„მე ვფიქრობ რომ ამას ლეგიტიმური საფუძველი არ აქვს, ამას უფრო მეტი საფუძველი აქვს იმ მახინჯ მოდელში, რაც ჩვენ თვითმართველობაში გაგვაჩნია, თვითმართველობის უფლება-მოსილება ძალიან შევიწროებულია“ - ასე გამოეხმაურა BGM TV - ის გადაცემაში „საქმის კურსი“ მუნიციპალიტეტებში სანებართვო მოსაკრებლის შესაძლო გაზრდას იურისტი კობა ყალიჩავა. მისი თქმით იმ შემთხვევაში თუ სანებართვო მოსაკრებელზე ფასის გაზრდით რომელიმე სხვა ხარჯი ჩანაცვლდებოდა ეს გადაწყვეტილება მისაღები იქნებოდა, მან ასევე აღნიშნა რომ მსგავსი ტიპის ცვლილებებს სჭირდება განმარტებითი ბარათი და რეგულირების ანგარიში იმაზე თუ რატომ ვაკეთებთ ამ ცვლილებებს.
„მე ვფიქრობ, რომ ამის დაწესება შეიძლება ოღონდ დამატებითი ბენეფიტის სანაცვლოდ. მაგალითად ნებართვის გაცემის დროს მერია პასუხისმგებლობას იხსნის კონსტრუქციულ ნაწილზე, მერია კი არ ამოწმებს, მერია ითანხმებს და ექსპერტი ამოწმებს. ანუ ნებართვის მაძიებელს აქვს, 1. პროექტირების ხარჯი, 2. ექსპერტიზის ხარჯი და 3. სანებართვო მოსაკრებლის ხარჯი, აი სანებართვო მოსაკრებლის ხარჯი თუ ჩაანაცვლებდა ამ შემთხვევაში ექსპერტიზის ხარჯს, მაშინ მისაღები იქნებოდა.
მსგავსი ტიპის ცვლილებებს სჭირდება განმარტება და რეგულირების ზემოქმედების ანგარიში სოციალურ გარემოზე, ბიზნეს გარემოზე და ა.შ. მე ვფიქრობ, რომ ამას ლეგიტიმური საფუძველი არ აქვს, ამას უფრო მეტი საფუძველი აქვს იმ მახინჯ მოდელში, რაც ჩვენ თვითმართველობაში გაგვაჩნია, თვითმართველობის უფლება-მოსილება ძალიან შევიწროებულია. თვითმართველობას უნდა, რომ ჰქონდეს შემოსავალი, მაგრამ მას არ აქვს დელეგირებული ბევრი ფუნქცია, რაშიც მოსაკრებელს მოითხოვდა, აქედან გამომდინარე მიზანი, არა რაღაცის გაუმჯობესება, არამედ მეტი შემოსავლის მიღებაა ბიუჯეტში. თუმცა არ შეიძლება, რომ ეს შემოსავალი გახდეს მოსაკრებლის გაზრდის მიზეზი.
მე ვფიქრობ, რომ ჩვენ მუდმივად გარდამავალ პერიოდში ვართ, ვერ ჩამოყალიბდა სტაბილური და უსაფრთხო-სამართლებრივი გარემო, სადაც ყველას ექნება სტაბილური მოლოდინები და ამ გაურკვევლობებს არ ექნება ადგილი“, - აღნიშნა კობა ყალიჩავამ.
ადგილობრივი მოსაკრებლის შესახებ კანონში შესატანი ცვლილებების თანახმად შესაძლოა, რომ მუნიციპალიტეტებში სანებართვო მოსაკრებელი გაიზარდოს,. საკითხზე რეგიონული პოლიტიკის და თვითმართველობის კომიტეტის სხდომაზე იმსჯელეს და მხარი დაუჭირეს. დღეის მდგომარეობით მოსაკრებელი მშენებლობის ნებართვისთვის ახალი ასაშენებელი ობიექტის პროექტით გათვალისწინებული განაშენიანების ინტენსივობის კოეფიციენტის საანგარიშო ფართობის თითოეული კვადრატული მეტრისათვის 4 ლარს არ უნდა აღემატებოდეს, ხოლო საკურორტო ზონაში კი სამრეწველო ობიექტის მშენებლობისათვის 5 ლარს. წარმოდგენილი კანონპროექტით კი ტარიფი 4 დან 10 ლარამდე, ხოლო საკურორტო ზონისთვის 5-დან 11 ლარამდე იზრდება, მოსაკრებლის ოდენობის გაზრდა არ ეხება ინდივიდუალურ საცხოვრებელი სახლების მშენებლობას , რა დროსაც მოსაკრებლის ოდენობა ისევ დარჩება არაუმეტეს 4 ლარის ოდენობისა.
იმისათვის,რომ მოსაკრებლის გადამხდელისთვის ეს ზრდა დაუგეგმავი ფინანსური ხარჯი არ იყოს, ზრდა გათვალისწინებულია ეტაპობრივად. კერძოდ, 2023 წლის პირველი იანვრიდან ის გაიზრდება 6 ლარამდე, 2024 წლის პირველი იანვრიდან 8 ლარამდე და 2025 წლის პირველი იანვრიდან 10 ლარამდე,. რაც შეეხება საკურორტო ზონაში, სამრეწველო ობიექტების მშენებლობისათვის მოსაკრებელს, მისი საფასური 2023 წლის იანვირდან არსებული ხუთი ლარის ნაცვლად 7 ლარამდე გაიზრდება, 2024 წლის პირველი იანვრიდან 9 ლარამდე, ხოლო 2025 წლის პირველი იანვრიდან 11 ლარამდე, ანუ კანონპროექტით გათვალისწინებულ მაქსიმუმამდე გაიზრდება.