აზერბაიჯანული Yelo Bank, რომელიც თიბისის სტრატეგიული პარტნიორია ბაზარზე პოზიციების გამყარებას და ერთ-ერთ ლიდერად გადაქცევას გეგმავს. ბანკის მმართველი მენეჯერი ნიკოლოზ შურღაია საქართველოს საბანკო სფეროში წლების განმავლობაში მოღვაწეობდა.
„ბანკს 2016 წლის ივლისში შევუერთდი და საკმაოდ რთული მემკვიდრეობა ჩავიბარე. სამი წელი დაგვჭირდა ბანკის აქტივების რეალური ხარისხის გასაგებად. ამ პერიოდში, გასულ წლებში დაგროვილი პრობლემების გამო, ზარალზე ვმუშაობდით. ახალმა გუნდმა გულმოდგინედ ვიმუშავეთ და 2019 წელს შევძელით მომგებიანობაზე დაბრუნება. გასულ წელს ბანკის წმინდა მოგებამ 2.4 მილიონი მანათი შეადგინა. ბანკების ეფექტურობა დამოკიდებულია კარგ კორპორატიულ მმართველობაზე, პროფესიონალ გუნდზე, აქციონერთა მხარდაჭერასა და ტექნოლოგიის სწორად გამოყენებაზე. გასულ წელს და 2020 წლის დასაწყისში, გუნდი გავაძლიერეთ მაღალკვალიფიციური თანამშრომლებით, დავიწყეთ რებრენდინგი და გავზარდეთ ინვესტირება ახალი ტექნოლოგიებში. საერთაშორისო ეკონომიკურმა კრიზისმა კარგი გაკვეთილი მისცა ყველა ინდუსტრიას, მათ შორის საბანკო სექტორს. უფრო მკაფიოდ დავინახეთ ჩვენს მიერ არჩეული განვითარების მიმართულების სისწორე. ბუნებრივია, ვირუსმა გარკვეული სამუშაოები გაართულა. მიუხედავად ამისა, უახლოეს თვეებში რებრენდინგი დასრულდება და მუშაობაც სწრაფად უბრუნდება ჩვეულ რითმს. ახლა მკვიდრი და დინამიური საშუალო ზომის ბანკი ვართ. იმედი მაქვს, რამდენიმე წელიწადში Yelo Bank ბაზრის ერთ-ერთ ლიდერი გახდება“, - განმარტა ნიკოლოზ შურღაიამ.
ნიკოლოზ შურღაიამ კოროვირუსის შედეგად Yelo Bank-ის და ზოგადად საბანკო სექტორში არსებული ვითარებაც შეაფასა და იმ პრობლემებზე ისაუბრა რის წინაშეც ბანკები აღმოჩნდნენ. მისი განცხადებით, 2019 წელი Yelo Bank-ისთვის მომგებიანობაში დაბრუნების წელი იყო. ბანკი მოგებაზე გასვლას 2020 წლისთვისაც გეგმავდა, თუმცა პანდემიამ გეგმები რამდენადმე შეცვალა. Yelo Bank-ი პანდემიას განვითარების მაღალი ტემპით შეხვდა და წლის ბოლომდე მომხმარებელს ახალ პროდუქტებსაც შესთავაზებს.
„კორონავირუსის გავლენა ნამდვილად ნეგატიურია. პირველი სირთულე არის ჩვენი თანამშრომლების და მომხმარებლების ფიზიკური უსაფრთხოება. მეორე გამოწვევა არის ლიკვიდობის და მასთან დაკავშირებული რისკების მართვა. მესამე სირთულე შემოსავლის შემცირებაა, რადგან მოთხოვნა საბანკო მომსახურებაზე მცირდება. მეოთხე სირთულე კი სესხების ხარისხია. ვირუსმა გავლენა მოახდინა ბიზნესის და მოსახლეობის გარკვეული ნაწილის გადახდისუნარიანობაზე. ჩვენ ვხედავთ გადამწყვეტ ნაბიჯებს მარეგულირებლის მხრიდან და ეს ჩვენს ოპტიმიზმს აძლიერებს.
