დღეს დარგობრივი ეკონომიკისა და ეკონომიკური პოლიტიკის კომიტეტის სხდომაზე მომავალი წლის ბიუჯეტის პროექტს განიხილავენ. დეპუტატი, ლევან კობერიძე ბიუჯეტის პროექტის იმ ნაწილს აკრიტიკებს, რომლის მიხედვითაც ანაკლიის პორტის პროექტისთვის მომავალი წლის ბიუჯეტის პროექტში მხოლოდ 1,5 მლნ ლარია გათვალისიწნებული.
„აღარ თვლით რომ ანაკლიის პროექტი ეკონომიკისთვის და ქვეყნის განვითარებისთვის მნიშვნელოვანია? რატომ არ არის ის ბიუჯეტში ასახული? ანაკლია არის პროექტი, რომელმაც უნდა შექმნას მიზიდულობის ცენტრი და უნდა იქცეს ქვეყნის მთავარ ლოკომოტივად! ბიუჯეტის პროექტში ანაკლიის პორტი გათვალისწინებული არ არის, რაც ნიშნავს, რომ მთავრობა მას ქვეყნის ეკონომიკისთვის მნიშვნელოვან პროექტად აღარ მიიჩნევს“, — ამბობს კობერიძე.
„ლელოს” ერთ-ერთი ლიდერი ლევან კობერიძე მიიჩნევს, რომ მთავრობის მიერ ანაკლიის თემა უგულებელყოფილია, რაც იმით გამოიხატება, რომ ხელისუფლება ამ მიმართულებით ინვესტორებთან მოლაპარაკებას არ აწარმოებს.
„ბიუჯეტში ანაკლიის პორტზე მხოლოდ 1.5 მლ ნ. ლარია გათვლილი, რომელსაც რა მიმართულებით, დახარჯავენ უცნობია. სხდომაზე მთავრობას ჰქონდა შანსი ბიუჯეტის განხილვა არ ყოფილიყო მხოლოდ კონკრეტულ ციფრებსა და საბიუჯეტო პარამეტრებზე ხაზგასმა. რადგან კარგი იქნებოდა, კრიზისი, რომელშიც ვართ, გვემსჯელა და ამის ინიციატივა თავად გამოეჩინათ, რადგან ოპოზიციის ინიციატივებს არ იღებენ ყურად. ამ მსჯელობით ერთად ვნახავდით გამოსავალს, თუნდაც ისეთ მნიშვნელოვან პროექტზე, როგორიც ანაკლიაა და რომელიც ათასობით სამუშაო ადგილს შექმნიდა ქვეყნაში. თუმცა, მათი განცხადებებით და ბიუჯეტით ნათლად დავინახეთ, რომ ანაკლიის პროექტის განხორციელებას მთავრობა არ აპირებს, ამ დროს კი ინვესტორებთანაც არ აწარმოებენ მოლაპარაკებას.
იმით, რომ სახელმწიფოს არ აქვს ანაკლიასთან დაკავშირებული ხედვა ანაკლიაზე, იმედს უკლავს როგორც სამეგრელოს მთლიან მხარეს ასევე აფხაზებს, რომლებიც ელოდებოდნენ და კითხულობდნენ რა გზით შეეძლოთ გადმოსვლა სამუშაოდ, რაც გარკვეული ხიდი იქნებოდა ჩვენს შორის. ხელისუფლება მოსახლეობას სთავაზობს სიღარიბის პოლიტიკას და არა განვითარებასა და წინსვლას,” - აცხადებს კობერიძე.
„ანაკლიის პორტის მშენებლობა ბიუჯეტში ვერ იქნება გათვალისწინებული, რადგან ამ ეტაპზე ანაკლიის მშენებლობა ბიუჯეტიდან არ იგეგმება. ანაკლიის მშენებლობა უნდა მოხდეს კერძო ინვესტორის მიერ. თუ კერძო ინვესტორთან შეთანხმების ფარგლებში მოხდება ისე, რომ სახელმწიფო რაიმე წილით უნდა შევიდეს, ან რაიმე გააკეთოს ამ პროექტში, ეს იმ შეთანხმების მერე, კონკრეტულად, კონკრეტული წლის ბიუჯეტში უნდა გაიწეროს“,- ასე პასუხობს ფინანსთა მინისტრის მოადგილე, გიორგი კაკაურიძე პარლამენტში, ლევან კობერიძემ კრიტიკას.