საქართველოს რეგიონული განვითარებისა და ინფრასტრუქტურის სამინისტრო 11 თვეში Facebook-პოსტებში 10 ათას ლარს დახარჯავს. როგორც სახელმწიფო შესყიდვების საიტზე განთავსებული ინფორმაციიდან ირკვევა აღნიშნული სერვისის შეძენას სამინისტრო გამარტივებული შესყიდვის ფორმით გეგმავს.

„რეგიონული განვითარებისა და ინფრასტრუქტურის სამინისტრო მთელი ქვეყნის მასშტაბით ავითარებს საზოგადოებრივად მნიშვნელოვან, სხვადასხვა მასშტაბისა და დანიშნულების ინფრასტრუქტურულ პროექტებს. ყველა ასეთი პროექტის საბოლოო ბენეფიციარი ჩვენი ქვეყნის მოსახლეობაა. შესაბამისად, მნიშვნელოვანია ინფრასტრუქტურული პროექტების განვითარების პროცესის შესახებ, ასევე, ამ მიმართულებით სამინისტროს საქმიანობისა და გეგმების თაობაზე ინფორმაცია მუდმივად და ეფექტურად მიეწოდებოდეს საზოგადოებას.

სწორედ საზოგადოების ეფექტური ინფორმირებულობის უზრუნველყოფის მიზნით, ტრადიციულ მედია საშუალებებთან ერთად, სამინისტროს საზოგადოებასთან ურთიერთობის სამსახური იყენებს სოციალური მედიის სხვადასხვა პლატფორმებს, მათ შორის, მართავს სოციალური მედიის - „ფეისბუქის“ სამინისტროს ოფიციალურ გვერდს. სოციალური მედიის საშუალებით, საზოგადოებას რეგულარულად მიეწოდება ინფორმაცია სამინისტროს საქმიანობის და მაღალი საჯარო ინტერესის მქონე ინფრასტრუქტურული პროექტების მიმდინარეობისა და სიახლეების შესახებ. ამისათვის სამინისტროს “ფეისბუქის” გვერდზე თავსდება, საზოგადოებასთან ურთიერთობის სამსახურის მიერ მომზადებული, სხვადასხვა პროექტისა თუ ღონისძიების ამსახველი ფოტო, აუდიო და საინფორმაციო მასალა.

ინტერნეტისა და შესაბამისად, “ფეისბუქის” მოხმარების ზრდასთან ერთად, სულ უფრო და უფრო იზრდება „ფეისბუქის“ საშუალებით გავრცელებული ინფორმაციული ნაკადები. შესაბამისად, სამინისტროს მიერ ამ პლატფორმაზე განთავსებული ინფორმაციის საჭირო აუდიტორიამდე მიტანა შეუძლებელი ხდება მისი ე. წ. „ნახვების“ გაზრდის სპეციალური მომსახურების გარეშე. ყოველივე ზემოაღნიშნულის გათვალისწინებით, სამინისტროს მართვაში არსებული მიმდინარე თუ დაგეგმილი ინფრასტრუქტურული პროექტების შესახებ ინფორმაციის „ფეისბუქის“ რაც შეიძლება მეტი მომხმარებლისთვის მიწოდების უზრუნველსაყოფად, 2023 წლის 31 დეკემბრის ჩათვლით, გვესაჭიროება სოციალური ქსელ facebook-ზე ექსკლუზიური სარეკლამო მომსახურება. ასეთი მომსახურების საორიენტაციო ღირებულება მითითებულ პერიოდში შეადგენს 10 000 ათას ლარს“, - აღნიშნულია სამინისტროს მოხსენებით ბარათში.