1-ლი ივნისიდან ძალაში შევიდა კანონი, რომლის თანახმადაც ონლაინ ვაჭრობის შემთხვევაში მაღაზია ვალდებული იქნება გაყიდული პროდუქცია 14 დღის ვადაში უპირობოდ დაიბრუნოს. კიდევ რას მოიცავს კანონი, „მომხმარებელის უფლებების დაცვის შესახებ“ რადიო ,,პალიტრასა და ,,პალიტრანიუსის გადაცემაში ,,საქმე კონკურენციის სააგენტოს ხელმძღვანელმა ისაუბრა.
ირაკლი ლექვინაძე ამბობს, რომ კანონის აღსრულება 1-ლი ნოემბრიდან მას შემდეგ დაიწყება, რაც კონკურენციის სააგენტოში შესაბამისი დეპარტამენტის ფორმირება მოხდება.
„კანონი ძალაში შევიდა 2022 წლის 1-ლი ივნისიდან, მაგრამ პროცესის აღსრულება დაიწყება 2022 წლის 1-ლი ნოემბრიდან. ანუ, უფლებები რომელსაც აღნიშნული კანონი განუსაზღვრავს მოქალაქეებს და ვალდებულებები, რომელიც ეკისრებათ მოვაჭრეებს სრულფასოვნად 1-ლი ნოემბრიდან ამოქმედდება. ეს მას შემდეგ მოხდება, რაც კონკურენციის სააგენტო იქნება უფლებამოსილი დაიწყოს აღსრულება, მიიღოს მოქალაქეების განცხადებები, განიხილოს და დადგენილ ვადებში უზრუნველყოს მოვაჭრის და მყიდველის შეუთანხმებლობის შემთხვევაში საკითხების გადაჭრა.
ჩვენ განსაკუთრებით სექტემბრიდან გვექნება აქტიური საინფორმაციო კამპანია, რათა ყველამ იცოდეს, რა უფლება აქვს და რა მოვალეობები. ახლა კი დროს ვიყენებთ იმისთვის, რომ დეპარტამენტის ჩამოყალიბება უზრუნველვყოთ, მოვამზადოთ შესაბამისი სტაფი. დავიწყეთ ევროკავშირის პროექტი, სადაც ლიეტუვას და ავსტრიის პროფესიონალები მოგვეხმარებიან იმ ივრო დირექტივებისა და ევროკავშირის საუკეთესო პრაქტიკის გაზიარებაში, რომელმაც ეს საკითხი სრულფასოვნად უნდა გამართოს. სექტემბრიდან კი, როგორც აღვნიშნე, მომხმარებელთან და ბიზნეს სექტორთან პროაქტიური ურთიერთობა გვექნება. ყველას ვთხოვ, დაეყრდნოს მხოლოდ ჩვენს მიერ გავრცელებულ ოფიციალურ ინფორმაციას, რადგან საზოგადოებაში ბევრი აზრი მუსირებს.
14-დღიანი უპირობო დაბრუნების პერიოდი, რაც ყველაზე აქტუალური განხილვის თემაა, ეხება მხოლოდ ონლაინ ვაჭრობის შემთხვევაში, განხორციელებულ ოპერაციებს. ასევე, მაღაზიის გარეთ ნაყიდ ოპერაციებს, სადაც ასევე იქნება დათქმები. დანარჩენ ნაწილში, მოვაჭრეს ეკისრება ვალდებულება მიაწოდოს მომხმარებელს დეტალური ინფორმაცია. გარდა ამისა, არის გარანტიების საკითხი, რომელიც მოვაჭრეებმა უნდა შესთავაზონ მოვაჭრეებს. საგარანტიო პერიოდი 2 წელია, რომლის დროსაც მომხმარებელს აქვს უფლება ნივთის დაბრუნებაზე იდაოს“, - განაცხადა ლექვინაძემ.
წამყვანის კითხვაზე, მიმართვის შემდეგ როგორია კონკურენციის სააგენტოს რეაგირება და ვადები, ლექვინაძე ამბობს, რომ სააგენტოს მიზანი მომხმარებელთა უფლებების დარღვევის პრევენციაა და არა ბიზნეს სუბიექტების დაჯარიმება.
,,იმ შემთხვევაში, თუ წარმოიშვება პრობლემა დავა მოდის კონკურენციის სააგენტოში. ჩვენ 10 დღის ვადა გვაქვს, რომ აღნიშნული საჩივარი ვცნოთ დასაშვებად, ან დაუშვებლად. აქედან 1 თვეში კი ვალდებული ვართ მივიღოთ გადაწყვეტილება. იმ შემთხვევაში კი, თუ საჭიროა ექსპერტიზა, ან დამატებითი საკითხების მოძიება, მაქსიმუმ 3 თვე გვაქვს ვადა, როცა უნდა მივიღოთ გადაწყვეტილება.
იმ შემთხვევაში, თუ ბიზნესს დაუდგინდება დარღვევა, პროცესი 2 ეტაპიანია. პირველი ეტაპი არის გაფრთხილება, როცა პრობლემა უნდა აღმოფხვრას მოვაჭრემ, თუ ეს არ მოხდა ამის შემდეგ შემოდის სოლიდური საჯარიმო სანქცია, ბრუნვის 2%. ამიტომ, მე დარწმუნებული ვარ, ამით მოხდება ბევრი საკითხის პრევენცია, ეს არის ჩვენი მიზანიც და არა ვინმეს დაჯარიმება“, - განაცხადა ლექვინაძემ ,,საქმეში“.