„დღეს მედიცინაში არის ისეთი ფორსმაჟორი,როგორიც ბოლო 30 წელია არ ყოფილა,პარალელურ რეჟიმში მიმდინარეობს ბევრი ცვლილება და გადავედით დაფინანსების DRG მოდელზე“ - ამის შესახებ, რადიო „კომერსანტის“ გადაცემაში, „ბიზნესი და სამართალი ნინო ლიპარტიასთან ერთად“ კლინიკა „პინეოს“ კლინიკურმა დირექტორმა დავით ლოლაძემ მედიცინის მენეჯმენტში და სამედიცინო სექტორში არსებულ გამოწვევებზე კომენტირებისას ისაუბრა.
მისი თქმით, ცვლილებები ლიცენზირების და კლინიკების სანებართვო ტიპების მიმართულებით ერთდროულად ხდება, რაც კლინიკისთვის და ადმინისტრაციული რესურსებისთვის საკმაოდ დიდი ზეწოლაა.
„დღეს არ მეგულება საქართველოში კლინიკა, რომელსაც ადმინისტრაციული რესურსების ფუფუნება აქვს, ჩვენთან 10-20 საქმეს შეიძლება რამდენიმე ადამიანი აკეთებდეს და ამ პირობებში სიახლეების შემოტანა და „დედლაინად“ რამდენიმე თვის დაწესება არ არის საკმარისი დრო და ყველაფერი გვიბიძგებს იმისკენ, რომ ყოველდღიურ საკითხებს ყურადღება უნდა მოვაკლოთ, რაც შემდეგ პაციენტის მდგომარეობაზე ისახება, - აღნიშნა დავით ლოლაძემ.
DRG დაფინანსება გულისხმობს იმას, რომ მსგავსი დიაგნოზები დაჯგუფებულია ერთ ჯგუფში და ფინანსდება ერთი პრინციპით, აქ არის გარკვეული ჯგუფები, რომელიც დაფინანსების აღნიშნულ მოდელზე ჯერ არ გადასულა, მათ შორის არის ონკოლოგია , მშობიარობა და მისი შემდგომი მდგომარეობები არის ის მიმართულებები, რომლებიც კვლავ სტანდარტებზე დარჩა.
„რაც შეეხება ჩემ პროფილს, ონკოქირურგიას, რომელიც DRG დაფინანსების ნაწილში დაჯდა და საკმაოდ შრომატევადი და ხარჯიანია, შეიძლება უბრალოდ ვერ გააკეთო ოპერაცია, რადგან ვერ დაფარო ისეთი ტექნიკური აღჭურვილობის ღირებულება, რომელიც ერთჯერადია და ერთი კონკრეტული ოპერაციის დროს გამოიყენება“,- აღნიშნა დავით ლოლაძემ.
ლოლაძემ განმარტა, რომ დოლარის და ევროს კურსის მუდმივი ცვლილების გამო საქართველოში კლინიკებს სხვადასხვა ფასებთან ჭიდილი ყოველდღიურად უწევთ, რადგან მაგალითად ძაფი, რომელიც რამდენიღაც ევრო ღირს შეიძლება, დღეს საქართველოში 25 ლარი, ხვალ კი 50 ლარი ღირდეს, კლინიკა კი ამ ფასს ვერ გაზრდის, რადგან ეს საკითხი დარეგულირებული არ არის.
„დღეს არსებულ რეალობაში საზოგადოების დიდ ნაწილს ჯანმრთელობისთვის თანხა გადადებული არ აქვს, ვისაც კერძო დაზღვევა აქვს, ის უფრო კარგად არის, მაგრამ საყოველთაო დაზღვევის შემთხვევაში სიტყვაზე თუ ადამიანს გაეჭედა თიაქარი ის იძულებულია, რომ ფინანსების მოძიებაზე იზრუნოს, კრიტიკული სიტუაციების დროს, ჩვენ ადამიანები ოპერაციაზე არ მოგვყვებიან, რადგან მათ წინასწარ არ იციან თუ რა ჯდება ოპერაცია, ჩვენ წინასწარ ამის თქმის საშუალება არ გვაქვს და საბოლოო ჯამში ეს პაციენტისთვის არის სიურპრიზი, ამიტომ თუ პაციენტი ვერ ახერხებს თანხის გადახდას, კლინიკა მას ვერ გამოკეტავს და თავისუფლებას უკანონოდ ვერ აღუკვეცავს, შესაბამისად დგება ხელმოწერილი შეთანხმება და რჩება ვალდებულება კლინიკასთან და დღეის მდგომარეობით მნიშვნელოვნად არის გაზრდილი პაციენტების კლინიკის მიმართ დარჩენილი ვალდებულების მაჩვენებელი“, - აღნიშნა დავით ლოლაძემ.
თაკო კვაჭანტირაძე