საქართველოსა და არაბთა გაერთიანებულ საამიროებს შორის თავისუფალი ვაჭრობის რეჟიმის ამოქმედება განიხილება. როგორც პრემიერ-მინისტრი ირაკლი ღარიბაშვილისა და არაბთა გაერთიანებული საამიროების ეკონომიკისა და ვაჭრობის საკითხებში სახელმწიფო მინისტრს აჰმედ ალი ალ საიღის შეხვედის შემდეგ გახდა ცნობილი, თავისუფალი ვაჭრობის შეთანხმებაზე დიალოგი ორ ქვეყანას შორის მიმდინარე თვის ბოლომდე დაიწყება.
რამდენად მნიშვნელოვანია არაბეთის გაერთიანებულ საემიროებთან თავისუფალი ვაჭრობის ხელშეკრულების გაფორმება ქართული ბიზნესისთვის და რა სარგებელს მივიღეთ, ამ თემაზე „კომერსანტთან“ „ექსპორტის განვითარების ასოციაციის“ დირექტორმა გიორგი გუდაბანიძემ ისაუბრა.
„ვაჭრობასთან მიმართებით, მთავრობის უპირველესი ვალდებულებაა, რომ ქვეყანას უნდა ჰქონდეს მაქსიმალურად მეტი თავისუფალი ვაჭრობის ხელშეკრულება განვითარებული მსოფლიოს ქვეყნებთან. ეს არის ჩვენი ეკონომიკური დამოუკიდებლობის უპირველესი და ყველაზე მნივნელოვანი ბერკეტი, რომელსაც შეუძლია საქართველოს მოუტანოს მაქსიმალურად დიდი ეკონომიკური დოვლათი, არ ვიყოთ დამოკიდებული ისეთ არასტაბილურ ბაზრებზე როგორიც რუსეთია და საქართველოს საგარეო ვაჭრობა კარგად განვითარდეს.
რაც შეეხება უშუალოდ არაბთა გაერთიანებულ საემიროებს და ზოგადად გალფის რეგიონის ქვეყნებს, კრიტიკულად მნიშვნელოვანია მათთან თავისუფალი ვაჭრობის ხელშეკრულებების გაფორმება. მიზეზი რამდენიმეა: 1. ჩვენ ლოგისტიკურად ამ ქვეყნებთან ძალიან კარგად ვართ მიბმული, მაგალითად გვაქვს პირდაპირი ფრენები და თითოეული რეისი მხოლოდ 3-4 საათს საჭიროებს, ამას მხოლოდ ტურისტული თვალსაზრისით არ ვგულისხმობ, ტვირთბრუნვის კუთხით განვიხილავ ანუ ფრენა და ახლო მანძილი ნიშნავს, რომ ბევრ პროდუქტს შეუძლია იქ მოხვედრა. 2. აღნიშნული ქვეყნების მოსახლეობა გამოირჩევა მაღალი მსყიდველუნარიანობით ანუ ისინი მზად არიან კონკრეტულ პროდუქტში და ხარისხში გადაიხადონ ბევრი ფული. 3. ეს არის რეგიონი, სადაც ბუნებრივი კლიმატიდან გამომდინარე ადგილზე ვერ ხარობს ხილი და ბოსტნეული, შესაბამისად მათ უწევთ იმპორტირება. თუ საქართველოს მოეხსნება არსებული იმპორტის გადასახადი და რა თქმა უნდა თუ წარმოშობის სერთიფიკატს დაკმაყოფილებს, ეს იქნება ჩვენთვის დამატებითი ბენეფიტი და ძლიერი მხარე კონკურენციის კუთხით. ხელშეკრულების გაფორმების პროცესი საკმაოდ დროში გაწელილი პროცედურაა, თუმცა მნიშვნელოვანია“, — ამბობს გიორგი გურაბანიძე.
გიორგი გურაბანიძე უკვე არსებული თავისუფალი ვაჭრობის ხელშეკრულებებით სარგებლობაზეც საუბრობს და ამბობს, რომ მათი მაქსიმალურად გამოყენებისთვის საჭიროა პოპულარიზაცია გავუწიოთ ამ ბაზრებს, იმ კუთხით რომ ესენი არიან სტაბილური ბაზრები რომლებთანაც შეიძლება გრძელვადიანი სავაჭრო ურთიერთობების დამყარება და ამის შესახებ ბიზნესიც უნდა დარწმუნდეს. მისი თქმით, ასევე საჭიროა ხარისხის ინფრასტრუქტურის განვითარება, რადგან ეს არ არის რუსეთი სადაც ნებისმიერი პროდუქციის გაყიდვის შესაძლებლობაა. ასევე ძალიან დიდი ხარვეზები გვაქვს საწარმოო და ლოგისტიკური მიმართულებით.
აღსანიშნავია, რომ მსოფლიო სავაჭრო ორგანიზაციის (World Trade Organization-WTO) წევრების, მათ შორის საქართველოსთვის საემიროებში სოფლის მეურნეობის პროდუქციის იმპორტი, საშუალოდ 6%-ით იბეგრება. გასული 8 წლის განმავლობაში ქართული ხილის, თხილისა და ბოსტნეულის ექსპორტმა არაბეთის გაერთიანებულ საემიროებში მხოლოდ 3,2 მლნ დოლარი შეადგინა. წლიურმა ექსპორტმა პიკს 2021 წელს, 1,1 მლნ დოლარს მიაღწია, ამ თანხიდან 72% თხილის გულისა და ახალი მოცვის ექსპორტს უკავია. 2022 წლის 7 თვის მონაცემებით KI საქართველო-არაბთა გაერთიანებულ საამიროებს შორის სავაჭრო ბრუნვამ 133.3 მლნ დოლარი შეადგინა, რაც აღემატება როგორც პანდემიური წლების ამავე პერიოდების მაჩვენებელს, ასევე 2019 წლის სავაჭრო ბრუნვას.