რამდენად შეძლებს საქართველო პროდუქტის დივერსიფიკაციას, ისე რომ ევროპისთვის მრავალფეროვანი პროდუქციის შეთავაზება მოახერხოს და რამდენად გაიაზრებს ამას კერძო სექტორი, რამდენად შეძლებს რუსეთისგან დაშორებას და ევროპის ბაზრის შესაძლებლობად დანახვას, რადიო “კომერსანტის“ ეთერში, გიორგი აბაშიშვილის საავტორო გადაცემაში “ბიზნესინსაიდერი“ ISET-ის კვლევითი ინსტიტუტის წამყვანმა ეკონომისტმა გიორგი პაპავამ ევროკავშირის კანდიდატი ქვეყნის სტატუსის თვითშეფასების კითხვარის კომენტირებისას ისაუბრა. მისი თქმით, თუ რა შეიძლება მოხდეს – პროგნოზი ორაზროვანია.
“ერთი არის ის, რომ შეიძლება ბიზნესმა რუსეთთან სავაჭრო ურთიერთობის გაგრძელებაზე იფიქროს, რადგან რუსეთის ბაზარი შესაძლებლობად აღიქვას, გამომდინარე იქიდან, რომ სანქციების გამო სხვა ქვეყნები გადიან. მაგრამ ამავდროულად ისიც ძალიან მკაფიოდ უნდა ჩანდეს, რომ ამ ბაზარზე მომხმარებლების მსყიდველუნარიანობა მნიშვნელოვნად შემცირდება, მნიშვნელოვნად გართულდება ტრანზაქციები, გაძვირდება ნებისმიერი ფინანსური რესურსების გაცვლა, ამიტომ იმედი მაქვს რომ საქართველოს კერძო სექტორი ამის აღქმას ადვილად შეძლებს, აქ დასჭირდება მთავრობის კიდევ უფრო მეტი მხარდაჭერა.
მაგალითად, რაღაც ინსტრუმენტი შეიძლება იყოს, რომელიც უყურებს მაგალითად, კონკრეტული დახმარება კერძო სექტორის საბოლო ჯამში გვაახლოებს რუსეთის ბაზართან თუ ევროკავშირთან, იმის მიხედვით, შენ რა პროდუქტის სუბსიდირებას ახორციელებ, ეს სუბსიდირება გვაიძულებს მივეჯაჭვოთ რომელიმე ბაზარს თუ პირიქით?“, - აღნიშნა გიორგი პაპავამ.
მისი თქმით თუ სახელმწიფო ასუბსიდირებს კონკრეტულ სოფლის მეურნეობის პროდუქტს, რომელიც ორიენტირებულია რუსეთის ბაზარზე, შენ აპრიორი უბიძგებ ბიზნესს, რომ შექმნას პროდუქტი, რომ რუსეთში გაიტანოს.
„ეს კრიტერიუმი ერთ-ერთი გასათვალისწინებელი იქნება იგივე სექტორების მხარდაჭერის კუთხით, ასევე კონკრეტული ერთი სექტორის შიგნით რა პროდუქტზე ამახვილებ ყურადღებას.
პროგრამას „აწარმოე საქართველოში“ აქვს პროექტები, რომელიც უკავშირდება ევროპულ ბაზარზე ექსპორტის ხელშეწყობას, ევროპიდან ინვესტიციების მოზიდვას, მაგრამ საერთო სურათში რუსეთზე დამოკიდებულებაზე მეტი ყურადღების გამახვილება იქნება საჭირო“, - აღნიშნა გიორგი პაპავამ.
თაკო კვაჭანტირაძე
ევროკავშირი