ვისაუბროთ კრიზისის სარგებელზეც. ყველა კრიზისი ქმნის ახალ შესაძლებლობებს. მაგალითად, ჩვენ ველით, რომ კრიზისი დააჩქარებს და გააფართოებს ციფრული ტექნოლოგიების გამოყენებას აზერბაიჯანის საბანკო სექტორში. ჩვენ ძალიან დიდ ინვესტიციას ვდებთ ტექნოლოგიაში და ვთვლით, რომ ის მოლოდინების შესაბამისად იმოქმედებს. ზოგიერთ ქვეყანაში არსებობს ციფრული ბანკები, რომლებიც ფუნქციონირებენ ფიზიკური ფილიალების გარეშე. იმედი მაქვს, რომ ასეთი შესაძლებლობა აზერბაიჯანშიც მალე გამოჩნდება.
Yelo Bank კრიზისს ჭარბი ლიკვიდურობით შეხვდა. ჩვენი მთავარი გამოწვევა ხარჯების შემცირებაა. თუმცა, ნებისმიერი კრიზისი აჩენს ახალ შესაძლებლობებს და ის უბიძგებს რთული, მაგრამ სასარგებლო გადაწყვეტილებების მიღებისკენ. გუნდმა შეადგინა საბანკო ხარჯების ოპტიმიზაციის პროგრამა, რომლის ფარგლებში წელს 4-5 მილიონი მანათის დაზოგვას შევძლებთ“, - განმარტა ნიკოლოზ შურღაიამ.
ბანკის მმართველმა მენეჯერმა „კომერსანტთან“ საქართველოსა და აზერბაიჯანის საბანკო სექტორზეც ისაუბრა. მისი განცხადებით, საქართველოს საბანკო სექტორი ახლა უფრო დიდი და დახვეწილია, ხოლო აზერბაიჯანულ საბანკო სექტორს სწრაფად განვითარების პერსპექტივა აქვს.
„საქართველოს საბანკო სექტორი ახლა უფრო დიდია და დახვეწილი. გასული საუკუნის ოთხმოცდაათიან წლების ბოლოდან საბანკო სექტორში ბევრი უცხოური ინვესტიცია და ტექნიკური დახმარება შემოდიოდა და ეროვნული ბანკიც მხრიდან რეგულირებაც ხარისხიანი იყო. ძალიან მნიშვნელოვანია, რომ ქართული ბანკები იყო კერძო და მისი მფლობელები - გონებაგახსნილები. ისინი მზად იყვნენ გაეწიათ სწორი ლიდერობა და მიეცათ მოქმედების თავისუფლება მენეჯერებისთვის, რათა მათ მართვის თანამედროვე ფორმები გამოეყენებინათ. წლების განმავლობაში ამ ყველაფერმა დადებითი შედეგი გამოიღო და ძლიერი საბანკო სექტორი მივიღეთ. რაც შეეხება აზერბაიჯანულ საბანკო სექტორს, მას აქვს პერსპექტიული ეკონომიკა, ხდება დიდი ტრანსფორმაცია, მენეჯმენტის და ტექნოლოგიების დანერგვა. ასევე, საბანკო სექტორის ზომა ეკონომიკასთან შედარებით მცირეა. აქედან გამომდინარე, აზერბაიჯანში საბანკო სექტორის განვითარების კარგ პერსპექტივას ვხედავ. აქ მუშაობა ძალიან საინტერესოა.
ზოგადად ვფიქრობ, რომ მენეჯმენტში მთავარი არის საორგანიზაციო კულტურა, ნდობის ატმოსფერო და იდეების მერიტოკრატია. არ მჯერა ისეთი ლიდერების რომლებმაც ყველაფერი იციან და ყველაფერს თავად წყვეტენ. მთავარია გუნდური მუშაობა“, - განაცხადა ნიკოლოზ შურღაიამ.
ნინო თამაზაშვილი