16 ნოემბერს ბრიუსელში შედგა ევროკავშირის ქვეყნების საგარეო საქმეთა მინისტრების შეხვედრა, რომელზეც ბელარუსთან მოსაზღვრე ქვეყნებში მიგრაციული კრიზისი განიხილეს.
პირველი, რაზეც მხარეები შეთანხმდნენ ის არის, რომ გაფართოვდება ბელარუსის წინააღმდეგ სანქციების დაწესების კრიტერიუმები. ეს გადაწყვეტილება ევროკავშირს ფიზიკური და იურიდიული პირებისთვის დამატებითი სანქციების დაწესების საშუალებას მისცემს.
შემდეგი ნაბიჯი სირიიდან, იემენიდან და ერაყიდან ევროკავშირის საზღვართან ადამიანების გადაადგილებასთან დაკავშირებულ პირთა წინააღმდეგ ახალი შეზღუდვების შემოღება იქნება.
შავ სიაში სავარაუდოდ მინსკის აეროპორტი, მინსკის სასტუმროები და 20-მდე ბელარუსი მაღალჩინოსანი მოხვდებიან. ევროკომისიის პრეზიდენტის ურსულა ფონ დერ ლიაინენის თქმით, ასევე განიხილება მიგრანტების გადაადგილების ხელშემწყობი მესამე ქვეყნების ავიაკომპანიების წინააღმდეგ სანქციების შემოღების საკითხიც.
მან ასევე მოუწოდა ვლადიმირ პუტინს, მოახდინოს ზეგავლენა ლუკაშენკოზე, რაც რუსეთს და ევროკავშირს შორის ურთიერთობების გაუმჯობესებას ხელს შეუწყობს.
„ჩვენ სწრაფად ვიმოქმედებთ. ეს არაა ლატვიის, ლიეტუვის და პოლონეთის, ეს არის მთელი ევროკავშირის პრობლემა. და ეს არაა მიგრაციული პრობლემა - ესაა ავტორიტარული რეჟიმის პრობლემა, რომელიც ადამიანებს იყენებს იმისთვის, რომ მეზობელ დემოკრატიულ ქვეყნებში დესტაბილიზაცია გამოიწვიოს. მათ ეს არ გამოუვათ“, - განაცხადა ფონ დერ ლიაინენმა.
გერმანიის საგარეო საქმეთა მინისტრმა ჰაიკო მაასმა განაცხადა, რომ მკაცრი სანქციები გარდაუვალია და ეს სპირალი ჯერ ბოლომდე დატრიალებული არაა.
„ლუკაშენკომ შექმნა საზღვარზე მიგრაციული კრიზისი სანქციების მოხსნის მიზნით, თუმცა, ის საწინააღმდეგო შედეგებს მიიღებს. ის, რასაც ჩვენ ვხედავთ მინსკში, არის არაადამიანური სისტემა, რომელიც ლტოლვილებს ევროკავშირზე პოლიტიკური ზეწოლისთვის იყენებს. ბოლო დღეებში სიტუაცია გაუარესდა“, - განაცხადა მინისტრმა.
ლიეტუვის უშიშროების და თავდაცვის კომიტეტის თავმჯდომარემ ლაურინას კასჩიუნასამ განაცხადა, რომ ვილნიუსი სადღეისოდ მუშაობს ჰუმანიტარული დერეფნების შექმნაზე მიგრანტებისთვის, რომლებიც სამშობლოში დაბრუნებას მოისურვებენ.
ბელარუსის პრეზიდენტი ალექსანდრ ლუკაშენკო აცხადებს, რომ ქვეყნის ეროვნული ავიაკომპანია „ბელავია“ მზადაა მიგრანტები თავიანთ ქვეყნებში დააბრუნოს, თუმცა, ამას თავად ლტოლვილები ეწინააღმდეგებიან.
მან ასევე ევროკავშირს რამდენიმე ათასი ლტოლვილის მიღება ურჩია. პოლონეთის პრემიერ-მინისტრმა მათეუშ მორავეცკიმ განაცხადა, რომ მოკავშირე ქვეყნებთან - ლიეტუვასთან და ლატვიასთან ერთად - ნატო-ს წესდების მე-4 პუნქტის ამოქმედებაზე მსჯელობენ.
ეს პუნქტი ალიანსის საბჭოს შეკრებას გულისხმობს იმ შემთხვევაში, თუ მისი რომელიმე ქვეყნის უსაფრთხოებას საშიშროება ემუქრება.
„როგორც ჩანს, ეს სულ უფრო და უფრო აუცილებელი ხდება. უკვე არაა საკმარისი უბრალოდ სიტყვიერო მხარდაჭერის გამოხატვა. ამჯერად უკვე აუცილებელია ნატო-ს მხრიდან ქმედებები“, - განაცხადა მორავეცკიმ.
ნატო-ს გენერალურმა მდივანმა იენს სტოლტენბეგრმა განაცხადა, რომ ალიანსი პოლონეთთან, და ბალტიის ქვეყნებთან კონსულტაციებს ატარებს იმისთვის, რომ საზღვარზე ვითარების ესკალაცია არ დაუშვას.
პარალელურად მიგრაციული პრობლემის გადაწყვეტა სხვა კუთხით დაიწყო - მაგალითად, თურქული ავიაკომპანია Turkish Airlines თავის თვითმფრინავებში, რომლებიც ბელარუსში მიემგზავრებიან, ერაყის, სირიის და იემენის მოქალაქეებს არ შეუშვებს.
ანალოგიური გადაწყვეტილება ირანულმა ავიაკომპანიებმაც მიიღეს.
ასევე ერაყის ავიაკომპანიამ განაცხადა, რომ ბელარუსის მიმართულებაზე ფრენებს აჩერებს.
ბელარუსული სახელმწიფო ავიაკომპანია „ბელავია“ თავის კავშირს მიგრაციულ კრიზისთან უარყოფს - მისი ინფორმაციით, ბილეთებს ჯავშნიდნენ კონკრეტული ტუროპერატორები, რასთანაც ავიაკომპანიას არანაირი კავშირი არა აქვს.
მიგრაცია
