Airbnb-ზე საქართველოში განთავსებული გასაქირავებელი ბინების რაოდენობა დაახლოებით 35%-ითაა შემცირებული. როგორც „კომერსანტთან“ Airbnb მენეჯმენტ კომპანია Wehost-ის დამფუძნებელმა ნიკა ანჯაფარიძემ განაცხადა, გასულ წელს გაქირავების პლატფორმაზე, 17 ათასი აქტიური ბინა იყო წარმოდგენილი,  დღეისთვის კი 6 ათასი ბინით ნაკლებია.

ნიკა ანჯაფარიძის თქმით, რუსი მიგრანტების შემოსვლამ Airbnb-ზე დადებითად მხოლოდ რამდენიმე კვირის განმავლობაში იმოქმედა, ხოლო შემდეგ ისინი გრძელვადიანი გაქირავების სეგმენტში გადავიდნენ.

რუსი ტურისტების მხრიდან იყო ბინის მეპატრონეებთან პირდაპირი მოლაპარაკებება, ან თავად ბინის მეპატრონეებს აწყობდათ გრძელვადიანი გაქირავების სეგმენტში გადასვლა.

„Airbnb-ზე აქტიური ბინების რაოდენობა შემცირდა, რადგანაც ამ ხალხის შემოსვლამ გამოიწვია უფრო გრძელვადიანი გაქირავების ბაზრის განვითარება. Airbnb-ზე ეფექტი იყო 2 კვირამდე ჯავშნებზე და ამის შემდეგ ეს ადამიანები ეძებდნენ ბინებს გრძელვადიანი დაქირავებისთვის, რადგანაც ეს ხალხი საქართველოში მინიმუმ 6 თვით შემოვიდა.

წინა წელს საქართველოდან Airbnb-ზე 17 ათასი აქტიური ჰოსტინგი იყო, ახლა კი შემცირებულია და 11 ათასამდეა. რეალურად, Airbnb-ის გამოყენება შემცირდა“, - აცხადებს ნიკა ანჯაფარიძე.

Wehost-ის დამფუძნებელი აცხადებს, რომ დღეისათვის Airbnb-ზე ჯავშნების რაოდენობა სტაბილურია.

„დაახლოებით 85%-იანი დატვირთვა გაქვს. ჯავშნები ძირითადად შემოდის რუსეთიდან და დსთ-ს სივრცის ქვეყნებიდან“, - განმარტავს ანჯაფარიძე.

რაც შეეხება ბინების ფასებს, Airbnb-ის მენეჯმენტ კომპანია Wehost-ის დამფუძნებელი აცხადებს, რომ ზრდა 30%-ია.

შეგახსენებთ, რომ Wehost არის პირველი Airbnb მენეჯმენტ კომპანია საქართველოში.