დღეს საქართველოს კოდექსით გათვალისწინებულია, რომ ქვეყანაში ანგარიშსწორება ლარით ხორციელდება. რაც შეეხება კრიპტოვალუტას, ზოგიერთი ქვეყანა ფულის ერთეულად ციფრულ ფულს იყენებს თუმცა, ეს არ არის კრიპტოვალუტა. ციფრული ფულის უკან სახელმწიფო დგას და ის ქაღალდის ფულს ე.წ. ელექტრონული ფულით ანაცვლებს. ამის შესახებ რადიო „კომერსანტის“ ეთერში, გადაცემაში „ბიზნესი და სამართალი ნინო ლიპარტიასთან ერთად“, BTU-ს კვლევითი ცენტრის ხელმძღვანელმა და დოქტორმა, პროფესორმა ზვიად გაბისონიამ ისაუბრა.
„აქ საუბარია სახელმწიფოს მიერ ბანკნოტების დონეზე ნომინირებულ ელექტრონულ ფულზე, რომლის კონტროლიც სახელმწიფოს შეეძლება. ეს ფულის გათეთრების წინააღმდეგ ბრძოლის მეთოდადაც შეიძლება იყოს გამოყენებული. რაც შეეხება კრიპტოვალუტას, მის უკან არც ერთი ქვეყნის ვალუტა და ქვეყნის ლეგიტიმაცია არ დგას. შესაბამისად, კრიპტო ბლოკჩეინს იყენებს როგორც ტექნოლოგიას და მისი ღირებულება დაახლოებით ისე განისაზღვრება, როგორც ეს პირველყოფილი თემური წყობილების დროს ხდებოდა ან იმ დროს, როდესაც ერთი პროდუქტის მეორეში გადაცვლა ხდებოდა.
„კრიპტოვალუტის უკან უბრალოდ ნდობით აღჭურვილი პირები დგანან რომლებიც ამბობენ, რომ მზად არიან ერთი ცალი ბიტკოინი ან ეთრიუმი სიტყვაზე 20 000 დოლარში გადაცვალონ, ხშირად ეს ვაჭრობა სპეკულაციურიც არის, მაგრამ კრიპტოვალუტის ღირებულება ასე დგინდება. ღირებულებას ადგენს ბაზარი და ის სოციუმი, ვინც ამაში მონაწილეობს,“ აღნიშნა ზვიად გაბისონიამ.
კითხვაზე ჩაანაცვლებს თუ არა კრიპტოვალუტა ნამდვილ ფულს გაბისონია პასუხობს, რომ შესაძლოა კრიპტოვალუტა რაღაც დონეზე ლეგალურად ცნონ, მაგრამ ძალიან საეჭვოა, რომ ის ოფიციალურ ვალუტად აღიარონ.
გაბისონიამ ინტერნეტ-სამართალზე და საფრთხის შემცველ ტრანზაქციებზე ანუ ე.წ. ფიშინგზეც ისაუბრა და განმარტა, რომ ეს შემთხვევები ხშირად შესაბამისი ცოდნის არ ქონის გამო ხდება და ძირითადად ამის მსხვერპლი საშუალო და დიდი ასაკის მოსახლეობა ხდება.
„ამ ნაწილში პრობლემური არის ის, რომ მომხმარებლებს აპლიკაციებს უგზავნიან სადაც წერია, რომ ლატარიაში გაიმარჯვეს, რაღაც პროდუქტის ყიდვა უნდათ და ა.შ. სანაცვლოდ კი ბარათის მონაცემებს სთხოვენ, მათ შორის ე.წ. CVC კოდსაც. ამ მონაცემების გადაცემის შემდეგ, მომხმარებელი საბანკო ანგარიშებზე თავის ხელით აძლევს მათ წვდომას. რის შემდეგაც შეუძლიათ მომხმარებლის თანხის გამოყენება, გადარიცხვა, რაღაცის ონლაინ მაღაზიაში შეძენა და ა.შ.
რეკომენდაცია და რჩევა, რაც ამ ადამიანების მიმართ მექნება არის ის, რომ ონლაინ ვაჭრობისთვის გამოიყენონ ბარათი, რომელზეც იმ კონკრეტული მომენტისთვის საჭირო თანხა ექნებათ, რომ ვაჭრობის შემდეგ ნაშთი 0 ჰქონდეთ და არავის ანდონ ისეთ ინფორმაცია, როგორიცაა ბარათის ნომერი, CVC კოდი და ა.შ,“ აღნიშნა ზვიად გაბისონიამ.
მოამზადა თაკო კვაჭანტირაძემ