წითელი მრგვალი პომიდვრის საშუალო საბითუმო ფასმა საქართველოში ყველა დროის მაქსიმუმს მიაღწია, ამავდროულად ფასები 170%-ით აღემატება წინა წლის ანალოგიურ პერიოდის მონაცემებს, - ასეთია EastFruit-ის 22 ივლისს ჩატარებული კვლევის შედეგები.
EastFruit-ის ფასების მონიტორინგის მიხედვით, ქართული წითელი მრგვალი პომიდორი საშუალოდ 2 ლარად/კგ (0,70$/კგ) იყიდება, შარშან, იმავე კვირაში, მისი ფასი 0,80 ლარს/კგ (0,26 $/კგ) შეადგენდა. ფასების მკვეთრი ზრდა წლიურ ჭრილში განპირობებულია 2022 წლის სეზონის ადრეული დაწყებით.
წითელი მრგვალი პომიდვრის საბითუმო ფასები საქართველოში
ქართულ ბაზარზე პომიდვრის მიწოდება პიკს აგვისტოში აღწევს, მაშინ როცა ღია გრუნტის პომიდორი შემოდის ბაზარზე. ივლისის მეორე ნახევარში მიწოდება ძირითადად ადგილობრივი სათბურებიდან ხდება. არსებობს ადრეული ჯიშები, მაგრამ მათი წილი ძალიან მცირეა. ივლისის ბოლოსთვის სათბურებიდან მიწოდება მცირდება, ბაზარზე ცოტა პომიდორი რჩება და ფასი დროებით იზრდება. წელს მიწოდება ერთი კვირით ადრე შემცირდა, რამაც ფასების ზრდა გამოიწვია, სათბურებიდან მომარაგების დაბალი მოცულობა კი ცივი ამინდისა და გაშენების ხარჯების ზრდით აიხსნება.
პომიდვრის მწარმოებლები დასავლეთ საქართველოში EastFruit-თან კვლავ ცივ ტემპერატურაზე მიანიშნებენ. ეს, სავარაუდოდ, შეაფერხებს ღია გრუნტის მოსავლის აღებას და ფასები წელს შესაძლოა მაღალ ნიშნულზე ჩვეულებრივზე დიდხანს შენარჩუნდეს. ამის მიუხედავად, ფერმერთა ნაწილს მიმდინარე სეზონზე ფასებთან დაკავშირებით დადებითი მოლოდინი აქვს.