COVID-19-მა გვერდი ვერც რძის მწარმოებლებს აუარა. სახელმწიფოს მიერ რძის ფხვნილის სუბსიდირებაზე გადაწყვეტილებამ მწარმოებლები არაკონკურენტულ პირობებში ჩააყენა. სექტორის წარმომადგენლები ამბობენ, რომ ამ გადაწყვეტილებით რძის ფხვნილის მოთხოვნა წახალისდა, ნედლი რძის სექტორს კი დამატებითი სირთულეები შეექმნა.
საქართველოს მერძევეობის ასოციაციის აღმასრულებელი დირექტორი ლევან არქანია მიიჩნევს, რომ თვითღირებულების რეგულირება შესაძლებელია წარმოებული რძის რაოდენობის გაზრდით, თუმცა დაბალი მოთხოვნა ნედლ რძეზე ვერ ახდენს რძის რაოდენობის ზრდის სტიმულირებას. რძის გადამამუშავებელი კომპანიები არჩევანს აკეთებენ იმპორტირებულ რძის ფხვნილზე, რომლის ფასი ნედლი რძის ფასთან მიმართებაში დაბალია.
„პრობლემის მოგვარება შესაძლებელია მხოლოდ სახელმწიფოს ჩარევით და სათანადო ღონისძიებების გატარებით. თუმცა, პანდემიის პირობებში სახელმწიფოს გადაწყვეტილებამ პირიქით დამატებითი პრობლემები შეუქმნა ნედლი რძის წარმოებას“, – აღნიშნავს არქანია.
ნედლი რძის მოთხოვნის სტიმულირების მიზნით, ლევან არქანია მიიჩნევს, რომ მთავრობის მხრიდან უნდა მომხდარიყო ნედლი რძის სუბსიდირება ან რძის გადამამუშავებელი კომპანიების დღგ-საგან გათავისუფლება, რაც ავტომატურად აისახებოდა ნედლი რძის მოთხოვნის ზრდაზე, თუნდაც მოკლევადიან პერიოდში.
ასოციაციაში აცხადებენ, რომ პრობლემების გარდა, ინდუსტრიულ რძის ფერმებს ყოველდღიურად უწევთ პანდემიით გამოწვეული დაბრკოლებების გადალახვა. ფერმებში გამკაცრებულია სანიტარულ-ჰიგიენური ნორმები, ჯანდაცვის სამინისტროს დაწესებული ნორმების შესრულება ფერმისთვის დაკავშირებულია დამატებით ხარჯებთან. შეფერხებებია ასევე საკვებწარმოების პროცესში.
“ბიზნესპარტნიორი”