საქართველოდან ცხვრის ექსპორტი 42%-ითაა შემცირებული. საქსტატის მონაცემების მიხედვით, 2021 წლის იანვარ-სექტემბერში საქართველომ ექსპორტზე 24,082.44 ათასი დოლარის ღირებულების ცხვარი გაიყვანა, 2022 წლის 9 თვეში კი კი 16,989.57 ათასი დოლარის ღირებულების.
სტატისტიკური მაჩვენებლების მიხედვით, 2022 წლის იანვარ-სექტემბერში საქართველომ ცხვრის ექსპორტის თითქმის ნახევარი აზერბაიჯანში განახორციელა.
2022 წლის იანვარ-სექტემბერში საქართველომ ექსპორტი განახორციელა შემდეგ ქვეყნებში:
- აზერბაიჯანი - 8,459.07 ათასი დოლარი
საუდის არაბეთი - 4,631.01 ათასი დოლარი
არაბთა გაერთიანებული საამიროები - 1,494.75 ათასი დოლარი
ეგვიპტე - 1,193.73 ათასი დოლარი- იორდანია - 1,111.00 ათასი დოლარი
კატარი - 100.00 ათასი დოლარი
მეცხვარეთა ასოციაციის ხელმძღვანელი ბექა გონაშვილი „კომერსანტთან“ აცხადებს, რომ ბოლო კვირების განმავლობაში საექსპორტო ბაზარზე სიტუაცია შედარებით გამოცოცხლდა, რაც ფერმერების მიერ ფასის კლების ხარჯზე მოხდა.
„2 თვის წინანდელ პერიოდთან შედარებით, ცხვრის გაყვანა დაიწყო. მანამდე ექსპორტი ფაქტობრივად მკვდარი იყო. თუმცა ფასის დაკლება მოგვიწია. შარშან თუ ამ დროს ცხვარს 320-330 ლარად ვყიდდით, დღეს უკვე ადგილობრივი ფასი 240-270 ლარია. ეს ყველაფერი კი დოლარის კურსის გამოა, რადგანაც გასაყვანი ფასი თუ შარშან 100 დოლარი შეადგენდა 325 ლარს, დღეს უკვე 275 ლარია“, - აცხადებს ბექა გონაშვილი.
მეცხვარეთა ასოციაციის ხელმძღვანელი ამბობს, მნიშვნელოვნად გაიზარდა ტრანსპორტირების ხარჯები, რამაც
საექსპორტო ბაზარზე პროდუქციის ფასი გააძვირა.
„ტრანსპორტირება გაძვირდა. ბოლო პერიოდში გადაზიდვების ფასი 30-40%-ით იყო გაძვირებული, თუმცა ბოლო პერიოდში შედარებით შემცირებულია. მაგალითისთვის გეტყვით, რომ 2021 წლის თებერვალში შარჯაში რეისი, რომ გავუშვი 90 ათასი დოლარი გადავიხადე და წელს უკვე ანალოგიური მარშრუტის ფასი ზაფხულში 145 ათასი დოლარი მითხრეს. თუმცა დღეს ფასი ოდნავ შემცირებულია და 130 ათასი დოლარი ღირს.
წუხელ, Qatar Airways Cargo-ს რეისით კატარში 1770 სული ცხვარი გავუშვი და გეტყვით, რომ საწვავიდან გამომდინარე ფასები შემცირებისკენაა“, - აცხადებს გონაშვილი.
ბექა გონაშვილის თქმით, საერთაშორისო ბაზარზე ქართულ ცხვარზე მოთხოვნა შემცირებულია.
„რამდენიმე დღის წინ ვიმყოფებოდი საუდის არაბეთში ერთ-ერთ გამოფენაზე და ქართულ ცხვარზე დიდი მოთხოვნა არ არის. სუდანიდან გადმოჰყავთ ცხვარი. ცხადია სუდანიდან გადმოყვანილ ცხვარს ფასით კონკურენციას ვერ გავუწევთ. სანამ სუდანშიც არ შემცირდება რაოდენობა და ფასი არ გაიზრდება, არ მგონია, რომ კონკურენციაში შევიდეთ.
რამაც ფასების დაწევა და მოთხოვნის შემცირება გამოიწვია არის ისიც, რომ რუმინეთი ყიდის დიდი რაოდენობით ცხვარს გალფის ქვეყნებში. ევროპის მასშტაბით რუმინეთს ყველაზე დიდი რაოდენობის ცხვარი ჰყავს, თუმცა დასავლეთ ევროპა რუმინულ ცხვარს აღარ ყიდულობს გარკვეული დაავადებების გამო და მათ ჭარბი ცხვრის გაყიდვა უკვე დემპინგური ფასებით უწევთ“, - აცხადებს ბექა გონაშვილი.