„საბანკო სექტორში მძაფრი კონკურენციაა, რაც ართულებს ახალი მოთამაშის შემოსვლას. რთულია ამ პირობებში კონკურენციის გაწევა, თუმცა ჩვენ მივესალმებით და ვახალისებთ საბანკო კონკურენციას. ბაზარზე არსებული საბანკო სექტორის კაპიტალის 85% არის უცხოური და არიან როგორც გერმანული, ისე თურქული, აზერბაიჯანული და ყაზახური ბანკები“, — ასე უპასუხა სებ-ის ვიცე პრეზიდენტმა პაპუნა ლეჟავამ, საქართველოს ეროვნული ბანკის 2021 წლის ანგარიშის საკომიტეტო მოსმენაზე დეპუტატ სანდრო რაქვიაშვილის კითხვას, თუ რატომ არ შემოდიან საქართველოში უცხოური ბანკები.
დეპუტატმა ალექსანდრე რაქვიაშვილმა აღნიშნა, რომ საქართველოში მოქმედმა კომერციულმა ბანკებმა 2021-2020 წლები მოგებით დაასრულეს, რამაც ქართული საფინანსო ბაზარი უცხოური ბანკებისთვის საინტერესო უნდა გახადოს.
„რა ხდება, არცერთი მსხვილი უცხოური ბანკი ჩვენს ბაზარზე რომ არ შემოდის? არა მხოლოდ გასულ წელს, არამედ 2020 წელი ბანკებმა მოგებით დაასრულეს, მაშინ როდესაც სრული კატასტროფა ხდებოდა და დაინგრა ქვეყანა. წელს, როგორც ჩანს, ამ რეკორდსაც მოხსნიან, კარგად მიდიან და რა ხდება, რომ არცერთი მსხვილი უცხოური ბანკი არ შემოდის ჩვენს ბაზარზე? არავის ვაინტერესებთ? კომერციულ ბანკებს მსოფლიოში არ აინტერესებთ ასეთი მომგებიანი ბიზნესი? ხომ არ ფიქრობთ, რომ ეს ეროვნული ბანკის და საბანკო სფეროში სხვადასხვა მოთამაშის გარიგების და ინტერესთა დამთხვევის შედეგი იყოს ეს?“, - აღნიშნა რაქვიაშვილმა.