რესტორატორთა ასოციაციამ დასაქმების პრობლემის გადაჭრის გზას მიაგნო. როგორც რადიო „კომერსანტის“ ეთერში გადაცემაში „კომერსანტის დილა“ რესტორატორთა ასოციაციის დამფუძნებელმა შოთა ბურჯანაძემ განაცხადა, რესტორატორთა ასოციაციის მიერ იქმნება სპეციალური სასწავლებელი, სადაც დასაქმების მსურველი ადამიანების გადამზადება/მომზადება მოხდება, რომელთაც შემდგომ რესტორნები აიყვანენ და უკვე მცოდნე კარგს დასაქმების პრობლემა აღარ შეექმნება.
„ძალიან დიდი პრობლემაა ქვეყანაში კადრების კუთხით, სამწუხაროდ ეს საკითხი არ არის მხოლოდ და მხოლოდ ერთი სფეროს პრობლემა. ზოგადად პარადოქსია, მაგრამ ბევრი უმუშევარია და დიდი მოთხოვნა სამუშაო ადგილებზე. ამ ფონზე გადავწყვიტეთ პრობლემების ჩვენებურად მოგვარება დავიწყოთ. ანუ რესტორატორთა ასოციაციის მხრიდან ნაბიჯები უნდა გადაიდგას, რომ საკითხი გარკვეულწილად მოგვარდეს. შეიძლება ჩვენ პრობლემა მთლიანად ვერ აღმოვფხვრათ, მაგრამ დასაწყისისთვის თუ ნაბიჯებს არ გადავდგამთ შედეგს ვერ მივიღებთ. ის ფაქტი, რომ ჩვენს სფეროში არის კადრების დეფიციტი ამას სჭირდება გადაჭრა. ვმუშაობთ იმაზე, რომ შევქმნათ რესტორატორთა ასოციაციის სკოლა, რომელიც შესაბამისი მოთხოვნის საფუძველზე სწავლების შესაძლებლობას იძლევა. სკოლაში სწავლება შეეძლებათ და პროფესიის მიღება სარესტორნო სფეროში დასასაქმებელ ადამიანებს, რომელთაც სურვილი აქვთ, რომ ამა თუ იმ მიმართულებით მიიღონ პროფესიული განათლება. შესაბამისად ამ სკოლის კურსდამთავრებული 100%-ით გარანტირებული იქნებიან დასაქმებით. ჩვენ საკმაოდ დიდი რაოდენობის რესტორნებს მოვიცვათ, რომელთაც დასაქმების შესაძლებლობა აქვთ. შესაბამისად ის ადამიანები, რომლებიც სურვილს გამოთქვამენ ჩვენ სფეროში დასაქმდნენ, მიიღებენ როგორც თეორიული ასევე პრაქტიკულ განათლებას. შესაბამისად დასაქმების პრობლემა აღარ იქნება. ეს იქნება კვალიფიციური კადრი, რომელიც მზად იქნება უკვე რესტორანში სამუშაოდ“, - განაცხადა შოთა ბურჯანაძემ.
მისივე თქმით, პროფესიული სასწავლებლები დღეს ქვეყანაში მრავლადაა, თუმცა მისი აზრით სახელმწიფო აფინანსებს ისეთ მიმართულებებს რომელიც დღეს მოთხოვნადი არ არის. „ფულის ჩასხმა უნდა იყოს იმ მიმართულებებზე, რაზეც მოთხოვნა არის“- მიიჩნევს ბურჯანაძე.
„ჩვენ სამწუხაროდ ვერ შევძლებთ, რომ მთლიანი ბაზრის შესაძლებლობების დასაქმება მოვახდინოთ, რადგან მოთხოვნა ძალიან დიდია. მთავარია პირველი ნაბიჯები გადავდგათ, რაც გარკვეულ შვებას მისცემს ინდუსტრიას, რომ ნელ-ნელა, ნაბიჯ-ნაბიჯ შევძლოთ ამის გაკეთება. ამას ასევე ვერ შევძლებთ მარტო. აქ აუცილებლად საჭიროა სახელმწიფოს დახმარება და გვერდით დგომა, რომ ბიზნესმა და სახელმწიფომ ერთად შეძლოს ამ პროექტის განხორციელება“, - განმარტავს ბურჯანაძე.