ჩვენი მხრიდან საკითხი დღემდე ღიაა ინვესტორებისთვის და მზად ვართ დაინტერესებულ პირებს მიწა გადავცეთ უსასყიდლოდ, რათა იქ მიწისქვეშა საპარკინგე სივრცეები მოაწყონ, - განუცხადეს „კომერსანტს“ თბილისის მერიაში მიწისქვეშა პარკინგების მოწყობის პროგრამასთან დაკავშირებით, რომლის ფარგლებშიც ინტერესთა გამოხატვა რამდენჯერმე გამოცხადდა, თუმცა ამაოდ.
ისევ განიხილავს თუ არა მერია მიწისქვეშა პარკინგების პროექტს და ზოგადად რა გეგმები მუშავდება მერიაში, იმისათვის, რომ პარკინგის პრობლემა დედაქალაქში მოწესრიგდეს?
როგორც მერიაში აცხადებენ, კახა კალაძის მერად არჩევის შემდეგ დედაქალაქში 10 ყველაზე დატვირთული ადგილის გამოყოფა მოხდა, სადაც პარკირებაზე მოთხოვნა დიდი იყო, თუმცა მიწისქვეშა პარკინგების მშენებლობით კერძო სექტორის დაინტერესება ვერ მოხერხდა.
„ზოგადად, პარკირება კერძო ავტომობილით გადაადგილების წახალისებაა. მსოფლიოს ძალიან ბევრ ქალაქში აპრობირებული მეთოდია, რომ ნაკადების მართვისთვის მოხდეს პარკირების ზონების არათუ დამატება, არამედ შეზღუდვა. ფასიანი საათობრივი პარკირებაც ამისკენ გადადგმული ერთ-ერთი ნაბიჯია.
კახა კალაძის მერად არჩევისთანავე, ჩვენ გამოვყავით ათი ყველაზე დატვირთული ადგილი, სადაც მობილობა და პარკინგზე მოთხოვნა მაღალი იყო. თუმცა საქართველოში იმდენად დაბალი არის პარკირების საფასური, რომ არცერთი კერძო სექტორი არ დაინტერესდა“, - განმარტავენ დედაქალაქის მერიაში.
როგორც „კომერსანტს“ თბილისის მთავრობაში განუცხადეს, მუნიციპალიტეტს გააჩნია თავისი პრიორიტეტები და მათთვის მნიშვნელოვან პრიორიტეტად რჩება ასევე ქვეითი, ეკომეგობრული ტრანსპორტი, საზოგადოებრივი ტრანსპორტი, ტვირთის გადაზიდვა და ბოლოს კერძო ავტომობილები.
„სამწუხაროდ, ქალაქში ძალიან ბევრი ადგილია, სადაც ტროტუარი ფიზიკურად არ არის და უსაფრთხოდ გადაადგილება შეუძლებელია. აქედან გამომდინარე, მუნიციპალიტეტს მიზანშეწონილად მიაჩნია, რომ განავითაროს ის ინფრასტრუქტურა, რაც ამ პრიორიტეტებისთვის არის საჭირო. ხოლო კერძო სექტორი თუ დაინტერესდება საპარკინგე არეალებით, ჩვენ ამისთვის მზადყოფნას გამოვთქვამთ“, - აცხადებენ მერიაში.
აღსანიშნავია, რომ გასულ წელს თბილისის მერმა ფილარმონიის წინ მიწისქვეშა პარკინგის მშენებლობის შესაძლებლობაზე გააკეთა განცხადება, თუმცა მიმდინარე ტერიტორია უკვე რეაბილიტირებულია და აღნიშნულ ტერიტორიაზე მიწისქვეშ პარკინგი არ მოწყობილა.
როგორც „კომერსანტს“ თბილისის მერიაში განუცხადეს, ვერც აღნიშნულ პროექტზე მოხერხდა ინვესტორის დაინტერესება.