ეკონომიკისა და მდგრადი განვითარების მინისტრი ნათია თურნავა განმარტავს, რატომ იქნება მიმზიდველი საქართველოში საერთაშორისო ფინანსური ზონები და რა უპირატესობა გააჩნია მას სხვა ქვეყნებთან. როგორც თურნავამ მთავრობის სხდომის დასრულების შემდეგ ბრიფინგზე განაცხადა, დაინტერესებულ კომპანიებს ქვეყანა მათთვის მიმზიდველ, გარკვეულ სპეციალურ რეჟიმს შესთავაზებს საერთაშორისო გამოცდილებაზე დაყრდნობით.

„საერთაშორისო ფინანსური ცენტრების შექმნა ძალიან კარგი საშუალება იქნება საერთაშორისო კომპანიებისთვის, რომ დარეგისტრირდნენ საქართველოში, გადმოიტანონ საქმიანობა ამ ზონებში. ეკონომიკისთვის ეს არის პირდაპირი უცხოური ინვესტიციები და არა მარტო უცხოური, ადგილობრივიც, რადგან ასეთ ზონებს წინ უსწრებს აქტიური დეველოპმენტი ამ ტერიტორიაზე. ამ ტერიტორიაზე გარდა იმისა, რომ სპეციალური რეჟიმი უნდა ამოქმედდეს სამართლებრივი, ფისკალური, რეგულატორული, ასევე უნდა გაშენდეს მაღალი კლასის საოფისე თუ საცხოვრებელი ფართები. ეს დამატებითი ინვესტიციებია. ასევე, მნიშვნელოვანი დადებითი ეფექტია ჩვენი მოსახლეობის დასაქმება. ამ ზონების მომსახურებას განსაკუთრებით ბევრი კადრი სჭირდება ისეთ სფეროებში, როგორიცაა ბუღალტერია, აუდიტი, კომპიუტერული ტექნოლოგიები და IT ტექნოლოგიები, სხვადასხვა სახის კომუნალური მომსახურება და ა.შ. ეს იქნება ახალი მიზიდულობის ცენტრი, რომელიც საქართველოს დააპოზიციონირებს როგორც ფინანსურ საერთაშორისო ჰაბს და შექმნის მაღალკვალიფიციურ პროფესიებზე მოთხოვნას“, - განაცხადა თურნავამ.

ამასთან, როგორც მინისტრმა განმარტა, საქართველოს ამ მიმართულებით, სხვა ქვეყნებთან შედარებით გარკვეული უპირატესობები გააჩნია.

„რატომ მიგვაჩნია, რომ საქართველოში ასეთი ზონები იქნება წარმატებული და მიმზიდველი საერთაშორისო კომპანიებისთვის? - პირველ რიგში ვიტყვი, რომ ჩვენ ძალიან კარგად ვართ სტრატეგიულად განლაგებული. თუნდაც დროითი სარტყელი, რომელიც საქართველოში მოქმედებს არის ისეთი, რომ ერთდროულად შეიძლება ეს ზონა მოემსახუროს როგორც აზიურ, ასევე ევროპულ ფინანსურ ბაზრებს, რაც მნიშვნელოვანია ამ ტიპის საქმიანობაში. ასევე მნიშვნელოვანია როგორც მაკროეკონომიკური, ასევე პოლიტიკური სტაბილურობა, ის რეფორმები, რაც საქართველოში გატარდა. საქართველო პოზიციონირებს როგორც დასავლურ მოდელზე ორიენტირებული ბიზნეს კანონმდებლობის განმავითარებელი ქვეყანა და ეს ძალიან მნიშვნელოვანია. ასევე ბევრი სხვა ქვეყნისგან არსებული ბიზნეს კლიმატით გამოვირჩევით. ამას თუ დაემატება ის, რომ საკმაოდ ეფექტურია ჩვენთან ოფისების გადმოტანა და ბიზნესის კეთება იმ თვალსაზრისით, რომ ევროპულ და აზიურ ქვეყნებთან შედარებით ჩვენთან ბევრად ნაკლებია თუნდაც კომუნალური მომსახურების ღირებულება, ცხოვრების დანახარჯი და ბიზნესის კეთების ხარჯიც უფრო ნაკლებია, ეს მიმზიდველი იქნება. რატომ ავარჩიეთ გონიო და თბილისი - მსოფლიო პრაქტიკა გვიჩვენებს, რომ მსგავსი ზონა უნდა იყოს მსხვილ, ურბანულ ცენტრთან ახლოს განვითარებული, უნდა იყოს განთავსებული საერთაშორისო აეროპორტებთან ახლოს. ამავდროულად უნდა იყოს ცალკე კომპაქტური ტერიტორია. საქართველოში ბიზნესის კეთება არის არა მხოლოდ სარფიანი, არამედ, სასიამოვნოც იმიტომ, რომ საერთაშორისო კომპანიებს და იქ დასაქმებულ ადამიანებს შეგვიძლია შევთავაზოთ ძალიან სასიამოვნო, ტურისტული გარემო, რომლებსაც დაათვალიერებენ“, - განაცხადა თურნავამ.

რაც შეეხება დამატებით დეტალებს, თურნავას განმარტებით, ფინანსური ზონა გაითვალისწინებს სამი მიმართულებით სპეციალურ, განსხვავებულ რეჟიმებს - სამართლებრივი, რეგულატორული და ფისკალური.

„ვფიქრობთ, გარკვეულ სპეციალურ რეჟიმს შევთავაზებთ საერთაშორისო კომპანიებს საერთაშორისო გამოცდილებაზე დაყრდნობით, რაც მათთვის მიმზიდველი იქნება. ამისთვის მოწვეულია Rothschild ჯგუფი. ისინი დაგვეხმარებიან ცვლილებების პაკეტის ჩამოყალიბებაში. მეტ დეტალზე ამის შემდეგ ვისაუბრებ. მუშაობა უკვე იწყება და ვფიქრობ, წლის პირველ ნახევარში სრულად გვექნება ჩამოყალიბებული ეს პაკეტი და მეტი კონკრეტიკა იქნება“, - განაცხადა თურნავამ.

BPN.GE