ვინაიდან რუსეთი ისტორიული დეფოლტის ზღვარზეა, უცხოელ ინვესტორებს საკუთარი ფულის დაბრუნების რამდენიმე მისაღები ვარიანტი აქვთ. ეს არის სასამართლო დავები, ანგარიშსწორება ორმხრივი შეთანხმებით და ვითარების განმუხტვის მოლოდინი.

მიიღე ინფორმაცია უფრო სწრაფად „კომერსანტის“ Telegram-ზე.

ამის შესახებ სააგენტო Reuters წერს.

როგორც წესი, უცხოელი კრედიტორები გაერთიანებას ცდილობენ ხოლმე, რათა შეთანხმდნენ, სასამართლოს მიმართონ, თუ დეფოლტის შემთხვევაში არბიტრაჟში შეიკრიბონ. თუმცა, უკრაინაზე თავდასხმის გამო რუსეთისთვის დაწესებული სანქციები და ქვეყნის სუვერენული ობლიგაციების თავისებურებები ამ მომენტისთვის აღნიშნულ ვარიანტებს რთულად რეალიზებადს ხდის, აღნიშნავენ იურისტები.

რუსეთს არ გადაუხდია $40 მლრდ–ის სუვერენული ვალი, რომელიც დოლარსა და ევროშია განთავსებული და ამ ვალის დაახლოებით ნახევარი უცხოელებისგან მართებს. დადებული პირობის თანახმად, რუსეთმა კრედიტორებს ეს ვალი იმ ვალუტაში უნდა დაუბრუნოს, რომელიც ობლიგაციებია ნომინირებული.

დასავლურმა სანქციებმა რუსეთს დაახლოებით $300 მლრდ–ის ოქროს და სავალუტო რეზერვებზე შეუზღუდა წვდომა, რომლებიც უცხოურ ბანკებში ჰქონდა განთავსებული.

რუსეთი ამბობს, რომ მას აქვს ფული და შეუძლია ვალების გასტუმრებაც, თუმცა სანქციები ამის შესაძლებლობას არ აძლევს. კრემლმა განაცხადა, რომ ვალების დასაფარად საკუთარ ვალუტას გამოიყენებს, ვიდრე მისი რეზერვები არ გათავისუფლდება.

4 აპრილს რუსეთი $649 მილიონის ვალდებულების რუბლში გადახდას შეეცადა.

სარეიტინგო კომპანიები ამბობენ, რომ რუსეთი დეფოლტის მდგომარეობაში შეიძლება აღმოჩნდეს, რადგან ვალდებულებები დოლარსა და ევროში უნდა დაფაროს, რისი სურვილიც მას არ გააჩნია.

მას შემდეგ, რაც რუსეთს ვალის დაფარვის საშეღავათო პერიოდი დაუმთავრდება მაისის დასაწყისში, ინვესტორებს სამი ვარიანტი დარჩებათ, თქვა დენის ხრანიცკიმ, იურიდიული ფირმის Quinn Emanuel სუვერენული სასამართლო განხილვების განყოფილების ხელმძღვანელმა.

მისი თქმით, მათ შეუძლიათ დაელოდონ და შეხედონ, რა მოხდება, რუსეთს სასამართლოში უჩივლონ, ან არბიტრაჟს მიმართონ ორმხრივი შეთანხმებების საფუძველზე, რომლებიც რუსეთს ათობით ქვეყანასთან აქვს გაფორმებული.