Terminal პირველი ქართული კომპანიაა, რომელიც მომხმარებლებს ქო-ვორქინგ სივრცეებს სთავაზობს. დღეს კომპანის უკვე ექვს სხვადასხვა ლოკაციაზე აქვს ფილიალები.
შპს „ტერმინალის” 2021 წლის ფინანსური ანგარიშის მიხედვით, კომპანიის შემოსავალი 3.1 მილიონ ლარს შეადგენდა, თუმცა „ტერმინალის” საოპერაციო და ფინანსური ხარჯები შემოსავლებზე მეტი იყო, რის გამოც კომპანიამ 2021 წელს 1 მილიონი ლარის ზარალი განიცადა.
2021 წელს 1 038 001 ლარის ზარალი ნაკლებია 2020 წელს დაფიქსირებულ ზარალზე, რომელმაც 1 924 699 ლარი შეადგინა. ზარალი ძირითადად გამოწვეული იყო დამატებითი ფილიალების გახსნის მიზნით განხორციელებული საქმიანობით.
„კომპანიამ საოპერაციო ხარჯების დაფარვა აქციონერების მიერ დამატებითი ფულადი შენატანების გარეშე მოახერხა. აქციონერთა ფულადი ინვესტიცია გამოიყენებოდა საინვესტიციო აქტივობებისთვის, პერსპექტიული გრძელვადიანი საოპერაციო მიზნების მხარდასაჭერად,”- ნათქვამია კომპანიის ანგარიშში.
ფინანსური ანგარიშის თანახმად, კომპანიის აქტივების მოცულობა 13.7 მილიონი ლარია. კომპანიის მესაკუთრეები კი დავით და ეკატერინა თუშიშვილები არიან.
როგორც „კომერსანტთან“ Terminal-ის ხელმძღვანელი ჯინო დოლინი ამბობს, co-working-ის განვითარებას და მნიშვნელოვან ზრდას ხელს უშლის ბინების ოფისებად გაქირავების ტენდენცია, ამიტომ უცხოეთის მსგავსად საჭიროა ამ მიმართულებით რეგულაციების შემოღება.
დღეისათვის „ტერმინალის“ მიერ შეთავაზებული სივრცეების საერთო ფართობი 8,782 კვადრატული მეტრია. კომპანია 883 სამუშაო მაგიდას, 50 იზოლირებულ ოფისს, 21 შეხვედრების ოფისსა და 8 საკონფერენციო დარბაზს აერთიანებს.