კომერციული ბანკების მიმართ საჩივრები უმნიშვნელოდ, მაგრამ შემცირდა. კერძოდ, ეროვნული ბანკის სტატისტიკის მიხედვით, 2022 წლის იანვარ-ნოემბერში მომხმარებლების მხრიდან საბანკო სექტორის წინააღმდეგ 21 454 პრეტენზია დაფიქსირდა, მაშინ როცა 2021 წლის 11 თვეში ბანკების მიმართ 21 709 საჩივარი დაიწერა.
ეროვნული ბანკის სტატისტიკის მიხედვით, 2022 წლის იანვარ-ნოემბერში პრეტენზიების ხუთეულში შედიან:
მიმდინარე ანგარიში/სადებეტო ბარათი - 13 311 განაცხადი;
სამომხმარებლო სესხი - 2403 განაცხადი;
საკრედიტო ბარათი - 912 განაცხადი;
ინტერნეტბანკი – 780 განაცხადი;
იპოთეკური სესხები - 531 განაცხადი.
პრეტენზიების შინაარსის მიხედვით, საანგარიშო პერიოდში შესული პრეტენზიებიდან ყველაზე მეტი - 12 389 განაცხადი ტრანზაქციებზე მოდის; შემდეგია ადმინისტრაცია/მომსახურება 3 498 განაცხადით, მე-3 ადგილზეა ხელშეკრულების პირობებთან დაკავშირებული პრეტენზიები 1 816 განაცხადით და ა.შ.
ეროვნული ბანკის ვებ-გვერდზე გამოქვეყნებული სტატისტიკის მიხედვით, 2022 წლის იანვარ-ნოემბერში 21 454 საჩივრიდან ბანკებმა 14 811 განაცხადი - უსაფუძვლოდ, 3 367 - საფუძვლიანად მიიჩნიეს; 3 229 განაცხადის შემთხვევაში განხილვა ისევ მიმდინარეობს. 47-ის შემთხვევაში კი განხილვა დასრულებულია, პრეტენზია მიჩნეულია საფუძვლიანად, თუმცა პრობლემა არ არის აღმოფხვრილი.
აღსანიშნავია, რომ მომხმარებელთა ცხელი ხაზი ეროვნულ ბანკში 2011 წლიდან მოქმედებს. პრეტენზიების სტატისტიკაც ამის შემდეგ იწარმოება.