22-28 აგვისტოს პერიოდში, ჯამური უნაღდო დანახარჯების წლიური ზრდის ტემპი მცირედით გაიზარდა და 3.3% შეადგინა, ხოლო უნაღდო ტრანზაქციების რაოდენობის წლიური ზრდა 22%-ს გაუტოლდა, აღნიშნულია თიბისი კაპიტალის მიერ გამოქვეყნებულ „მომხმარებლის დანახარჯების დინამიკაში (აღდგენის დინამიკა)“.
მათივე განმარტებით, 22-28 აგვისტოს პერიოდში, უნაღდო დანახარჯების ზრდა სურსათზე შენელდა და 28% შეადგინა 2021 წელთან შედარებით. საშუალო დანახარჯი სურსათზე სტაბილურია და ერთეულ ტრანზაქციაზე 16 ლარს უტოლდება.
საანგარიშო პერიოდში, თიბისი ბანკის არხებით, სასტუმროებში უნაღდო ხარჯვის ზრდის ტემპი უცვლელად შენარჩუნდა და 2021 წლის დონესთან შედარებით 39% შეადგინა. ტრანზაქციაზე საშუალო დანახარჯი შემცირდა და 335 ლარს გაუტოლდა.
იმავდროულად, არარეზიდენტების უნაღდო ხარჯვის ზრდის ტემპი, თიბისი ბანკის არხებით, მცირედით გაიზარდა და 47% შეადგინა 2019 წელთან შედარებით.
„22-28 აგვისტოს პერიოდში, უნაღდო დანახარჯების ზრდის ტემპი რესტორნებსა და კაფეებში, თიბისი ბანკის არხებით, გაუმჯობესდა და 2021 წელთან შედარებით 67% შეადგინა. საშუალო დანახარჯი ერთეულ ტრანზაქციაზე უცვლელია და 35 ლარს უტოლდება.
უნაღდო დანახარჯები გართობაზე, თიბისი ბანკის არხებით, მნიშვნელოვნად გაიზარდა და წლიურმა ზრდის ტემპმა შეადგინა 102%.
22-28 აგვისტოს პერიოდში, უნაღდო დანახარჯების წლიური ზრდა ტანსაცმელსა და აქსესუარებზე, თიბისი ბანკის არხებით, შენელდა და 41%-ს გაუტოლდა, ხოლო ტრანზაქციის საშუალო მოცულობა 99 ლარამდე გაიზარდა.
უნაღდო დანახარჯები სხვა საცალო მაღაზიებში ბოლო კვირების განმავლობაში სტაბილურობას ინარჩუნებს და წლიურმა ზრდამ 22-28 აგვისტოს პერიოდში 12% შეადგინა.
22-28 აგვისტოს პერიოდში, ახალი გაცემული იპოთეკური სესხების ზრდის ტემპი მნიშვნელოვნად გაუმჯობესდა და 2021 წელთან შედარებით +8% შეადგინა.
15-21 აგვისტოს პერიოდში, თბილისის საცხოვრებელი უძრავი ქონების ტრანზაქციები გაიზარდა და +28% წლიური ზრდა დაფიქსირდა.
22-28 აგვისტოს პერიოდში, სამშენებლო მასალებზე უნაღდო დანახარჯების ზრდა, თიბისი ბანკის არხებით, შენელდა და 2021 წელთან შედარებით 32%-ს გაუტოლდა.
ელექტრონიკაზე უნაღდო დანახარჯების ზრდის ტემპში კლება დაფიქსირდა და 2021 წლის დონესთან შედარებით 25% შეადგინა.
უნაღდო დანახარჯები ავეჯსა და მოწყობილობებზე მცირედით გაუმჯობესდა და წლიურმა ზრდამ 46% შეადგინა.
22-28 აგვისტოს პერიოდში, უნაღდო დანახარჯები საწვავზე, თიბისი ბანკის არხებით, მნიშვნელოვნად შემცირდა და წლიურმა ზრდამ 7% შეადგინა. საშუალო დანახარჯი ტრაზაქციაზე კვლავ მაღალია და 64 ლარს უტოლდება.
მანქანის შეკეთებაზე უნაღდო დანახარჯების ზრდის ტემპი შენელდა და 2021 წელთან შედარებით 30% შეადგინა. საშუალო დანახარჯმა ტრანზაქციაზე ასევე მცირედით დაიკლო და 87 ლარს გაუტოლდა.
22-28 აგვისტოს პერიოდში, უნაღდო დანახარჯების ზრდის ტემპი ფარმაციაზე, თიბისი ბანკის არხებით, გაიზარდა და წლიურად 10%-ს გაუტოლდა. უნაღდო დანახარჯები პირად ჰიგიენაზე სტაბილურია და ზრდამ 26% შეადგინა 2021 წელთან შედარებით.
უნაღდო დანახარჯები ექიმთან ვიზიტებზე მცირედით გაიზარდა და წლიურმა ზრდამ 17% შეადგინა. სამედიცინო აღჭურვილობაზე უნაღდო დანახარჯების ზრდის ტემპი შემცირდა და 10%-ს გაუტოლდა 2021 წელთან შედარებით“, — აღნიშნულია თიბისი კაპიტალის მიერ გამოქვეყნებულ ინფორმაციაში.