ლარმა ბოლო პერიოდის გაუფასურების ახალი რეკორდი დაამყარა და 10 მარტს ეროვნული ვალუტის ოფიციალური კურსი დოლართან მიმართებით 3.4019 გახდა, მაშინ როდესაც წლის დასაწყისში 3.0892-ს არ აღემატებოდა. თუმცა დღევანდელი ოფიციალური კურსით ლარი მცირედით გამყარდა და დოლართან მიმართებით 3.2178 გახდა. ლარის გაუფასურებას რუსეთ-უკრაინის ომის ფონზე ნეგატიურ მოლოდინებსა და ქვეყანაში არსებულ დაძაბულ პოლიტიკურ მდგომარეობას უკავშირებენ მთავრობის ეკონომიკურ გუნდში.

ვალუტის კურსის ასეთ რყევებს ბუნებრივად მიიჩნევს ლაშა ნიკოლაიშვილი. მიკროსაფინანსო ორგანიზაცია „რიკო კრედიტის” სამეთვალყურეო საბჭოს თავმჯდომარე „კომერსანტთან“ ამბობს, რომ როცა რეგიონში ასეთი მაღალი რყევებია, შეუძლებელია კურსი სტაბილური დარჩეს.

„ვალუტის კურსის ასეთი რყევები, რაც საქართველოში დაფიქსირდა, ბუნებრივია. ჩვენ გვყავს მეზობელი თურქეთი, რომლის კურსი 3.15-ზე ავიდა და რუსეთი რომლის კურსი 115-120-მდე გაიზარდა. ჩვენი კურსი, რომ დარჩეს გაცილებით მყარი სხვა ვალუტებთან შედარებით ეს პირველ რიგში ექსპორტ-იმპორტზე აისახება საკმაოდ მძიმედ, რადგან საქართველოდან რუსეთში ყველა ექსპორტირებული პროდუქტის ფასი მოიმატებს. რეგიონში როცა ამხელა რყევებია კურსი რომ სტაბილური დარჩეს, ეს შეუძლებელია. რა თქმა უნდა პანიკა იყო, როდესაც კურსმა ზემოთ აიწია, თუმცა ეროვნულმა ბანკმა ეფექტურად დააბალანსა. ახლა ლარი კომფორტის ზონას ეძებს და იმადია მალე დაბინავდება“, - აცხადებს ლაშა ნიკოლაიშვილი.

საქართველოს ეროვნულმა ბანკმა 2022 წელს მხოლოდ ერთი სავალუტო ინტერვენცია განახორციელა. 9 მარტს გამართულ საქართველოს ეროვნული ბანკის სავალუტო აუქციონზე სებ-ის მიერ გასაყიდად გამოტანილი იქნა 50 მლნ. აშშ დოლარი, აუქციონზე კი 39 570 000 აშშ დოლარი გაიყიდა. საშუალო შეწონილმა გაცვლითმა კურსმა 3.3947 შეადგინა.