ენგურჰესის კაშხალზე პირველი ტურისტული მარშრუტი დაახლოებით 2 თვის წინ გაიხსნა. როგორც „ბიზნესპრესნიუსთან“ საუბრისას „ენგური ატრაქციის“ დირექტორი ნიკოლოზ ანთიძე აცხადებს, ამ ეტაპზე მარშრუტის დამთვალიერებელთა რიცხვი 100 ადამიანს არ გასცდენია.

მისივე თქმით, ადრე გაზაფხულისთვის იგეგმება ,,ენგურჰესის“ ადმინისტრაციული შენობიდან ვირტუალური ტურის დამატება. შედეგად, დამთვალიერებლებს, ოკუპირებულ ტერიტორიაზე არსებული კაშხლების ნახვის საშუალებაც მიეცემათ.

,,ამ დღეებში ევროსაბჭომ, ინდუსტრიული მემკვიდრეობის მარშრუტში შეიყვანა ენგურჰესი. ეს ძალიან მნიშვნელოვანია, ევროპის მასშტაბით პოპულარიზაციისთვის.

რაც შეეხება ტურებს, 1 ვიზიტორისთვის ღირებულება 20 ლარია, რაშიც შედის ავტობუსით მომსახურება, გიდი და 5 ლოკაციის დათვალიერება. პარალელურად, ვმუშაობთ ახალი ტურისტული ლოკაციების დამატებაზე. კიდევ ერთი ძალიან მნიშვნელოვანი მიმართულება, სავარაუდოდ, 2022 წლის გაზაფხულიდან იქნება ხელმისაწვდომი ვიზიტორებისთვის, რაც გულისხმობს ენგურჰესის ადმინისტრაციულ შენობაში ვირტუალური მუზეუმის მოწყობას. ამის საშუალება ექნებათ ვიზიტორებს ნახონ მთელი ენგურჰესის კასკადური სისტემა, მათ შორის, ოკუპირებულ ტერიტორიაზე, საბერიოში და ა.შ.

ჯერჯერობით გახსნიდან დღემდე, 100 ვიზიტორს არ გასცდენია დამთვალიერებელთა ოდენობა, რომელთა უმრავლესობაც ჩვენი მოქალაქე იყო. სტუმრებს ძირითადად გაზაფხულიდან ველოდებით და ასევე, სვანეთში, ტურისტული სეზონის დაწყების შემდეგ“- განაცხადა ნიკოლოზ ანთიძემ ,,ბიზნესპრესნიუსთან“.

ცნობისთვის, ენგურის თაღოვან კაშხალს ინდუსტრიული მემკვიდრეობის ეროვნული ძეგლის კატეგორია 2015 წელს განესაზღვრა.

BPN.GE