თუ საქართველოში მიგრანტების მესამე ტალღა შემოვა ქვეყანაში, ფასების საერთო ზრდა გარდაუვალია, მიიჩნევს Galt & Taggart-ის ეკონომისტი ლაშა ქავთარაძე. ქავთარაძემ bm tv-ს ეთერში მიმდინარე ეკონომიკური მოვლენების შეფასებისას განაცხადა, რომ 2023 წლის ეკონომიკური ზრდის პროგნოზი 5%-ის ფარგლებშია და ეს იმას ნიშნავს, რომ ფაქტობრივად ის უბრუნდება თავის დონეს. თუმცა, მისი აზრით, მიგრაციის ახალი ტალღის შემთხვევაში მოხმარებაზე ზეწოლა ისევ გაიზრდება და დამატებით, ფასების დონის აწევას გამოიწვევს.

„როდესაც საჯაროს არის საუბარი რომ ეკონომიკა გადახურებულია, ეს ბევრს ღიმილსაც კი გვრის. მაგრამ ეკონომიკაში არის ასეთი ნიშნები, რომლითაც ვაფასებთ და რომელიც შეიძლება გარკვეული სხვა რისკის რეალიზების შემთხვევაში იყოს შემდგომ პრობლემა და ამან გამოიწვიოს სამუშაო ადგილების დაკარგვა და ასე შემდეგ.

რასაც სებ უყურებს, აფასებს და ამბობს, რომ ეკონომიკა გადახურების ფაზაში იმყოფება. ეს არის ფაქტობრივი ეკონომიკური ზრდა თუ როგორ არის გადახრილი პოტენციური დონისაგან. პოტენციური დონეში ანუ ის სამუშაო ძალა რაც არის, კაპიტალი რაც არის და ტექნოლოგიები ამასთან შედარებით. ვიცით, რომ 10,2%-იანი ზრდა გვაქვს 9 თვეში, ჩვენი პოტენციური დონით 5%-ის ფარგლებშია და ეს გადახრა საფუძველს აძლევს იმას, რომ ვთქვათ გარკვეული ნიშნები არის.

თუ შევხედავთ შემდგომი წლის ეკონომიკური ზრდის პროგნოზებს 4-დან 5%-ის ფარგლებშია. ეს იმას ნიშნავს, რომ ფაქტობრივად ის უბრუნდება თავის დონეს. მაგრამ ჩვენ თუ გვექნება მიგრანტების მესამე ტალღა, რომელიც აქსელერაციას გაუკეთებს მოთხოვნას და ის მიგრანტები რაც გვყავს კვლავ გააგრძელებენ გარკვეული ტიპის ხარჯვას, ისევ ზეწოლა იქნება მოხმარებაზე და კვლავ შეიძლება იყოს გადახრილი ფაქტობრივი ეკონომიკური ზრდა პოტენციურისგან და ეს გამოიწვევს დამატებით ზეწოლას ფასების დონეზე და კიდევ უფრო ოპტიმისტურად შეიძლება იყვნენ ადამიანები განწყობილი უძრავი ქონების ბაზარზე, ფასები კიდევ უფრო გააგრძელებს ზრდის ტემპს ბინებზე, ასევე ქირაც შესაძლოა არ შენელდეს. ახლა რაც გვაქვს ფასების ზრდა 70%-იანი არ არის სტაბილური ხომ? როგორ შეიძლება ასეთი ზრდის ტემპი იყოს ერთ წელიწადში. ეს გარკვეულ საფრთხეებს ქმნის, როგორც უძრავ ქონებაში ასევე სხვა მხრივ ფასების საერთო დონე შესაძლოა გაიზარდოს და სებ-ს მონეტარული პოლიტიკის კიდევ უფრო გამკაცრება მოუწიოს, რას მივიღებთ ამის შემდეგ? მივიღებთ იმას, რომ ამ რისკების რეალიზების შემდგომ გვექნება ეკონომიკური ზრდის უფრო მაღალი ეკონომიკური ვარდნა“, - განაცხადა ეკონომისტმა.