ვირტუალური ვალუტის გამოყენებით ფულის გათეთრების და ტერორიზმის დაფინანსების რისკები იზრდება, სწორედ ამიტომ ეროვნულმა ბანკმა მიმდინარე წლის პირველი იანვრიდან კრიპტო ბაზრის რეგულირება დაიწყო. ვის ეხება და რას ცვლის მარეგულირებლის ეს გადაწყვეტილება, ამის შესახებ რადიო „კომერსანტის“ გადაცემაში „კომერსანტის დილა“ My coins ის კომერციულმა დირექტორმა ლუკა ლომსაძემ ისაუბრა.
მისი თქმით რეგულაციები პირველ რიგში მომხმარებლებში ნდობის ფაქტორს გაზრდის, რადგან ის კომპანიის და კლიენტების უსაფრთხოებას ემსახურება. რაც ბაზარს ფულის გათეთრებისგან და შავ ბაზართან კავშირისგან დაიცავს.
„ეს ყველაფერი გაფილტრავს ქართულ მარკეტს და ის ხელზე მოვაჭრეები, ვინც სხვადასხვა ობიექტებზე არიან, შესაძლოა, საერთოდ გაქრნენ, იმ შემთხვევაში, თუ რაღაც გამოსავალი არ მოიფიქრეს. რაც შეეხება my coins-ს ჩვენთვის არაფერი არ იცვლება და ისევ ისე გავაგრძელებთ ოპერირებას, როგორც აქამდე იყო.
რეგულაციების მიღების შემდეგ, მომხმარებლის მიმართულებით ცვლილებებს არ ველოდები, რადგან იმავენაირად შეძლებენ აქტივობების განხორციელებას და მათ არანაირი შეზღუდვა არ ექნებათ, პირიქით მათ გაუმარტივდებათ პროცესი, იმიტომ, რომ დღეს კრიპტოსამყაროს შესახებ არანაირი რეგულაცია არ გვაქვს, კრიპტოვალუტით ნაშოვნ ფულს ბანკები ეჭვის თვალით უყურებენ და ზოგ შემთხვევაში მომხმარებლებს ანგარიშებსაც უხურავენ. როდესაც ეს ყველაფერი რეგულაციებში მოექცევა და ლიცენზირებული გახდება, მსგავსი პრობლემები აღარ შეიქმნება, შესაბამისად, რეგულაციები მომხმარებელს დადებითის მეტს არაფერს მოუტანს“, - აღნიშნა ლუკა ლომსაძემ.
ლუკა ლომსაძე ფიქრობს, რომ რეგულაციების ამოქმედება ბაზარს საინვესტიციო მიმართულებითაც წაადგება, რადგან როდესაც საქართველოში ლიცენზია და ზოგადად, მსგავსი არანაირი ფორმა არ არსებობს, დიდ ასპარეზზე გასვლა რთულია, რადგან დიდი კომპანია, როგორც სერიოზულ მოთამაშეს, არ შემოგხედავს.
„ბაზარზე არსებული კომპანიებისთვის რეგულაციები იმ მხრივ იქნება კარგი, რომ საერთაშორისო ბაზარზე გვექნება ლიცენზირებული კომპანიის სახელი და ისეთი დიდი კომპანიებისთვის, როგორიც binance - ია საქართველოს ბაზარზე შემოსვლა პრობლემური არ იქნება“, - აღნიშნა ლუკა ლომსაძემ.
თაკო კვაჭანტირაძე