სადისტრიბუციო მანქანების პარკირებისთვის  უკვე შერჩეულია 30-მდე ადგილი. ამის  შესახებ „კომერსანტთან“ ტრანსპორტისა და ურბანული განვითარების სააგენტოს ხელმძღვანელის მოადგილემ დავით ჯაიანმა განაცხადა. მისი თქმით, ინტენსიურად მიმდინარეობს დისტრიბუტორთა ბიზნეს ასოციაციის მიერ მოწოდებული სიის დამუშავება და ახალი ადგილების შერჩევაც მათთან თანამშრომლობით მოხდება.

„ადგილები შერჩეულია ქალაქის სხვადასხვა რაიონში.  მუშაობა უკვე დაწყებული გვაქვს და ეკონომიკური საქმიანობის განმახორციელებელი კომპანიებისთვის საქონლის მიწოდების მიზნით გამოიყოფა სპეციალური საპარკინგე ადგილები, რომელთა მოძიებისათვის მოკვლევა ჩატარდა დისტრიბუტორთა ბიზნეს ასოციაციასთან ერთად.  შემდეგ, მათ მიერ იდენტიფიცირებული ადგილებიდან ჩვენ შესაძლებლობების, ანუ გეომეტრიის, საგზაო პარამეტრების, უსაფრთხოების პარამეტრების მიხედვით შევარჩიეთ 30-მდე  ადგილი. უფრო კონკრეტულად 29 ადგილი. ახალი რეაბილიტირებული ქუჩები ამ გამოყოფილ ადგილებში ჯერჯერობით არის.

დისტრიბუტორთა ბიზნეს ასოციაციის მიერ მოწოდებული სიის დამუშავება ინტენსიურად მიმდინარეობს და ეს არ არის ერთჯერადი საქმიანობა. მთავარია, რომ ეს პროცესი გავხსენით და დავიწყეთ. შესაბამისად, ეს იქნება განგრძობადი საქმიანობა. 100 ადგილამდე უკვე ნანახი, შეფასებული და შესწავლილია და აქედან გამოიყო 30 ადგილამდე. მიმდინარეობს სხვა ადგილების შესწავლა. ტრანსპორტის და ურბანული განვითარების სააგენტო მუშაობს ამ მიმართულებით და ეს პროცესი გაგრძელდება მათთან თანამშრომლობით,“- განაცხადა დავით ჯაიანმა.

სამეწარმეო და მიწოდების სერვისისთვის განკუთვნილი სატრანსპორტო საშუალებების პარკირების თემა პრობლემურია როგორც თავად სექტორის წარმომადგენლებისთვის, ასევე თბილისის სატრანსპორტო მოძრაობისთვისაც. დისტრიბუტორთა წარმომადგენლები აცხადებენ, რომ მიწოდების პროცესში საპარკინგე ადგილების არ ქონის გამო, მათ შესაბამისი სამსახურები აჯარიმებენ, რაც სექტორს მძიმედ აწვება.  ამასთან დედაქალაქის ხელისუფლება მიიჩნევს, რომ არასათანადოდ გაჩერებული სადისტრიბუციო ავტომანქანები სხვა ავტომანქანების გადაადგილებას მნიშვნელოვნად  აფერხებენ.

პრობლემის დარეგულირების ერთ-ერთ გზად განიხილებოდა ღამის დისტრიბუციაც, თუმცა როგორც დისტრიბუტორთა ბიზნეს ასოციაციის პრეზიდენტი ივა ჭყონია აცხადებდა, ამ მიმართულებით პრობლემა მცირე და საშუალო მაღაზიების მხრიდანაა, რომლებიც ღამე მუშაობას და პროდუქციის მიღებას ვერ შეძლებენ.

ნოემბრის თვეში თბილისის მთავრობის სხდომაზე კახა კალაძემ განაცხადა, რომ დედაქალაქში განისაზღვრა 550-ზე მეტი სპეციალური ადგილი, რომელიც დაეთმობა სამეწარმეო და მიწოდების სერვისისთვის განკუთვნილი სატრანსპორტო საშუალებების პარკინგს და თბილისის მასშტაბით,  სპეციალური პარკირების ზონების გამოყოფის პროცესი ეტაპობრივად განხორციელდება.