თბილისში მოქმედ ლომბარდების ნაწილში მიმართვიანობა შემცირდა, ნაწილში კი - არა. როგორც „ბიზნესპრესნიუსთან“ საუბრისას ლომბარდების წარმომადგენლები ამბობენ, მიმართვიანობის შემცირების გამო, ბევრი დაწესებულება ბაზრიდანაც კი გავიდა.
„მიმართვიანობა, რა თქმა უნდა, შემცირებულია. ხალხს აღარც ფული აქვს, აღარც რაიმე გასაყიდი. ეს უკვე დიდი ხანია დაიწყო და პანდემიამ კიდევ უარესი ქნა.
ჩვენთან ყველანაირი და ყველა ასაკის ადამიანი შემოდის, პენსიონრებიც კი შემოდიან. ხალხი თითქმის ყველაფერს აბარებს, განსაკუთრებით კი ტექნიკას, მობილურებს, ლეპტოპებს, ტელევიზორებს და ა.შ. თუმცა ხშირი არაა, რომ შემოაქვთ ნივთი და შემდეგ ვეღარ გააქვთ, ნელ-ნელა იხდიან ხოლმე“, - ეუბნებიან „ბიზნესპრესნიუსს“ ლომბარდში პეკინის ქუჩაზე.
უფრო სტაბილურია მოთხოვნა ლომბარდებში, რომლებიც ოქროს იბარებენ.
„ისეთ ლომბარდებზე, სადაც ძირითადად ოქროს იბარებენ, ყოველთვის სტაბილური მოთხოვნაა, ყველა მათგანს საკუთარი მომხმარებელი ჰყავს და ხშირადაც მოგვმართავენ, როცა ფული ჭირდებათ. შემოაქვთ, დაწესებულ პროცენტს იხდიან და თანდათან ფარავენ თანხას. თუმცა, უნდა ითქვას, რომ ბოლო დროს ოქროს ნაკლებად აბარებენ“, - ამბობენ კიდევ ერთი ლომბარდის თანამშრომლები.
ცენტრალური რკინიგზის სადგურის მიმდებარე ტერიტორიაზე ბევრი ლომბარდი აღარ ფუნქციონირებს, მათ უმეტესობას მხოლოდ აბრაზე აწერია „ლომბარდი“ და მათი უმეტესობა ტექნიკის ყიდვა-გაყიდვის ან ვალუტის გადამცვლელ პუნქტებადაა გადაკეთებული. ამის მიზეზად კი იმ გადასახადებს ასახელებენ, რომლის გადახდაც მფლობელებს არ უღირთ.
„პანდემია კი მიდის, მაგრამ არაფერი ცვლილება არაა, ჩვეულებრივად, მიმართვიანობა რაც იყო, ისევ ისეა. არ არის კარგი მუშაობა, ხშირად არ შემოდის ხალხი. მარტო ჩემთან არა, ამ ქუჩის ჩაყოლებაზე თითქმის ყველგან ასეა. ბევრს აღარც უღირდა მუშაობა იმ გადასახადის ფასად, რასაც ლომბარდებს უწესებენ, ამ მიზეზით და მოთხოვნის ნაკლებობის გამო ბევრმა უკვე დიდი ხანია დაკეტა ლომბარდები“, - ამბობენ სადგურის მოედანზე ერთ-ერთ ლომბარდში.
ცნობისთვის, საქართველოს სტატისტიკის ეროვნული სამსახურის 2020 წლის კვლევით, საქართველოში სალომბარდო საქმიანობით დაკავებული იყო 193 მოქმედი ორგანიზაცია. აქედან, 46.1% - თბილისში, 14.5% - სამეგრელო-ზემო სვანეთში, 14% - იმერეთში, 12.4% - აჭარაში, დანარჩენი 13% კი იმერეთში მდებარეობდა.
ლომბარდების საბალანსო მოგება 2020 წლისთვის 18.4 მლნ ლარი, ხოლო გაცემული სესხების მოცულობა 322.8 მლნ ლარი იყო.
აღსანიშნავია, რომ 3 წლის წინ, 2017 წლისთვის ქვეყანაში 77.9%-ით მეტი, 875 ლომბარდი ფუნქციონირებდა.
ლომბარდები
