დედაქალაქის მერია ახალი წლის აღნიშვნისთვის ემზადება. მუნიციპალიტეტს საახალწლო ღონისძიებების მოწყობა 4 994 200 ლარი დაუჯდება. აღნიშნულის თაობაზე გამარტივებული შესყიდვა უკვე გამოცხადებულია.

შესყიდვის პირობების მიხედვით, ქალაქ თბილისის მუნიციპალიტეტის მერია 2023 წლის შესახვედრად და დედაქალაქში საახალწლო განწყობის შესაქმნელად სხვადასხვა ღონისძიებების და აქტივობების განხორციელებას გეგმავს. 

ღონისძიებები 22 დღის განმავლობაში, 2022 წლის 23 დეკემბრიდან - 2023 წლის 13 იანვრის ჩათვლით, ორბელიანის მოედანზე, მშრალ ხიდზე, 9 აპრილისა და 9 მარტის ბაღებში გაიმართება.

მერიის ინფორმაციით, სპეციალურად მოწყობილ სივრცეებში, ღონისძიებები ყველა ასაკობრივი კატეგორიის გათვალისწინებითაა დაგეგმილი. წარმოდგენილი იქნება საბავშვო კონცერტები, თეატრალური წარმოდგენები, ზღაპრის გმირები, სხვადასხვა გასართობი და კულტურული აქტივობები. ჩატარდება მსვლელობები, პერფომანსები, ანსამბლების, ბენდების და ესტრადის მომღერლების კონცერტები, ელექტრონული ლაივ-შოუები. სტუმრების განწყობას აამაღლებს თოვლის ბაბუა დამხმარე მსახიობებთან ერთად.

ლოკაციებზე განთავსდება საახალწლო თემატური ფოტოზონები, მოცულობითი ინსტალაციები და დეკორაცია/მორთულობები: დეკორირებული ნაძვის ხეები, თემატური თაღები, სასცენო დეკორაციები, ხიდის, ქუჩებისა და ფასადების თემატური მორთულობები, მოცულობითი ინსტალაციები (თოვლის ბაბუას (სანტას) სახლი და სახელოსნო, საახალწლო ლაბირინთი, საახალწლო მატარებელი და ა.შ.) და სხვა.

დღესასწაულის ფარგლებში გაიმართება გამოფენა-გაყიდვა - „საშობაო ბაზარი“, გასტრონომიისა და ტკბილეულის ფესტივალი.

31 დეკემბერს, დეკორირებულ სცენაზე გალა კონცერტი გაიმართება. კონცერტში ჩართული იქნება 200-მდე მონაწილე, მათ შორის სოლო შემსრულებლები, გუნდები, ანსამბლები, ბენდები, წამყვანები, ორკესტრი.

„შობა-ახალი წლის აღსანიშნავად დაგეგმილი ღონისძიებების შემჭიდროებულ ვადებში ჩატარების აუცილებლობის, ღონისძიებების განხორციელების მიმართ მაღალი საზოგადოებრივი და სახელმწიფოებრივი ინტერესის არსებობისა და იმის გათვალისწინებით, რომ პროცესი უკავშირდება ინტელექტუალურ-შემოქმედებით საქმიანობასაც, სახელმწიფო შესყიდვის ელექტრონული პროცედურების მეშვეობით განხორციელება ვერ ესადაგება ზემოაღნიშნული ღონისძიებების ორგანიზების საჭიროებებს და ვერ უზრუნველყოფს ხარისხიანი, მრავალფეროვანი პროგრამის შემუშავებას. სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარების მიზნით, აუცილებელია ქალაქ თბილისის მუნიციპალიტეტის მერიამ
შობა-ახალი წლის დღესასწაულის აღსანიშნავად დაგეგმილი ღონისძიებების განსახორციელებლად საჭირო საქონლისა და მომსახურების შესყიდვა განახორციელოს გამარტივებული შესყიდვის საშუალებით“, - აღნიშნულია “2023 წლის შობა-ახალი წლის დღესასწაულის აღსანიშნავად დაგეგმილი ღონისძიებების შეზღუდულ ვადებში განსახორციელებლად საჭირო საქონლისა და მომსახურების სახელმწიფო შესყიდვის გამარტივებული შესყიდვის საშუალებით განხორციელების შესახებ“ საქართველოს მთავრობის განკარგულების პროექტში.

რაც დაფინანსებას, 4 994 200 ლარს, ის გამოყოფილი იქნება თბილისის მუნიციპალიტეტის 2022 და 2023 წლის ბიუჯეტებით გათვალისწინებული ასიგნებებიდან.