უკრაინაში რუსეთის სრულმასშტაბიანი შეჭრის შემდეგ ლოგისტიკის მიმართულებით ახალი გამოწვევები და შესაძლებლობები გაჩნდა. მსოფლიო ბანკი მიჩნევს, რომ საქართველოს დღის წესრიგი ლოგისტიკის გაუმჯობესება, ინფრასტრუქტურული ხარვეზების აღმოფხვრა და სექტორში ინვესტიციების მოზიდვა უნდა იყოს.  

რამდენად უმკლავდება საქართველო არსებულ გამოწვევებს და აქვს თუ არა ქვეყანას იმის პოტენციალი, რომ ლოგისტიკის ჰაბი გახდეს.  ამის  შესახებ რადიო „კომერსანტის“ გადაცემაში „კომერსანტის დილა“ საქართველოს  ლოგისტიკის ასოციაციის თავმჯდომარემ გიორგი დობორჯგინიძემ ისაუბრა.

მისი თქმით, საქართველოს გავლით ტვირთების ნაკადი რამდენჯერმე გაიზარდა, თუმცა სასაზღვრო პუნქტების არასაკმარისი გამტარობის გამო წარმოიშობა რიგები, რაც ტრანსპორტირებას ახანგრძლივებს.

„ვხედავთ რომ საქართველოს პორტებში ტვირთბრუნვა სწრაფად იზრდება, თუმცა აქ გამტარუნარიანობის მნიშვნელოვანი პრობლემა ჯერჯერობით არ დგას, მაგრამ თუ ტენდენცია გაგრძელდა, გამტარუნარიანობის პრობლემა პორტებსაც შეეხება.

რაც შეეხება სარკინიგზო ინფრასტრუქტურას, გამტარუნარიანობის თვალსაზრისით აქ ჯერჯერობით პრობლემები არ არის,  თუმცა თუ  ჩვენ ვსაუბრობთ სწრაფ გადაზიდვებზე და გადაზიდვების სანდოობაზე, რა თქმა უნდა, არა მარტო სარკინიგზო,  არამედ  სხვა მიმართულებზეც საჭიროა  გაუმჯობესება.  თუ ჩვენ გრძელვადიან პერსპექტივაში სატრანზიტო ტვირთების შენარჩუნება გვინდა, ძალიან მნიშვნელოვანია რომ კორიდორი, რომელიც საქართველოზე და კავკასიაზე გადის/ შუა კორიდორი უნდა იყოს კონკურენტუნარიანი სხვა  კორიდორებთან მიმართებაში“, - აღნიშნა გიორგი დობორჯგინიძემ.

გიორგი დობორჯგინიძე ფიქრობს, რომ ომის შედეგად გამოწვეული ცვლილებები არ არის მოკლევადიანი და მინიმუმ საშუალოვადიანი პერსპექტივაა, ამიტომ ომის  დასრულების შემდეგაც, ტვირთის მფლობელთა ინტერესში სავაჭრო ნაკადების  დივერსიფიცირება  კვლავ  დარჩება და რუსეთის სავაჭრო კორიდორი სანდო აღარ იქნება.

„ვხედავთ, რომ სამხრეთის კორიდორი, რომელიც  გადის ირანზე,  სანქციების ქვეშაა, რომელიც შესაძლოა კიდევ უფრო გამძაფრდეს. აქედან  გამომდინარე, ჩვენ ძალიან ხელსაყრელ სიტუაციაში აღმოვჩნდებით.  საქართველოზე გამავალი კორიდორი, ფასის და გადაზიდვის დროის კუთხით, შეიძლება კონკურენტუნარიანი არ არის, თუმცა სანდოობის  მხრივ კონკურენტუნარიანია, ამიტომ ჩვენ გრძელვადიან პერსპექტივაში უნდა ვიფიქროთ და შესაბამისი გამტარუნარიანობა და გადაზიდვის ეფექტურობა  უნდა  უზრუნველვყოთ“, - განაცხადა  გიორგი დობორჯგინიძემ.

დობორჯგინიძის თქმით, როგორც ლოგისტიკური, ასევე სასაწყობე ინფრასტრუქტურის  მოწყობა  ძალიან დიდ ინვესტიციებთან არის დაკავშირებული, რომელშიც როგორც სახელმწიფოს, ასევე  კერძო სექტორის როლი ძალიან მნიშვნელოვანია. 

„ერთ-ერთი მნიშვნელოვანი პირობა და ინსტრუმენტი, იმისათვის რომ სასაწყობე კუთხით საქართველომ ჰაბის  ფუნქციის შესრულება შეძლოს,  ეს არის ლოგისტიკური ცენტრების განვითარება, ამიტომ რისკების შესამცირებლად სახელმწიფოს, როგორც  თანაინვესტორის აქტიური თანამშრომლობა და ინვესტორებთან მოლაპარაკებები ძალიან მნიშვნელოვანია.  

რაც შეეხება ღრმაწყლოვან პორტს მგონია, რომ მისი საჭიროება კვლევებით  დამტკიცებულია.   მე ვფიქრობ, რომ ამ ეტაპზე საავიაციო ბაზარი და საავიაციო გადაზიდვები, როგორც საქართველოში ასევე კავკასიაში შედარებით მცირე და უფრო ნიშურია, თუმცა ეს ონლაინ ვაჭრობის ზრდის პარალელურად იზრდება“, - აღნიშნა გიორგი დობორჯგინიძემ. 

თაკო კვაჭანტირაძე