2022 წელს მსოფლიოში საქონლის ხორცზე მოთხოვნა მკვეთრად დაეცა და მიუხედავად იმისა, რომ 2023 წელს ინფლაცია მცირდება, ამ ტიპის ხორცის მოხმარებაც შემცირდება, წერს Bloomberg. აღსანიშნავია, რომ საქონლის ხორცზე მოთხოვნა იმ ქვეყნებში იკლებს, სადაც მას ყველაზე ხშირად მიირთმევენ. მაგალითად, არგენტინაში, სადაც სტეიკები ეროვნული კულტურის ნაწილია.
საქონლის ხორცის მწარმოებელი Ciccra-ს მონაცემებით, 2022 წელს ძროხის ხორცის მოხმარება ერთ სულ მოსახლეზე 47,2 კგ-ს შეადგენდა, ხოლო 2007 წელს ეს მაჩვენებელი 68,7 კგ იყო. საქონლის ხორცის მოხმარების შემცირება ქვეყანაში ფასების მატებით არის განპირობებული, რის გამოც არგენტინელებმა დაიწყეს მეტი ქათმის ხორცის შეძენა - 20 წლის განმავლობაში მოთხოვნა 18 კგ-დან 46 კგ-მდე გაიზარდა.
41 წლის ბუენოს-აირესის მკვიდრმა ომარ ანიბალ სოსამ თქვა, რომ სტეიკებს ყოველ შაბათ-კვირას ამზადებდა, ბოლოს კი ასადო (არგენტინული მწვადი) თვეზე მეტი ხნის წინ მოამზადა.
გარდა ამისა, საქონლის ხორცის მოხმარება ასევე შემცირდა გასულ წელს ბრაზილიაში, აშშ-სა და დიდ ბრიტანეთში. საცალო ვაჭრობისა და მომხმარებელთა კვლევის კომპანიის NielsenIQ-ის მონაცემებით, 2022 წელს აშშ-ში ძროხის ხორცის შესყიდვები 4%-ით შემცირდა, ხოლო შემწვარი ხორცისა და სტეიკის გაყიდვები შემცირდა დიდ ბრიტანეთში.
იმავდროულად, 2023 წელს არგენტინაში საქონლის ხორცზე მოთხოვნა 2%-ზე მეტით შემცირდება, აშშ-ში - თითქმის 5%-ით. დიდ ბრიტანეთში, სასურსათო მაღაზიებიდან და რესტორნებიდან საქონლის ხორცის შესყიდვა წინა წელთან შედარებით უკვე 5,8%-ით შემცირდა, გადამუშავებული ხორცის გაყიდვები შემცირდა 22%-ით, სტეიკის 19%-ით.