სებ-ის ყოფილი პრეზიდენტის კითხვები მოქმედ პრეზიდენტს. „ნაციონალური მოძრაობის“ წარმომადგენელი რომან გოცირიძე დაინტერესდა რატომ არის საქართველოში ინფლაცია 14% და სომხეთში 7%? “სომხეთში ნავთობს არ მოიხმარენ თუ პურს არ ჭამენ?“.

როგორც გოცირიძემ აღნიშნა, როდესაც ინფლაცია 5-ჯერ აღემატება მიზნობრივ 3%-ს და გარკვეული პერიოდით, 14%-საც მიაღწია, ეს ნიშნავს იმას, რომ სებ-მა ვერ მიაღწია თავის ფუნქციას, რომელიც მას აქვს განსაზღვრული.

“ლარის არასტაბილურობა და რყევები დიდ ზიანს აყენებდა ბიზნესს და მოქალაქეებს. სებ-ი არ მოგვევლინა ქვეყანაში მაკროეკონომიკური სტაბილურობის გარანტად. ცალსახად უარყოფითად უნდა შეფასდეს მისი საქმიანობა თუ გავითვალისწინებთ იმასაც, რომ მიმდინარე წლის განმავლობაშიც იგივე გრძელდება.

ორნიშნა ინფლაცია - შარშან და ორნიშნა ინფლაცია - წელს, ნიშნავს იმას, რომ ჯამურად 20-25%-ით გაიზარდა ფასები ამ ორ წელიწადში და იმ პროდუქტების ფასები, რომელსაც მოსახლეობაზე უდიდესი გავლენა აქვს, ესაა სურსათი და მედიკამენტები, მათზე ფასების ზრდა იქნება კიდევ უფრო მეტი.

შედეგად, მივექანებით სიღარიბისკენ, რისი მთავარი არქიტექტორებიც მთავრობის ფისკალური და სებ-ის მონეტარული პოლიტიკაა.

რატომ არის ინფლაცია ჩვენთან 14% და სომხეთში 7%? სომხეთში ნავთობს არ მოიხმარენ თუ პურს არ ჭამენ? ყველაფერმა რაც სომხეთში შედის, ჩვენი ტერიტორია უნდა გაიაროს და გზის ხარჯები დაემატოს. როგორც ჩანს, იქ უკეთესი მონეტარული პოლიტიკაა, ვიდრე - ჩვენთან“, - განაცხადა რომან გოცირიძემ და აღნიშნა, რომ ინფლაციის მთავარი წყარო არის მთავრობისა და სებ-ის შეცდომები, თუმცა საგარეო ფაქტორებიც მოქმედებს.

როგორც ინფლაციასთან დაკავშირებით, სებ-ის პრეზიდენტმა დეპუტატების კითხვების პასუხად განაცხადა, არსებული პროგნოზების მიხედვით, ინფლაცია მიზნობრივ მაჩვენებელს სავარაუდოდ 2023 წლის მეოთხე კვარტლიდან დაუბრუნდება. 

„ჩვენ ვაკეთებთ პროგნოზებს იმ სიტუაციებიდან გამომდინარე რაც გაქვს და ცვლილელები რა თქმა უნდა  მოხდა. თუ ჩვენ ომამდე ვარაუდობდით, რომ მეორე კვარტლიდან ერთნიშნა ინფლაცია გვექნებოდა და შემდგომ უკვე მესამე-მეოთხე კვარტალში მიზნობრივს დავუბრუნდებით, ეს სამწუხაროდ შეცვალა რუსეთის შეჭრამ უკრაინაში. 

საკმაოდ მაღალი მოთხოვნაა, საკრედიტო აქტივობა არის საკმაოდ მაღალი და არ არის გამორიცხული, რომ ამანაც შექმნას გარკვეული დაწოლა ინფლაციაზე. 

დღეს რასაც ვარაუდობთ იმ პროგნოზების მიხედვით, წლის ბოლომდე დაახლოებით უნდა გვქონდეს 9%-იანი წლიური ინფლაცია, საშუალო ალბად 10%-იანი. ინფლაციის შემცირება უფრო ნელი ტემპით მოხდება, ვიდრე სხვა პერიოდში გვექნებოდა, რადგანაც სურსათის, ხორბლის, ბენზისის ფასებია საკმაოდ გაზრდილი“, - განაცხადა დეპუტატების კითხვის პასუხად კობა გვენეტაძემ. 

შეგახსენებთ, რომ დღეს სებ-ის პრეზიდენტმა კობა გვენეტაძემ პარლამენტის საფინანსო-საბიუჯეტო კომიტეტს სებ-ის საქმიანობის 2021 წლის ანგარიში წარუდგინა.