეკორდული ინვესტიციები დაფიქსირდა, თუმცა ეს ყველა სფეროს არ შეეხო, უფრო სექტორული ზრდა გვაქვს. მთავარი ინვესტიცია შარშან მარტში განხორციელდა, რომელიც კომპანია GWP-ს ეხებოდა, მაშინ ესპანეთიდან 200 მილიონი დოლარამდე კაპიტალდაბანდება განხორციელდა.

ინვესტიციის მოზიდვა გეოპოლიტიკურ დაძაბულობასაც უკავშირდება, პირველ რიგში რუსეთ-უკრაინის ომს. რეგიონში რთული ვითარებაა, საქართველოში კი შედარებით სტაბილური  მდგომარეობაა, რამაც ინვესტიციების გარკვეული ნაკადი ჩვენსკენ გამოუშვა. სექტორულად მნიშვნელოვანია დეველოპერულ სექტორი, სადაც მიგრანტების შემოსვლა დადებითად აისახა და ინვესტიციები გაზარდა. ასევე ტრადიციულად ლიდერია საფინანსო სექტორი, რადგან ბრუნვა დიდია და მისი მეშვეობით ხდება სხვა სექტორების დაფინანსება“, - აღნიშნავს სოსო ბერიკაშვილი.

საქსტატის ინფორმაციით, ყველაზე დიდი მოცულობის პირდაპირი უცხოური ინვესტიცია საფინანსო და სადაზღვევო საქმიანობების სექტორში განხორციელდა და 526.4 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 26.3 პროცენტია. მეორე ადგილზე იმყოფება უძრავი ქონების სექტორი 406.9 მლნ. აშშ დოლარით (20.3 პროცენტი), ხოლო მესამეზე - წყალმომარაგების და ნარჩენების მართვის სექტორი 197.0 მლნ. აშშ დოლარით (9.9 პროცენტი).