კორპორაცია Virgin Group-ის დამფუძნებელმა, მილიარდერმა, რიჩარდ ბრენსონმა მსოფლიო ბიზნესის ლიდერებს მოუწოდა, გაერთიანდნენ და უკრაინის სუვერენიტეტი რუსეთის ფედერაციის აგრესიისგან დაიცვან. ამის შესახებ ბრენსონი კომპანიის ვებ-გვერდზე გამოქვეყნებულ სტატიაში წერს, რომლის სათაურიც არის „ჩემი აზრები უკრაინასა და რუსეთზე“ (My thoughts on Ukraine and Russia).

„დადგა მომენტი, რომ ბიზნეს-ლიდერები შეიკრიბონ და უკრაინის სუვერენიტეტი დაიცვან. იმ შემთხვევაშიც, თუკი ამის ფასს გადავიხდით, ჩვენ ყველამ უნდა განვაცხადოთ, რომ ცალმხრივი აგრესია ყოველთვის მიუღებელია და გლობალური ბიზნეს-საზოგადოება მხარს დაუჭერს სანქციების სრულ სპექტრს ნებისმიერი სახელმწიფოს წინააღმდეგ, რომელიც ცდილობს, შელახოს სხვისი სუვერენიტეტი,“ - წერს რიჩარდ ბრენსონი.

მისი შეფასებით, ბიზნესის ლიდერები მთელ მსოფლიოში დიდი შეშფოთებით ადევნებენ თვალს უკრაინის საზღვართან რუსული ჯარების თავმოყრას. ბრენსონის აზრით, უკრაინასა და რუსეთის ფედერაციას შორის ურთიერთობა არის „კონფლიქტი, რომელიც მრავალი წლის განმავლობაში დნებოდა პერიოდული აფეთქებებით, როგორიც იყო 2014 წელს რუსეთის მიერ ყირიმის უკანონო ანექსია."

„თუმცა ბოლო წლების განმავლობაში ევროპის მიწაზე ფართომასშტაბიანი ომის დიდი რისკი არასდროს ყოფილა, ომისა, რომელიც სამართლიან ან ლეგიტიმურ მიზანს, მანამდე მომხდარი სხვა ომების მსგავსად, არ ემსახურება. დღეს ყველას გვიძნელდება ბრაზის დამალვა: მართლაცდა, რა ჯანდაბას აკეთბს ერთი ქვეყანა მეორეს საზღვრებთან ამდენი ტანკით?!“ - წერს ბრენსონი.

მილიარდერი იხსენებს, რომ რვა წლის წინ, როცა უკრაინასთან დაკავშირებით რუსეთის პრეზიდენტ ვლადიმერ პუტინის განზრახვები დანარჩენი მსოფლიოსთვის აშკარა გახდა, ის პარტნიორებთან ერთად რუსი და უკრაინელი ბიზნეს-ლიდერების მობილიზებას, ურთიერთობების მშვიდობიანი მოგვარებისთვის ცდილობდა.

„ჩვენი რუსი კონტაქტები პირად საუბრებში რუსეთის სამხედრო ინტერვენციას ეწინააღმდეგებოდნენ, თუმცა საჯაროდ არც ერთი არ იღებდა ხმას. მაშინ ჩვენ საქმიანი განცხადება გავავრცელეთ, რასაც დასავლელმა და უკრაინელმა ბიზნეს-ლიდერებმა მონდომებით მოაწერეს ხელი, მაგრამ არც ერთი რუსული ხელმოწერა არ მიგვიღია. მათ მოსკოვის რეჟიმის რეპრესიების ძალიან ეშინოდათ,“ - წერს ბრენსონი.

მისი შეფასებით, ვისთანაც ურთიერთობს, ყველა ერთსულოვანია იმაში, რომ რუსეთსა და უკრაინას შორის ომს დამანგრეველი და შემზარავი შედეგები მოჰყვება: ის კიდევ უფრო მეტ იზოლაციაში მოაქცევს რუსეთის ფედერაციას დანარჩენი მსოფლიოსგან, გაანადგურებს რუსეთის ეკონომიკას, დიდ ზიანსა და ტანჯვას მიაყენებს მშვიდობიან მოსახლეობას, ხალხი საზღვრის ორივე მხარეს დაზარალდება.

„ეს არ არის კონფლიქტი, რომლის მოგებაც პრეზიდენტ პუტინს გრძელვადიან პერსპექტივაში შეუძლია. მართალია, მას ნაკლებად აინტერესებს, რას ფიქრობს მსოფლიო მის გეოპოლიტიკურ ამბიციებზე, მაგრამ ის საკუთარი ქვეყნის მომავალზე უნდა დაფიქრდეს: რაღაც მომენტში ჩვეულებრივი რუსები მიხვდებიან, რომ ისინი უკეთესს იმსახურებენ. განსაკუთრებით, თუ სიტუაცია მივა იქამდე, რომ თავიანთი სახლების, სოფლებისა და ქალაქების დამცველი უკრაინელების გარდაუვალი წინააღმდეგობა ავღანეთში საბჭოთა კავშირის მარცხის მოჩვენებებს, დაღუპული რუსი შვილების, ძმებისა და მამების სახით გააცოცხლებს,“ - წერს ბიზნესმენი.

წყარო:  "ბიზნესპრესნიუსი"