მსოფლიო ბანკი წყვეტს ყოველწლიური რეიტინგის Doing Business გამოქვეყნებას, რომელიც სხვადასხვა ქვეყანაში ბიზნესის კეთების პირობებს ეძღვნებოდა. ამის მიზეზი ის დარღვევები გახდა, რომლებიც წინა წლებში რეიტინგების შედგენისას იყო დაშვებული.
„მსოფლიო ბანკის ხელმძღვანელობამ გადაწყვიტა, შეწყვიტოს ანგარიშის Doing Business გამოქვეყნება. მომავალში ახალ მიდგომებზე ვიმუშავებთ საქმიანი და საინვესტიციო კლიმატის შესაფასებლად“, – ნათქვამია ბანკის ინფორმაციაში, რომელიც 16 სექტემბერს საღამოს გამოქვეყნდა.
რეიტინგის გამოქვეყნება აუდიტის შედეგების გამო შეწყდა, რომელიც კომპანიამ WilmerHale ჩაატარა. აუდიტის ანგარიშიდან ჩანს, რომ საერთაშორისო სავალუტო ფონდის ხელმძღვანელი კრისტალინა გეორგიევა, მსოფლიო ბანკის გენერალური დირექტორის თანამდებობაზე ყოფნის დროს, 2017 წელს ზეწოლას ახდენდა თანამშრომლებზე და აიძულებდა მათ, ჩინეთის რეიტინგის შედგენისას სხვა მეთოდოლოგიით ეხელმძღვანელათ, რითაც აუმჯობესებდა ჩინეთის მონაცემებს.
ჩინეთის რეიტინგის ფალსიფიკაცია
ამის შედეგად, 2018 წელს ჩინეთმა 78–ე პოზიციის შენარჩუნება შეძლო, თუმცა, რეალურად, მას 7 ადგილით უნდა დაეხია უკან. გეორგიევამ უარყო მის მიმართ წაყენებული ბრალდებები.
მსოფლიო ბანკი რეიტინგს Doing Business 2002 წლიდან აქვეყნებდა. ბიზნესის კეთების ხელსაყრელი პირობები 10 კატეგორიის მიხედვით ფასდებოდა: საწარმოს რეგისტრაცია, მშენებლობის ნებართვის მიღება, ელექტროქსელებზე დაერთება, საკუთრების რეგისტრაცია, კრედიტის მიღება, გადასახადების გადახდა და სხვ.
Doing Business 2020 რეიტინგში საქართველო მე–7 ადგილს იკავებს 190 ქვეყნიდან. საუკეთესო შეფასების ზღვართან მიახლოებით (DTF) ქვეყნის ქულამ ისტორიული მაქსიმუმი - 83.7 ქულა შეადგინა (0.2 პუნქტიანი გაუმჯობესება)