რძის ფხვნილისგან დამზადებულ ყველზე ეტიკეტირების წესის დარღვევის გამო კვების ობიექტების დაჯარიმების ფაქტს თბილისის რესტორნები ეხმაურებიან და  სურსათის ეროვნული სააგენტოს მიერ მიღებულ გადაწყვეტილებას მართებულად მიიჩნევენ.

რესტორან „კახელების“ დამფუძნებელი ჭიჭიკო გოლეთიანი „კომერსანტთან“ აღნიშნავს, რომ რძის ფხვნილით დამზადებული პროდუქციის ეტიკეტირება, ჯანსაღ პროდუქტზე მოთხოვნას გაზრდის. „ადრე იკრძალებოდა რესტორნებს  გლეხისგან შეძენილი  პროდუქტი გამოეყენებინათ.  ახლა გლეხს, რომელსაც 5 ძროხა ჰყავს, შეუძლია დარეგისტრირდეს მეწარმედ  და რესტორანი  ნატურალური პროდუქტით მოამარაგოს. ახლა კი, როდესაც ეს კანონიც შეიცვალა და ეტიკეტირება სავალდებულო გახდა, ბიოლოგიურად სუფთა პროდუქტის  რეალიზაცია რასაკვირველია,მეტად გაიზრდება.“-ამბობს ჭიჭიკო გოლეთიანი.

რესტორან „კახელების“ დამფუძნებელი იმასაც ამბობს, რომ რძის შემცვლელით დამზადებული პროდუქცია სრულად არ უნდა აიკრძალოს, რადგან მასაც ჰყავს მომხმარებელი.

„საქართველო არის ნატურალური პროდუქტით განთქმული და სირცხვილია ყველი მთლიანად  რძის ფხვნილით ვაწარმოოთ. თუმცა, არც მისი აკრძალვა მიმაჩნია მართებულად, რადგან ადამიანების გარკვეულ კატეგორიას არ აქვს  საშუალება სხვა სახის პროდუქტი შეიძინონ, ეს მათი უფლებაა, თუმცა, ასეთი პროდუქცია აუცილებლად უნდა იყოს ეტიკეტით. რესტორნებმა კი აუცილებლად ნატურალური პროდუქტი უნდა გამოიყენონ.  ტურისტები გვსტუმრობენ, რომლებიც   ელოდებიან ნატურალურ საკვებს. მათ ამის არ არსებობის გამო, ნდობა არ უნდა გაუქრეთ.“-ამბობს ჭიჭიკო გოლეთიანი.

რძის ფხვნილისგან დამზადებული პროდუქტის აკრძალვას არც რესტორან „წისქვილის“ წარმომადგენლები  იწონებენ, თუმცა, ეტიკეტირების წესის დანერგვას  აუცილებლად მიიჩნევენ.

„საერთოდ, აკრძალვას არ ვემხრობით, მხოლოდ ეტიკეტით უნდა გაიმიჯნოს ეს ორი პროდუქტი. მომხმარებელი კი თავად გადაწყვეტს, რომელი შეიძინოს. ზოგს ალერგია აქვს  რძეზე ან  ფინანსური შესაძლებლობა არ აქვს ჯანსაღი პროდუქტის შეძენის, არჩევანის უფლება უნდა მიეცეთ.“-ამბობს „წისქვილის“ წარმომადგენელი სოფო გორდაძე.

მისი თქმით, აუცილებელია ორივე კატეგორიის პროდუქტი, როგორც მაღაზიებში ასევე რესტორნებშიც იყოს, მომხმარებელი კი  მაქსიმალურად ინფორმირებული იმაზე, თუ  რისი შეძენა/შეკვეთა შეუძლია და რა ფასად.

შეგახსენებთ, 2017 წლის 1 ივლისიდან ყველის წარმოების წესები გამკაცრდა და რძის ფხვნილისგან ან მცენარეული ცხიმისგან წარმოებულ პროდუქტზე ტერმინ „ყველის“ დაწერა აკრძალულია.იმერული, ჭყინტი, სახაჭაპურე, - ეს ის დასახელებებია, რომლებსაც მეწარმეები რძის ფხვნილისგან დამზადებული „ყველის მსგავსი“ პროდუქტის აღსანიშნავად იყენებენ. შესაბამისად, სარეალიზაციო ობიექტებში გამოჩნდა პროდუქტები, რომლებსაც არ აწერია ყველი, თუმცა, იყიდება ყველის სექციაში, აქვს ყველის ფორმა და მასთან ასოცირებული სახელწოდება (იმერული, ჭყინტი“, სახაჭაპურე).

პროცესს მონიტორინგს სურსათის ეროვნული სააგენტო უწევს. უწყება  კვების ობიექტებს ამოწმებს. შემოწმების ძირითადი მიზანია, წარმოებაში გამოყენებული ყველის წარმომავლობის მიკვლევადობის დადგენა. თბილისის მასშტაბით ჯერჯერობით შემოწმდა 32 ობიექტი.რძის ფხვნილისგან დამზადებული ყველის ხაჭაპურებში გამოყენების გამო ეტიკეტირების წესის დარღვევისთვის დაჯარიმდა უკვე 20-ზე მეტი ბიზნესოპერატორი.

როგორც ხარისხის ლაბორატორია - Quality Lab დირექტორმა ირაკლი ჭკადუამ კომერსანტთან საუბარში განაცხადა, უკანასკნელ პერიოდში საკმაოდ გაიზარდა რძის პროდუქტების მწარმოებელი და გადამამუშავებელი ბიზნეს ოპერატორების მხრიდან  მოსალოდნელი საჯარიმო სანქციებისგან დაცვის მიზნით მომართვიანობა, რაც სავარაუდოდ სურსათის სააგენტოს მხრიდან რეგულაციების ამოქმედების შედეგია.

ნათია ლომიძე