გაჭიანურებული სასამართლო პროცესები კერძო სექტორისთვის გადაუჭრელი პრობლემაა და მათ მნიშვნელოვან ბარიერებს უქმნის. საქართველოში ბიზნესს სამართლის პოვნა ხშირად უჭირს. პროცესი კი იმდენად ხანგრძლივია, რომ კომპანიები ხშირად ბაზრიდან დავის დასრულებამდე გადიან. აღნიშნული პრობლემის წინაშე დგას როგორც ადგილობრივი, ისე უცხოელი ინვესტორები, როგორც “ბიზნესპარტნიორთან“ საკითხის კომენტირებისას დასაქმების ასოციაციის იურისტმა, ნიკა აბუთიძემ აღნიშნა, გამომდინარე იქიდან, რომ ბევრი საქმეა გადაწყვეტილების დაწერაც კი იწელება.

„მაშინ როდესაც მხარე ელოდება პირველი ან მეორე ინსტანციის დასაბუთებულ სასამართლო გადაწყვეტილებას პროცესი დროში ძალიან იწელება. ყოფილა შემთხვევები როდესაც შემიტანია საქმე და ისე გასულა წელი, რომ სხდომაც არ ჩატარებულა მოსამართლეები ამას რიგითობით მიყვებიან, იმიტომ რომ ბევრი საქმე აქვთ, ეს არ ხდება იმიტომ რომ ვინმე არ ნიშნავს სასამართლოს, უბრალოდ სასამართლოში სასამართლო რესურსი არის ძალიან ცოტა“, - აღნიშნა ნიკა აბუთიძემ.

საქართველოს ბიზნეს ასოციაციის იურისტი ნიკა ნანუაშვილი „ბიზნესპარტნიორთან“ აღნიშნავს, რომ ბიზნეს დავა დისკომფორტის შემქმნელია არა მხოლოდ დროის მხრივ, არამედ ეს არის დაკარგული შესაძლებლობები და დაკარგული ფინანსები.

„როდესაც ჩვენ ვსაუბრობთ გაჭიანურებულ ბიზნეს დავაზე , ჩვენ არ უნდა წარმოვიდგინოთ , რომ ეს დისკომფორტის შემქმნელია მხოლოდ იმ ნაწილში, რომ ბიზნესს მალე სჭირდება გადაწყვეტილების მიღება, ეს არ არის ასე, როდესაც ჩვენ ვსაუბრობთ გაჭიანურებულ დავაზე და ამ რამდენიმე წელზე, ეს არის დაკარგული შესაძლებლობები, დაკარგული ფინანსები, ეს არის არა და ვერ რეალიზებული ბიზნეს გეგმები, რაც აისახება ბიუჯეტში ვერ შეტანილ გადასახადებზე, ნაკლებ დასაქმებულ ადამიანზე, ნაკლებ შემოსავალზე ამ ადამიანებისთვის და ნაკლებად განვითარებულ ბიზნესზე“, - აღნიშნა ნიკა ნანუაშვილმა.