„ამ დროისთვის ბაზარზე ჩასაბარებელი თხილის ფასი ხარისხის მიხედვით 3 ლარიდან 4,50 ლარამდე მერყეობს, რაც წინა წელთან შედარებით დაახლოებით 1 ლარით ნაკლებია“, - ამის შესახებ „კომერსანტს“ საქართველოს თხილის მწარმოებელთა ასოციაციის აღმასრულებელმა დირექტორმა გიორგი თოდუამ განუცხადა. მისივე თქმით, თხილის ფასი სხვადასხვა ფაქტორებზე, მაგალითად თურქეთის ბაზარზე, ლარის კურსზე და თხილის ხარისხზეა დამოკიდებული.
„დღეის მდგომარეობით ქართული თხილის ჩასაბარებელი ფასი ხარისხის მიხედვით 3 ლარიდან 4,50 ლარის ფარგლებში მერყეობს, პროცესი ახალი დაწყებულია და ვნახოთ რა და როგორ იქნება, წინა წელთან შედარებით თხილის ფასი ერთი ლარით ნაკლებია. შემდგომში გაიზრდება თუ დაიკლებს ეს სხვადასხვა ფაქტორებზეა დამოკიდებული. ძირითადად მაინც თურქეთის ბაზარია მნიშვნელოვანი, როგორ ჩამოყალიბდება ფასები, დიდი კომპანიები დაიწყებენ თუ არა შესყიდვებს და ა.შ. სექტემბერ-ოქტომბერში ეს ფასი გვექნება.
ფასში ასევე მნიშვნელოვანია უცხოური ვალუტის ფაქტორიც, ერთის მხრივ ლარი კი გამყარდა, თუმცა მსყიდველუნარიანობა დაბალია. დღეს ევრო უფრო იაფია, თუ ევრო შარშან 3,6 ღირდა, წელს მისი ღირებულება 70-75 თეთრით ნაკლებია — თუ გადავიანგარიშებთ ესეც ერთ-ერთი მაჩვენებელია. დანარჩენი ფასზე მოქმედებს ხარისხი, ხარისხიანი თხილი ყოველთვის კონკურენტუნარიანი იქნება და ის შემსყიდველები რომლებიც მუშაობენ ხარისხიან თხილზე ალბათ უფრო სექტემბრის ბოლოსკენ გააქტიურდებიან“, - აღნიშნა გიორგი თოდუამ.
კითხვაზე თუ რა უნდა გააკეთოს ქართველმა ფერმერმა იმისთვის, რომ თხილის ხარისხი გააუმჯობესოს თოდუა ამბობს, რომ ამისათვის აუცილებელია ჩაატაროს წამლობები. მისივე თქმით, დღეს ფერმერების უმეტესობა არ ფიქრობს, რომ თხილს შეწამვლა სჭირდება, ამის გამო ბაზარზე 70%-ი მეორე და მესამე ხარისხის თხილი გვაქვს.
„ფერმერმა ხარისხის გასაუმჯობესებლად აუცილებელია შეწამლოს ბაღები და ჩაატაროს ყველა ის ღონისძიება, რაც თხილისთვის აუცილებელია. დიდი ხანია ჩვენ ამ მიმართულებით ვმუშაობთ. წელს დაახლოებით 30%-ი მაღალ ხარისხს თხილს ველოდებით და 70%-ი იქნება მეორე და მესამე ხარისხის. ჯერ კიდევ გვყავს ფერმერები, რომელთა უმრავლესობაც, ამბობს, რომ თხილს მოვლა და შეწამვლა არ სჭირდება, ასე ჩვენ წარმატებას ვერ მივაღწევთ.
ჩვენი მიზანი უნდა იყოს, რომ რაც შეიძლება მეტი, სასურველია ყველა რასაც ვაწარმოებთ იყოს პირველი ხარისხის, რომელიც იქნება კონკურენტუნარიანი ბაზარზე. თურქულ თხილს ქართული თხილი საგრძნობლად ჩამორჩება.
ამ დროისთვის რეალიზებულია თხილის 20%-ი, მათგან 90%-ი არის შეუწამლავი თხილი. ამ დღეებში და ამ კვირებში ფერმერები შეუწამლავ თხილს იშორებენ, რადგან მათი შენახვა არ გამოდის და ფუჭდება. ხოლო იმ ფერმერებს რომლებსაც მაღალი ხარისხის თხილი აქვთ ტრადიციულად სექტემბრიდან - დეკემბრამდე პერიოდში ყიდიან ფასის მომატებისას, თუმცა რა იქნება ამის პროგნოზს ვერ გავაკეთებთ“, - აღნიშნა გიორგი თოდუამ.
რაც შეეხება წლევანდელ მოსავალს, თოდუა ამბობს, რომ ქვეყანაში უხვი ნალექის და შეუწამვლობის გამო წელს საქართველოს შარშანდელთან შედარებით 20-30%-ით ნაკლები მოსავალი აქვს.
თაკო კვაჭანტირაძე