მიუხედავად მთავრობის მიერ შემოღებული რეგულაციებისა, საქართველოში ბიზნეს სექტორის ბრუნვის მნიშვნელოვანი ნაწილი კვლავ აზარტულ თამაშებზე მოდის. კერძოდ, მიმდინარე წლის მეორე კვარტალში მთლიანი ბიზნეს სექტორის ბრუნვის თითქმის მესამედი - 28% ხელოვნების, დასვენებისა და გართობის ჯგუფზე მოდიოდა. სწორედ ამ ჯგუფში შედის აზარტული თამაშებიც - მასთან ერთად აღნიშნული ჯგუფი აერთიანებს ბიბლიოთეკებს, არქივებს, მუზეუმებს, სპორტისა და დასვენების სფეროებს, თუმცა მისი უდიდესი წილი სწორედ აზარტულ თამაშებს უკავიათ.
საქსტატი აზარტული თამაშების სფეროს მაჩვენებლებს კვარტლურად არ აქვეყნებს, თუმცა წინა წლების სტატისტიკაზე დაყრდნობით შეგვიძლია ვთქვათ რომ ზემოთ მოყვანილი ჯგუფის უდიდესი წილი აზარტულ თამაშებზე მოდის. გართობისა და ხელოვნების ჯგუფის მთლიანი ბრუნვა 2020 წელს 32.1 მლრდ ლარს შეადგენდა (მთლიანი ბრუნვის 28.1%-ს), საქსტატის ოფიციალური სტატისტიკით კი 2020 წელს აზარტული თამაშების ბრუნვა 32 მლრდ ლარს აღწევდა - აზარტული თამაშების სექტორის ბრუნვა განსხვავებულად ითვლება, (ბრუნვის მოცულობაში აისახება მოთამაშეთა მიერ ყოველ ჯერზე დადებული ფსონების ჯამს დამატებული მოთამაშეთა მიერ ჩარიცხული თანხა) თუმცა თვალსაჩინოა რომ აღნიშნული სექტორის უდიდესი წილი მხოლოდ აზარტულ თამაშებზე მოდის.
2022 წელსაც 2020 წლის მსგავსად მთლიანი ბიზნეს სექტორის ბრუნვის თითქმის მესამედი - 28% ხელოვნების, გართობისა და დასვენების ჯგუფზე მოდის. საინტერესოა რომ წლიურად ამ სექტორის ბრუნვა არათუ შემცირებული, არამედ გაზრდილია და 11.6 მლრდ ლარს შეადგენს, მაშინ როდესაც გასული წლის მეორე კვარტალში ეს მაჩვენებელი 11 მლრდ ლარს შეადგენდა - წლიური ზრდა 5.6%-ს შეადგენს.
გაზრდილია სექტორის პროდუქციის გამოშვებაც - ზრდა წლიურად 36%-ს აღწევს.
ამასთან მზარდია სექტორში დასაქმებულთა რაოდენობაც - სექტორი 13 ათასზე მეტ პირს ასაქმებს - წლიურად 36%-ით გაზრდილი მაჩვენებელი. ეს კი მაშინ როდესაც საქსტატის მონაცემებითვე, აზარტული თამაშების სექტორი 2020 წელს 9864 პირს ასაქმებდა.
მიუხედავად ბრუნვის ზრდისა, საქსტატში განმარტავენ რომ ეს ფაქტი არ ნიშნავს იმას რომ კაზინოების მომხმარებლები გაიზარდა, - შესაძლოა ადგილი ჰქონდეს მომგებიანობის ზრდას ანდა მომხმარებელთა ქცევის ცვლილებას, რაც იმით აიხსნება რომ თითოეული მოქალაქე შესაძლოა უფრო ხშირად და უფრო მაღალ თანხებზე თამაშობდეს, ვიდრე გასულ პერიოდში.
წყარო: gbc.ge