რაში ეთანხმება და რაში არ ეთანხმება „ჯანდაცვის ასოციაცია“ ჯანდაცვის მინისტრს? როგორც „კომერსანტთან საუბრისას ასოციაციის ხელმძღვანელმა ნინო კიკნაძემ განაცხადა, არის საკითხები რაშიც მინისტრს ეთანხმება, თუმცა არის თემები რაშიც განსხვავებული ხედვა აქვს.
„მე ვეთანხმები იმაში, რომ აუცილებელია არსებობდეს გამართული სანებართვო პირობები, მსგავსად აკრედიტაციისა. აკრედიტაცია მსოფლიოში სავალდებულო არ არის, უბრალოდ მოსახლეობის თვითშეგნება იმდენად მაღალია, რომ ის მიდის აკრედიტებულ სამედიცინო დაწესებულებაში სერვისის მისაღებად და არა იმ დაწესებულებაში ვისაც აკრედიტაცია არ აქვს. თვითონ სამედიცინო დაწესებულებების ინტერესია, რომ მიიღონ აკრედიტაცია.
რა თქმა უნდა არ ვეთანხმები იმაში, რომ მოგებაზე ორიენტირებული არ უნდა იყოს ბიზნესი. ბიზნესი უნდა იყოს მოგებაზე ორიენტირებული. ძირითადად ბევრი დაწესებულება ამ მოგების განვითარებაში აბრუნებს. არსებული ტარიფებით მუშაობა რთულია და შესაბამისად მოგებაც შემცირებულია, ბოლო 2 წლის განმავლობაში. რომ ამბობენ კოვიდის დროს კლინიკები გამდიდრდნენო, შეიძლება რომელიმე მართლაც გამდიდრდა და კარგი იქნება თუ ზუსტად იტყვიან რა იგულისხმება, აცხადებს ნინო კიკნაძე.
„ჯანდაცვის ასოციაციის“ ხელმძღვანელის ამბობს, რომ ბაზრის 85%-ი დღეს კერძო სამართლის იურიდიულ სამედიცინო დაწესებულებებზე მოდის და შესაბამისად მისი მიზანი არის მოგების მიღება.
„მოგების მიღების გარეშე რა საკვირველია მათ არ აქვთ ინტერესი, რომ იფუნქციონირონ და არც უნდა იფუნქციონირონ. დაახლოებით 3-დან 5%-მდეა თითოეული ამ სამედიცინო დაწესებულებების წლიური მოგება. 2020 წელს კოვიდის დროს პირიქით ბევრად შემცირებულია - შეუძლია ნებისმიერმა ადამიანმა ნახოს, ინფორმაცია ღიაა. არაფერი გასაოცარი იმაში არ არის, რომ სამედიცინო დაწესებულებები, რომელიც კერძო სამართლის იურიდიული პირია მოგებს იღებენ. ეს ასეც უნდა იყოს. საქველმოქმედო დანიშნულება მათ ვერ ექნებათ.
რაც შეეხება საწოლ ფონდს, დიახ, ეს რასაკვირველია ასეა. დატვირთულობა ხშირ შემთხვევაში 50%-ზე მეტი არ არის. სწორედ ამიტომ აუცილებელია არსებობდეს მსგავსი სელექტიური კონტრაქტირები და ის დაწესებულებები, რომელიც ე.წ. სადარბაზოების ტიპის ადგილებში გაიხსნა იმისათვის, რომ რაღაცა შემოსავალი მიიღონ და არანაირ სტანდარტს არ აკმაყოფილებენ რა საკვირველია უნდა დაიხუროს. ამდენი სამედიცინო დაწესებულებების არსებობა არ არის აუცილებელი. შესაბამისად შემდეგ უფრო დაიტვირთება ის დანარჩენი კლინიკები, ვისაც აკმაყოფილებს სანებართვო მოთხოვნებს და პირობებს და აქვთ გამართული ინფრასტრუქტურა და ჰყავთ შესაბამისი სპეციალისტები, აცხადებს ნინო კიკნაძე.
„სახელმწიფო პროგრამების ფარგლებში, 2020 წელს კლინიკების საოპერაციო მოგებამ 400 მილიონი ლარი, ხოლო 2021-ში 600 მილიონ ლარზე მეტი შეადგინა“- ეს განცხადება ჯანდაცვის მინისტრს ეკუთვნის. ზურაბ აზარაშვილის განმარტებით, „ქვეყანაში გვაქვს გაცილებით მეტი კლინიკა და საწოლფონდი, ვიდრე დღესაა საჭირო“.
„სექტორის საოპერაციო მოგება რომ ნახოთ, 2020 წელს, 400 მილიონ ლარამდე იყო, 2021 წელს კი - 600 მილიონზე მეტი. ანუ განცხადებები, რომ, თითქოს, ტარიფები და სერვისები ზარალის მომტანია და ზოგიერთ კლინიკას, შემოსავლებიდან გამომდინარე, დახურვა მოუწევს, ვფიქრობ, ცოტა ნაადრევია. გვაქვს კონკრეტულად გაცხადებული ვადები, როდიდან დავნერგავთ DRG-ის ის სამართლიან სისტემას, რომელიც საპილოტედაა გაშვებული და სექტემბრიდან, ეტაპობრივად, ყველა კლინიკაში „ჩავუშვებთ“. ეს იქნება ობიექტურად გამოთვლილი ტარიფები და ყოველგვარი ადამიანური ჩარევის გარეშე მოხდება ანაზღაურება სახელმწიფოს მხრიდან,“ - აღნიშნა მინისტრმა.
ზურაბ აზარაშვილის განმარტებით, იმ ანაზღაურების საფუძველზე, რასაც სახელმწიფო ბიუჯეტიდან იხდის, მოქალაქეებმა, სამედიცინო დაწესებულებებში, შესაბამისი ხარისხის სერვისი უნდა მიიღონ.
„ჩვენ გვინდა, რომ იმ ანაზღაურების საფუძველზე, რასაც სახელმწიფო ბიუჯეტიდან იხდის, იყოს შესაბამისი სერვისი და ხარისხი, რადგან ეს პირდაპირ დაკავშირებულია ადამიანის სიცოცხლესთან. აქედან გამომდინარე, ტარიფი, რაც იქნება სამართლიანი და მომსახურების სტანდარტი, რასაც ჩვენ ვითხოვთ, ქვეყანაში დატოვებს მაღალი ხარისხის კლინიკებს. ბიუჯეტიდან ანაზღაურებაც იქნება იმის მიხედვით, რასაც მოვთხოვთ და რასაც სამედიცინო დაწესებულებები დააკმაყოფილებენ“, - განაცხადა ზურაბ აზარაშვილმა.
ინფორმაციისთვის, რამდენიმე დღის წინ ჯანდაცვის ასოციაციის წევრმა 100-მა კლინიკამ ზურაბ აზარაშვილს ღია წერილით მიმართა. წერილში საუბარია ტარიფების ინდექსაციის საკითხზე, რასაც, ხელმომწერების განცხადებით, კლინიკების ფინანსური მდგრადობა და წარმატებული ფუნქციონირება ემყარება. წერილის ავტორები ამბობენ, რომ თუ ტარიფების ინდექსაცია არ მოხდება, ეს კლინიკებისთვის დიდი ფინანსური დარტყმა იქნება.
ნინი კიკნაძე
