რუსული მხარის ინიციატივას, 15 ქართულ კომპანიას რუსეთში რძის პროდუქტების შეტანის ნებართვა მისცეს, ქართველი მწარმოებლები კატეგორიულად არ ეთანხმებიან. ჯერჯერობით ოფიციალურ დონეზე განცხადება სექტორის წარმომადგენლებს არ გაუკეთებიათ, თუმცა ,,კომერსანტთან“
ამბობენ, რომ რუსეთში ექსპორტს არ დაუშვებენ. რძის მწარმოებელთა ასოციაციის ხელმძღვანელის კახა კონიაშვილის განცხადებით, თუკი მიეცემათ შესაძლებლობა, მზად არიან უკრაინაში გააგზავნონ ჰუმანიტარული ტვირთი და ამით უკრაინელ ხალხს სოლიდარობა გამოუცხადონ.
,,ჩვენს ასოციაციას მიმდინარე პერიოდში რუსეთში პროდუქტის ექსპორტთან დაკავშირებით აქვს მყარი პოზიცია - არანაირ თანამშრომლობას ამ რთულ სიტუაციაში რუსეთის ბაზარზე არ ვაპირებთ. მით უმეტეს, ამ შემთხვევაში პრიორიტეტია ქართველი მომხმარებელი და ადგილობრივი ბაზრის დაკმაყოფილება რძისა და რძის პროდუქტებით. თუკი შესაძლებელია რაიმე მიმართულებით ვაწარმოოთ ექსპორტი, ეს იქნება მხოლოდ უკრაინა, ისიც ჰუმანიტარული დახმარების სახით“, - აცხადებს კახა კონიაშვილი.
მისივე თქმით, უკრაინაში პროდუქტის ექსპორტის შესაძლებლობა ჯერჯერობით არ აქვთ და სურვილის მიუხედავად, ვერც ჰუმანიტარული მისიით შეაქვთ რძის პროდუქტი ტექნოლოგიური სირთულეების გამო.
,,ფორსმაჟორულ სიტუაციაში რძის პროდუქტის გაგზავნა უკრაინაში გარკვეულ სირთულეს უკავშირდება. იმის გამო, რომ ჩვენი წარმოებული პროდუქტი მალფუჭებადია, მისი ტრანსპორტირება საომარი მოქმედების დროს, დიდი სირთულეს წარმოადგენს. ეს არ არის ფრანგული და შვეიცარიული, დაძველების მეთოდით წარმოებული ყველი, რომელსაც ხანგრძლივი შენახვის ვადა აქვს. ჩვენი პროდუქტი 2-3 კვირაზე მეტხანს არ ინახება. ამიტომ საომარ ტერიტორიაზე ამ ტვირთის შეტანა გარკვეულ რისკთანაა დაკავშირებული, სურსათის უსაფრთხოებიდან გამომდინარე. თუმცა თუკი ტექნოლოგირი საკითხების მოგვარებაში დაგვეხმარებიან, მზად ვართ უკრაინელი მოსახლეობის დასახმარებლად ჩვენი წვლილიც შევიტანოთ“, - ამბობს ,,კომერსანტთან“ კახა კონაშვილი.
რუსეთში რძისა და რძის პროდუქტების ექსპორტზე კატეგორიულ უარს აცხადებს კომპანია ,,ვიტა პროდუქტის“ დამფუძნებელი, მეწარმე გიორგი გიორგაძე.
,,როგორი პირობაც არ უნდა იყოს შემოთავაზებული, რუსეთში ექსპორტს ამ ვითარებაში არანაირად არ განვახორციელებ. მირჩევნია, საერთოდ გაუყიდავი დარჩეს პროდუქტი, ვიდრე რუსეთში გავიტანო, ეს ჩემი, როგორც მოქალაქის, პრინციპული პოზიციაა აგრესორი ქვეყნის მიმართ“, - აცხადებს ქართველი მეწარმე.
შეგახსენებთ, რომ რუსეთის ვეტერინარიისა და ფიტოსანიტარიის ფედერალური სამსახური (როსსელხოზნადზორი/Россельхознадзор) აცხადებს, რომ 15 ქართულ კომპანიას რუსეთში რძის პროდუქტების იმპორტის „ნებას რთავს“.
როსსელხოზნადზორის ცნობით, ეს გადაწყვეტილება მიღებული იქნა უწყების ხელმძღვანელ სერგეი დანკვერტსა და საქართველოს სურსათის ეროვნული სააგენტოს ხელმძღვანელს ზურაბ ჩეკურაშვილს შორის მოლაპარაკების შემდეგ. სურსათის ეროვნული სააგენტო სოფლის მეურნეობის სამინისტროს ექვემდებარება.
ეს გადაწყვეტილება ფიტოსანიტარიის სამსახურმა რუსეთისთვის არაერთი სახელმწიფოს მიერ დაწესებული მძიმე სანქციების ფონზე მიიღო.
მარი ჩიტაია