სანქცირებული რუსეთის ფაქტოორის გამო ენერგეტიკული რისკები ქართულ საზოგადოებაში არაერთგვაროვნად ფასდება. ,,ბორჯომის“ შემდეგ ანალოგიური პრობლემა მოსალოდნელია ნებისმიერ კომპანიაში, სადაც რუსული ინვესტიციებია.

ბიზნესის სამართლის ექსპერტი, სამართალმცოდნე აკაკი ჩარგეიშვილი აცხადებს, რომ მსგავსი რისკი რეალურად არსებობს და სანქციების გამო შეიძლება გამოუვალ მდგომარეობაში აღმოჩნდეს ,,თელასიც“, რომელიც რუსული კომპანიის „ინტერ რაოს“ საკუთრებაშია.

მიიღე ინფორმაცია უფრო სწრაფად „კომერსანტის“  Telegram-ზე.

,,ბორჯომია“ პირველი კომპანია საქართველოში, რომელსაც სანქციების გამო პრობლემა შეექმნა, მაგრამ ნამდვილად არ იქნება უკანასკნელი. ჩვენ კიდევ გველოდება ანალოგიური პრობლემა, იქნება ,,თელასი“, თუ სხვა, რომლებიც რუსული სახელმწიფო კომპანიების საკუთრებაში არიან, მოსალოდნელია, რომ ისინიც  სანქციების ქვეშ აღმოჩნდნენ. ,,თელასიდან“ გადის  ფული რუსეთის ფედერაციაში, მის აქტივებს  თავიდან ბოლომდე ფლობს რუსული სახელმწიფო კომპანია. შესაბამისად, ის ამონაგები თანხა, რაც გაედინება  ქვეყნიდან, ფინანსური ნაკადებიდან გამომდინარე შეიძლება სანქცირებული აღმოჩნდეს, ამ თვალსაზრისით, ,,თელასსაც“ გაუჭირდება საქართველოში საქმიანობა“, - აცხადებს ჩარგეიშვილი ,,კომერსანტთან“.

განსხვავებულია ენერგეტიკოსების მოსაზრება. სექტორში ფიქრობენ, რომ  ენერგეტიკული პრობლემა არ გვემუქრება, მაგრამ რუსეთიდან სხვა ტიპის ესკალაციის რისკი ჯერ კიდევ არსებობს.

როგორც ენერგეტიკოსი გია არაბიძე ,,კომერსანტთან“ აცხადებს, ისეთი ტიპის საფრთხე, რაც საქართველოში ,,ბორჯომთან“ დაკავშირებით შეიქმნა, ენერგეტიკულ სექტორში გამორიცხულია, მაგრამ საუბრობს სხვა ფაქტორებზე, რამაც აგრესორ ქვეყანასთან ურთიერთობისას ნებისმიერ მომენტში შეიძლება იჩინოს თავი.

,,საფრთხეს ვერ ვხედავ, რომ რუსულ ინვესტიციებს ენერგეტიკაში ემუქრებოდეს ისეთი ტიპის პრობლემა, რასაც ,,ბორჯომთან“ დაკავშირებით აქვს ადგილი. თუკი ,,თელასს“ მივიღებთ მხედველობაში, საყურადღებოა ის გარემოება, რომ კომპანია ელექტროენერგიით ამარაგებს შიდა ბაზარს, არ გააქვს ქვეყნის გარეთ, ,,ბორჯომი“ კი მსოფლიოს უამრავ ქვეყანაში გადიოდა. სხვაობა დიდია,  ,,თელასი“ პროდუქციას თბილისის გარდა, არსად არ ჰყიდის და მისი სანქცირება შეუძლებელია. ევროპის ქვეყნებში ან სადმე სხვა მიმართულებით გადიოდეს ,,თელასის“ ელექტროენერგია, ისიც ,,ბორჯომის“ ბედს გაიზიარებდა, მაგრამ ამ შემთხვევაში სხვა მოცემულობაა.

,,ენგურჰესთან“ დაკავშირებითაც, ენერგეტიკული ობიექტები, რომელიც ჩვენ გვაქვს,  ძირითადად საქართველოს ემსახურებიან, აქედან გამომდინარე, ენერგეტიკული პრობლემა არ გვემუქრება. დავუშვათ, ჩვენ თუ გარკვეულწილად დაგვჭირდება ,,ენგურჰესის“ კაშხლის რემონტი, ამას აფხაზურ მხარესთან მოლაპარაკების გზით ვახდენდით და მოვახდენთ, მაგრამ სხვა მხრივ რისკები რეალურია. მუდმივად არსებობს საფრთხე ძალისმიერი კონფლიქტისა, რუსეთი იარაღით  ყველგან შეიძლება მივიდეს ანუ ფიზიკური ესკალაციის რისკი ყოველთვისაა, ამ ქვეყნისგან ვერ ვიქნებით დაცული,  შეიძლება ისეთ რაღაცას მოგედავოს, მიზეზი არ არსებობდეს, თვითონ რაც უნდა, ის იქნება მიზეზი! წინასწარ ჩანდეს, რა გამოიწვევს ფიზიკურ დაპირისპირებას, ასეთი ზედაპირზე არ დევს, მაგრამ არაფრისგან არ ვართ დაზღვეული, როცა მეზობელი ქვეყანა აგრესორია“, - აცხადებს ,,კომერსანტთან“ გია არაბიძე.

შეგახსენებთ, რომ სანქციების გამო, „ბორჯომმა“ საქართველოში მოქმედი ორივე ქარხანა დროებით გააჩერა.

კომპანიის მიერ გავრცელებული განცხადების თანახმად, „უკრაინაში საომარი მოქმედებების დაწყების დღიდან, კომპანია IDS ბორჯომი საქართველო მძიმე ვითარებაში აღმოჩნდა და იძულებულია, ა/წ 29 აპრილიდან დროებით შეაჩეროს ბორჯომის ჩამომსხმელ ორივე ქარხანაში წარმოების პროცესი.

ცნობისთვის, 2013 წლიდან „IDS ბორჯომის საკონტროლო 60%-იან პაკეტს რუსული „ალფა ჯგუფი ფლობს. „ალფა ჯგუფის“ დამფუძნებელი მიხაილ ფრიდმანი დასავლეთის მიერ სანქცირებულ რუს ოლიგარქთა სიაშია.

მარი ჩიტაია