ომანელი ონლაინ კომენტატორები ერთმანეთს საქართველოში მოგზაურობისგან თავის შეკავებისკენ მას შემდეგ მოუწოდებენ, რაც გავრცელებული ინფორმაციის თანახმად, ორ ომანელ ოჯახს აღმოსავლეთ ევროპის ამ ქვეყანაში შესვლაზე უარი ეთქვა, — წერს გამოცემა albawaba.com.
ტენდენციური ჰეშთეგით #لا_تسافر_جورجيا ( არ იმოგზაუროთ საქართველოში) ტვიტერის ასობით მომხმარებელი აპროტესტებდა საქართველოს გადაწყვეტილებას იმის შესახებ, რომ ორ ომანელ ოჯახს საქართველოში არდადეგების გატარების საშუალება არ მისცეს.
„არ იფიქროთ საქართველოში მოგზაურობაზე, ისინი ცუდად ეპყრობიან ომანელ ოჯახებს და ინფორმაციის გადამოწმების გარეშე აეროპორტიდანვე უკან აბრუნებენ. მართალია, მათ სრული უფლება აქვთ მიიღონ გადაწყვეტილება იმაზე თუ ვინ შეუშვან ქვეყანაში და ვინ არა, მაგრამ ეს ჩვენთვის დამამცირებელია და ჩემი რჩევა არ იქნება რომ მიიღოთ ასეთი დამოკიდებულება თქვენზე და თქვენ ოჯახებზე. ამიტომ, მოერიდეთ საქართველოში მოგზაურობას“, - წერს სოციალურ ქსელ ტვიტერში ომანელი საიდ ალ რეშდი ( Said all Rashdi)
თურქეთში ომანის ელჩის თქმით (ფარავს საქართველოსაც), ეს გადაწყვეტილება საქართველოში პანდემიის გამო დაწესებულ რეგულაციებს მოჰყვა, რომელიც ტურისტებს რამდენიმე ქვეყნიდან საქართველოში შესვლას უკრძალავს, მათ შორის არის ომანიც. თუმცა, ელჩის თქმით, ასეთი რეგულაციები ავიაკომპანიებს ნათლად უნდა განემარტათ, მანამ სანამ ოჯახები თბილისისკენ მიმავალ რეისზე ჩასხდებოდნენ.
ეს ამბავი პირველად 2022 წლის 6 იანვარს ერთმა ომანელმა მამაკაცმა გაავრცელა, რომელიც წერდა საქართველოდან მისი ძმების უკან გამობრუნებაზე და არასათანადო მოპყრობაზე საუბრობდა.
„არის თუ არა საქართველოში სამუშაო ადგილები თქვენთვის? არა, ნათესავები გყავთ იქ მოსანახულებელი? არა. არსებობს განსაკუთრებული ბუნებრივი გარემო, რომელსაც სხვაგან ვერსად ნახავთ? არა. მსოფლიოში კიდევ 200 ქვეყანაა და მაინც დაჟინებით მოითხოვთ საქართველოში ვიზიტს მიუხედავად იმისა, რომ გსმენიათ არასათანადო მოპყრობის შესახებ, რომელიც იქ ჩვენ მიმართ ხდება?!“, - წერს სოციალურ ქსელ ტვიტერში ნაიფ ალფარსი (Naif Alfarsi)
მიუხედავად ამ განმარტებებისა, ომანელებმა აღშფოთება გამოხატეს ორი ომანელი ოჯახის უკან გაბრუნების გამო და აღნიშნეს, რომ ადამიანებმა მომავალში საქართველოში მოგზაურობის გეგმებს უნდა გადახედონ. ზოგიერთი ომანელის აზრით, ომანმა შიდა ტურიზმის განვითარებაზე უნდა იფიქროს და თავი აარიდოს სხვა ქვეყნებისგან არასათანადო მოიპყრობს.
სოციალურ ქსელ ტვიტერში მომხმარებელი საქართველოს საგარეო საქმეთა სამინისტროს ნიშნავს და წერს, რომ თბილისის აეროპორტის მხრიდან მსგავსი შემთხვევა ტენდენციურია.
“თბილისის აეროპორტის მხრიდან ეს ტენდენცია აქტიურია ომანში, ომანელების მიმართ სასტიკი მოპყრობა მუდმივი და განმეორებადია, იმედი მაქვს, რომ მიიღებთ ზომებს“, - წერს ის.
თაკო კვაჭანტირაძე
წყარო: www.albawaba.com